തിരുവനന്തപുരം:മെഡിക്കല്‍ കോളേജ് ലിഫ്റ്റില്‍ രണ്ട് ദിവസം കുടുങ്ങി കിടന്ന രോഗിക്ക് അഞ്ചുലക്ഷം രൂപ നഷ്ടപരിഹാരം നല്‍കണമെന്ന് മനുഷ്യാവകാശ കമ്മീഷന്‍. പോങ്ങുംമൂട് സ്വദേശി രവീന്ദ്രന്‍ നായര്‍ക്ക് അനുകൂലമായാണ് വിധി.
മനുഷ്യാവകാശ കമ്മീഷന്‍ ചെയര്‍മാന്‍ ജസ്റ്റിസ് അലക്‌സാണ്ടര്‍ തോമസിന്റേതാണ് ഉത്തരവ്. രണ്ടുമാസത്തിനുള്ളില്‍ തുക കൈമാറണമെന്നാണ് ഉത്തരവിലുളളത്. ലിഫ്റ്റ് സര്‍വീസ് നടത്തുന്ന കമ്പനിക്ക് വീഴ്ച ഉണ്ടായിട്ടുണ്ടെങ്കില്‍ അവര്‍ക്കെതിരെ നടപടിയെടുക്കാനും സര്‍ക്കാരിനോടു കമ്മീഷന്‍ നിര്‍ദേശിച്ചു.
2025 ജൂലായ് 13-നായിരുന്നു സംഭവം. നടുവേദനയ്‌ക്ക് ചികിത്സ തേടി എത്തിയ രവീന്ദ്രന്‍ നായര്‍ ലിഫ്റ്റില്‍ കുടുങ്ങിയത് ആരുമറിഞ്ഞില്ല.രണ്ടു ദിവസം ലിഫ്റ്റില്‍ കുടുങ്ങിക്കിടന്നശേഷം അടുത്ത ദിവസം ലിഫ്റ്റ് ഓപ്പറേറ്റര്‍ എത്തിയപ്പോഴാണ് ആള്‍ കുടുങ്ങിയ കാര്യം പുറത്തറിഞ്ഞത്.
തകരാറിലായ ലിഫ്റ്റ് പൂട്ടുകയോ അപായ ബോര്‍ഡ് സ്ഥാപിക്കുകയോ ചെയ്യാതിരുന്നതാണ് രവീന്ദ്രന്‍ നായര്‍ ലിഫ്റ്റില്‍ കയറാന്‍ കാരണയായത്. ലിഫ്റ്റ് ഓപ്പറേറ്ററെ നിയമിക്കാനുള്ള ഉത്തരവാദിത്തം ആശുപത്രിക്കുണ്ടെന്നും ഇതില്‍ വീഴ്ച സംഭവിച്ചെന്നും മനുഷ്യാവകാശ കമ്മീഷന്‍ കണ്ടെത്തി.
രവീന്ദ്രന്‍ നായരുടെ ജീവന്‍ അപകടത്തിലാവുമായിരുന്നു. ഭാഗ്യം കൊണ്ടു മാത്രമാണ് അദ്ദേഹം രക്ഷപ്പെട്ടത്. അതിനാല്‍ നഷ്ടപരിഹാരം ലഭിക്കണമെന്ന ആവശ്യം ന്യായമാണെന്നും മനുഷ്യാവകാശ കമ്മീഷന്‍ ഉത്തരവില്‍ പറയുന്നു.
