സ്വപ്ന , എൺപതുകളിൽ മലയാളികളുടെ സ്വപ്ന സുന്ദരിയായിരുന്ന നടി . ‘ഏഴു സ്വരങ്ങളും തഴുകി വരുന്നൊരു ഗാനം’ സംഗീത പ്രേമികളുടെ നാവിൽ ഇന്നും ഈ ഈണം നിറയുന്നുണ്ടാവും. ആ ഗാനരംഗത്തിലുടനീളം വിടർന്ന കണ്ണുകളുമായി നിന്ന താരത്തെ ആരും മറക്കാനിടയില്ല. ഒരുകാലത്ത് മലയാള സിനിമയിൽ സജീവമായിരുന്ന ഈ നായിക, മലയാളി പോയിട്ട് തെന്നിന്ത്യക്കാരി പോലുമില്ലായിരുന്നു എന്ന സത്യം പലരും അറിഞ്ഞിട്ടുണ്ടാവില്ല. കത്തിനിൽക്കേ, തന്റെ ഇന്നിംഗ്സ് അവസാനിപ്പിച്ചു പോയ സ്വപ്ന എവിടെ എന്ന ചോദ്യത്തിന് ഇതാ മറുപടി
പഞ്ചാബില് നിന്നും ചെന്നെയിലേക്ക് കുടിയേറിയ കുടുംബമാണ് സ്വപ്നയുടേത്. ഒരു ദിവസം ഷോപ്പിങ് മാളില് കൂട്ടുകാരികള്ക്കൊപ്പം ചുറ്റിക്കറങ്ങിയ സ്വപ്നയെ സംവിധായകന് ദാസരി നാരായണ റാവു കാണാനിടയായി. മഞ്ചരി ധോടി എന്നായിരുന്നു അവരുടെ യഥാര്ത്ഥ പേര് . സ്വപ്ന, കന്നഡ ചലച്ചിത്ര മേഖലയിലൂടെയാണ് സിനിമയിൽ വരുന്നത്. എന്നാൽ, കരിയർ ബ്രേക്ക് ലഭിച്ചതാവട്ടെ, മലയാളത്തിലും. പി.ജി. വിശ്വംഭരന്റെ ‘സംഘർഷം’ എന്ന ചിത്രത്തിൽ രതീഷിന്റെ നായികയായി സ്വപ്ന ബിഗ് സ്ക്രീനിലെത്തി. ‘സ്വപ്ന’ എന്ന് പേരുള്ള തെലുങ്ക്-കന്നഡ ചിത്രത്തിലും അവർ നായികയായി
വിജയകാന്തിന്റെ ‘നെഞ്ചിലെ തുനിവിരുന്താൽ’, ‘ജാതിക്കൊരു നീതി’ കമൽ ഹാസന്റെ ‘കടൽ മീൻങ്കൾ’, ‘ടിക് ടിക്’ തുടങ്ങിയ ചിത്രങ്ങളിലും അവർ അഭിനയിച്ചു. ‘തൃഷ്ണ’ എന്ന ഐ.വി. ശശി, മമ്മൂട്ടി ചിത്രത്തിലും സ്വപ്ന നായികയായി. അന്നാളുകളിൽ ഒരു ലൈംഗിക തൊഴിലാളിയുടെ വേഷം ഏറ്റെടുത്തു ചെയ്യാൻ സ്വപ്ന തയാറായി. ഗ്ലാമറസ് വേഷങ്ങൾ ചെയ്യുന്നതിൽ അവർ തെല്ലും മടിച്ചില്ല. ‘ചിരിയോ ചിരി’, ‘ഒരു തിര പിന്നെയും തിര’ പോലുള്ള സിനിമകൾ സ്വപ്നയുടെ നേട്ടങ്ങളായി.
1990 ല് റിലീസ് ചെയ്ത പ്രിയദര്ശന്റെ ‘കടത്തനാടന് അമ്പാടി’യാണ് സ്വപ്ന അവസാനമായി മലയാളത്തില് ചെയ്തത്. ആ സിനിമയാകട്ടെ ബോക്സാഫിസില് തകര്ന്നടിഞ്ഞു. പിന്നീട് സ്വപ്ന മെല്ലെ സിനിമാ സ്വപ്നങ്ങള്ക്ക് വിട പറഞ്ഞ് കുടുംബജീവിതത്തിലേക്ക് പ്രവേശിച്ചു.1993 ല് രാമന് ഖന്നയെ വിവാഹം കഴിച്ച് ഹോട്ടല് ബിസിനസും ഇവന്റ് മാനേജ്മെന്റ് കമ്പനിയും മറ്റുമായി തിരക്കുകളുടെ നടുവില് അവര് സിനിമയെ പൂര്ണമായും മറന്നു. ഒരിക്കല് താനൊരു നടിയാണെന്ന് പോലും അവര് ഓര്മിക്കുന്നത് യുട്യൂബിലോ മറ്റോ പഴയ പടങ്ങള് കാണുമ്പോഴാണ്.
വിദേശത്ത് ഇന്ത്യന് ക്ലാസിക്കല് നൃത്ത പരിപാടികള് സംഘടിപ്പിക്കുന്ന സംഗിണി എന്റര്ടൈന്മെന്റ എന്ന കമ്പനിയുടെ അമരക്കാരിയാണ് സ്വപ്ന ഇന്ന്. ലോകമെമ്പാടും ഈ കമ്പനി ഷോസ് അവതരിപ്പിക്കുന്നു. ഡ്രീം ഗേള്സ് ഓഫ് ബോളിവുഡ് ഉള്പ്പെടെയുളള പ്രശസ്തമായ പല ഷോസും രൂപകല്പ്പന ചെയ്യുന്നത് സ്വപ്നയുടെയും രാമന് ഖന്നയുടെയും നേതൃത്വത്തിലുളള കമ്പനിയാണ്. മുംബൈയിലെ കര്ജാത്തില് ദ് ബ്രുക്ക് അറ്റ് ഖന്നാസ് എന്ന റിസോര്ട്ട് ബിസിനസും ഈ ദമ്പതികള്ക്കുണ്ട്.
