തിരുവനന്തപുരം: നഗരസഭാ പരിധിയില്‍ സര്‍വീസ് നടത്തുന്നതിന് വാങ്ങിയ ഇ ബസുകളുമായി ബന്ധപ്പെട്ട് ഗതാഗതമന്ത്രി ബി. ഗണേഷ്‌കുമാറിന്റെ വാദം പൊളിയുന്നു. ഇ ബസുകള്‍ സര്‍വീസ് നടത്തുന്നത് സംബന്ധിച്ച് സ്മാര്‍ട്ട് സിറ്റിയും കെഎസ്ആര്‍ടിസിയും നഗരസഭയും തമ്മില്‍ 2023 ഫെബ്രുവരി 23ന് കരാറില്‍ ഒപ്പുവച്ചിട്ടുണ്ട്. ഇതനുസരിച്ച് തിരക്കുള്ള സമയത്ത് നഗരത്തില്‍ മാത്രവും അല്ലാത്ത സമയങ്ങളില്‍ നഗരത്തിന് തൊട്ടടുത്തുള്ള ഗ്രാമത്തിലും വരെ സര്‍വീസ് നടത്താം. ലാഭ വിഹിതം പങ്ക് വയ്‌ക്കുന്നത് സംബന്ധിച്ചും കരാറില്‍ പറയുന്നു.
ഇതെല്ലാം കെഎസ്ആര്‍ടിസി ലംഘിച്ചിരിക്കുകയാണ്. വ്യവസ്ഥകള്‍ എല്ലാം മറച്ചുവച്ചാണ് മന്ത്രി മാധ്യമങ്ങള്‍ക്കു മുമ്പില്‍ പ്രതികരിച്ചത്. എല്ലാം സര്‍ക്കാരിന്റെ പണമാണെന്ന് പറയുന്ന മന്ത്രി കാരാറിലെ വ്യവസ്ഥ സംബന്ധിച്ച് ഒന്നും പറയുന്നില്ല. നഗരസഭ രേഖാമൂലം ആവശ്യപ്പെട്ടാല്‍ 24 മണിക്കൂറിനകം 113 ബസുകളും തിരികെ നല്‍കാമെന്നും 150 ബസുകള്‍ ഉടന്‍ വാങ്ങുമെന്നും മന്ത്രി പറയുന്നു. മകരവിളക്കുമായി ബന്ധപ്പെട്ട് എരുമേലി, നിലയ്‌ക്കല്‍, പമ്പ റൂട്ടില്‍ പോലും സര്‍വീസ് നടത്താന്‍ മതിയായ ബസില്ല. ഈ സാഹചര്യത്തിലാണ് മന്ത്രിയുടെ വീമ്പിളക്കല്‍. മുന്‍ മേയര്‍ ആര്യാ രാജേന്ദ്രന്റെ ഭരണ സമയത്താണ് കരാറില്‍ ഏര്‍പ്പെട്ടത്. കെഎസ്ആര്‍ടിസി കരാര്‍ ലംഘിക്കുകയാണെന്ന് ആര്യാ രാജേന്ദ്രനും വ്യക്തമാക്കിയിട്ടുണ്ട്. ഇതോടെ ബസ് വിവാദത്തില്‍ മേയര്‍ക്കെതിരെ രംഗത്തുവന്ന സിപിഎം നേതാക്കളും വെട്ടിലായി.
