ന്യൂദല്ഹി: നൂറ് മില്ലിഗ്രാമില് കൂടുതലുള്ള എല്ലാ വേദനസംഹാരികള്ക്കും നിരോധനം ഏര്പ്പെടുത്തി കേന്ദ്ര ആരോഗ്യ മന്ത്രാലയം. വേദനയില് ഉടന് ആശ്വാസം നല്കുന്ന നിമെസുലൈഡുകളുടെ (വേദനസംഹാരി) നിര്മാണവും വില്പനയും കേന്ദ്രം നിരോധിച്ചു.
ഈ മരുന്നുകള് കരളിനും വ്യക്കകള്ക്കും ഗുരുതരമായ തകരാറുകള് ഉണ്ടാക്കുന്ന സാഹചര്യത്തിലാണ് നടപടി. 1940ലെ ഡ്രഗ്സ് ആന്ഡ് കോസ്മെറ്റിക്സ് ആക്ടിലെ സെക്ഷന് 26എ പ്രകാരമാണ് നിരോധനം. സാധാരണയായി പനി കുറയാന് നിമെസുലൈഡ് ഫലപ്രദമാണെങ്കിലും, ഉയര്ന്ന അളവില് ഉപയോഗിക്കുന്നത്, പ്രത്യേകിച്ച് പ്രായമായവരിലും ആരോഗ്യപ്രശ്നങ്ങള് ഉള്ളവരിലും ഗുരുതരമായ കരള് തകരാറിന് (ഹെപ്പറ്റോടോക്സിസിറ്റി) കാരണമാകുമെന്ന ഇന്ത്യന് കൗണ്സില് ഓഫ് മെഡിക്കല് റിസര്ച്ചിന്റെ നിര്ണായക റിപ്പോര്ട്ടിനെ തുടര്ന്നാണ് നിരോധനം. മനുഷ്യന്റെ ആരോഗ്യത്തിനപ്പുറം, മൃഗങ്ങളെയും നിമെസുലൈഡുകള് ബാധിക്കുമെന്ന് ഇന്ത്യന് വെറ്ററിനറി റിസര്ച്ച് ഇന്സ്റ്റിറ്റ്യൂട്ട് കഴിഞ്ഞ വര്ഷം കണ്ടെത്തിയിരുന്നു. കന്നുകാലികളിലും മറ്റും ഈ മരുന്നുകള് ഉപയോഗിക്കാറുണ്ട്. ഇത് കന്നുകാലികളെ ഭക്ഷിക്കുന്ന കഴുകന് പോലുള്ള ജീവികള്ക്കും അപകടമാണെന്ന് കണ്ടെത്തി.
ഈ മരുന്ന് ഉപയോഗിച്ച് ചികിത്സിക്കുന്ന കന്നുകാലികളെ കഴുകന്മാര് വേട്ടയാടുമ്പോള്, അവയ്ക്ക് വേഗത്തില് വൃക്ക തകരാറിലാവുകയും 24 മണിക്കൂറിനുള്ളില് ചത്തുപോകുകയും ചെയ്യുന്നു. രാജ്യത്തെ കഴുകന്മാരുടെ എണ്ണത്തെ ഇത് ബാധിക്കും. നൈസ്, നിസിപ്, നിമുലിഡ് തുടങ്ങിയ സാധാരണ ബ്രാന്ഡുകള് ഇനി 100 മില്ലിഗ്രാം വീര്യത്തില് മാത്രമേ ലഭ്യമാകൂ. കുട്ടികള്ക്കും ഗര്ഭിണികള്ക്കും നിമെസുലൈഡ് ഉപയോഗിക്കുന്നത് ഒഴിവാക്കാനും ആരോഗ്യ മന്ത്രാലയം നിര്ദേശിച്ചു.
