കൊല്ലം:യുട്യൂബ് ചാനലിലെ വാര്‍ത്തയില്‍ അശ്ലീല കമന്റിട്ട കോടതി ജീവനക്കാരന്‍ അറസ്റ്റിലായി. കൊല്ലം നഗരത്തിലെ ഹരിതകര്‍മ സേനയെ ആക്ഷേപിച്ചതിന് ചാവക്കാട് സബ് കോടതി ക്ലാര്‍ക്ക് തൃശൂര്‍ മാടവന ആലംപറമ്പില്‍ സിറാജുദ്ദീനെ (52) ആണ് കൊല്ലം ഈസ്റ്റ് പൊലീസ് അറസ്റ്റ് ചെയ്തത്.
ഡിസംബര്‍ ഒമ്പതിന് യുട്യൂബ് ചാനലില്‍ വന്ന വാര്‍ത്തയുടെ കമന്റിലാണ് ഹരിതകര്‍മ സേനാംഗങ്ങള്‍ക്കെതിരെ അശ്ലീല പരാമര്‍ശം നടത്തിയത്. കൊല്ലം കോര്‍പറേഷന് കീഴില്‍ ജോലി ചെയ്യുന്ന സേനാംഗങ്ങള്‍ ഇതില്‍ പ്രതിഷേധിച്ച് പണിമുടക്കി പ്രതിഷേധ പ്രകടനം നടത്തിയിരുന്നു.
സംഭവത്തില്‍ പരാതി ലഭിച്ച ഈസ്റ്റ് പൊലീസ് കേസെടുത്തതോടെ ഒളിവില്‍ പോയ പ്രതി കഴിഞ്ഞ ദിവസം രാത്രി വീട്ടിലെത്തിയപ്പോള്‍ പൊലീസ് പിടികൂടുകയായിരുന്നു. സൈബര്‍ സെല്ലിന്റെ സഹായത്തോടെയാണ് പ്രതിയെ കണ്ടെത്തിയത്.അശ്ലീല കമന്റിട്ട മൊബൈല്‍ ഫോണ്‍ കണ്ടെടുത്തിട്ടുണ്ട്. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.
