ബെനോനി: ദക്ഷിണാഫ്രിക്ക അണ്ടര് 19 ടീമിനെതിരായ യൂത്ത് ഏകദിന പരമ്പരയിലെ മൂന്നാം മത്സരത്തില് ഇന്ത്യയ്ക്ക് കൂറ്റന് വിജയം. 233 റണ്സിന്റെ ഉജ്വല വിജയമാണ് ഭാരതടീം നേടിയത്. ടോസ് നഷ്ടമായി ബാറ്റിങ്ങിനിറങ്ങിയ ഇന്ത്യ 50 ഓവറില് ഏഴ് വിക്കറ്റ് നഷ്ടത്തില് 397 റണ്സ് അടിച്ചുകൂട്ടി. മറുപടി ബാറ്റിങ്ങിനിറങ്ങിയ ദക്ഷിണാഫ്രിക്ക 35 ഓവറില് 160 റണ്സിന് പുറത്ത്. ഒരിക്കല്ക്കൂടി വൈഭവ് സൂര്യവംശിയും മലയാളി താരം ആരോണ് ജോര്ജും തിളങ്ങി.
വെടിക്കെട്ട് സെഞ്ച്വറികളുമായി ഇന്ത്യ അണ്ടര് 19 ക്യാപ്റ്റന് വൈഭവ് സൂര്യവന്ഷിയും മലയാളി താരം ആരോണ് ജോര്ജും ഗംഭീര പ്രകടനമാണ് പുറത്തെടുത്തത്. ഓപ്പണര്മാരായാണ് ഇരുവരുമിറങ്ങിയത്. 74 പന്തില് ഒമ്പത് ബൗണ്ടറിയും 10 സിക്സറുമടക്കം 127 റണ്സ് നേടിയാണ് വൈഭവ് പുറത്തായത്. 116 പന്തില് 16 ഫോറുകള് അടക്കം 118 റണ്സാണ് ആരോണ് നേടിയത്. ഇതില് 16 മനോഹര ബൗണ്ടറികളുണ്ടായിരുന്നു. വേദാന്ത് ത്രിവേദി 34ഉം അഭിജ്ഞാന് കുന്ഡു 21ഉം റണ്സ് നേടി. മറുപടി ബാറ്റിങ്ങിനിറങ്ങിയ ദക്ഷിണാഫ്രിക്ക 50 റണ്സ് ചേര്ക്കുന്നതിനിടെ അഞ്ച് വിക്കറ്റുകള് നിലം പതിച്ചു. 41 റണ്സ് നേടിയ പോള് ജയിംസാണ് ടോപ് സ്കോറര്. ഡാനിയേല് ബോസ്മാന് (40), കോര്നെ ബോത (36*) എന്നിവരും ഭേദപ്പെട്ട പ്രകടനം പുറത്തെടുത്തു. ഭാരതത്തിനായി കിഷന് സിങ് മൂന്നും മുഹമ്മദ് എനാന് രണ്ടും വിക്കറ്റുകള് നേടി.
