തിരുവനന്തപുരം: നിയമസഭാ തെരഞ്ഞെടുപ്പ് ലക്ഷ്യമിട്ട് മുഖ്യമന്ത്രി പിണറായി വിജയന്‍ പ്രത്യേക മന്ത്രിസഭാ യോഗം വിളിച്ചു. മൂന്ന് മണിക്കൂര്‍ നീണ്ട മന്ത്രി സഭായോഗത്തില്‍ 110 സീറ്റുകളില്‍ വിജയം നേടണമെന്ന് മുഖ്യമന്ത്രി പറഞ്ഞു.
ഇതിനായി 50 ദിവസത്തെ കര്‍മ്മ പദ്ധതിയും മുഖ്യമന്ത്രി അവതരിപ്പിച്ചു.സര്‍ക്കാരിന്റെ വികസന നേട്ടങ്ങള്‍ ജനങ്ങളിലെത്തിക്കണമെന്നാണ് മന്ത്രിമാര്‍ക്കുളള നിര്‍ദ്ദേശം. ഇതിനായി ഏകോപന ചുമതലകള്‍ മന്ത്രിമാര്‍ക്ക് വീതിച്ച് നല്‍കി.
സാമൂഹ്യമാധ്യമ ഇടപെടലിനും പദ്ധതി തയാറാക്കിയിട്ടുണ്ട്.മുഖ്യമന്ത്രിയുടെ ഓഫീസ് നേരിട്ടാണ് പദ്ധതി തയാറാക്കിയത്.ഇന്നത്തെ യോഗത്തില്‍ പങ്കെടുക്കാത്ത മന്ത്രിമാരെ മറ്റ് മന്ത്രിമാര്‍ കാര്യങ്ങള്‍ ബോധ്യപ്പെടുത്തും.
തദ്ദേശ തെരഞ്ഞെടുപ്പില്‍ ഉണ്ടായ തോല്‍വിക്ക് കാരണം സര്‍ക്കാരിന്റെ വികസന -ക്ഷേമ കാര്യങ്ങള്‍ ജനങ്ങളില്‍ എത്തിക്കുന്നതില്‍ ഉണ്ടായ വീഴ്ച മൂലമാണെന്നാണ് പാര്‍ട്ടിയുടെ വിലയിരുത്തല്‍.
കോണ്‍ഗ്രസ് 100 സീറ്റ് ലക്ഷ്യമിട്ട് മുന്നോട്ട് പോകുന്ന സാഹചര്യത്തിലാണ് ഇടത് സര്‍ക്കാര്‍ 110 സീറ്റ് ലക്ഷ്യമിട്ട് പ്രവര്‍ത്തിക്കാനുളള തീരുമാനം.
