ന്യൂദല്‍ഹി: ഡോളറിന് 87രൂപ എന്ന നിരക്കിലേക്ക് 2026ല്‍ ഇന്ത്യന്‍ രൂപയുടെ മൂല്യം ഉയരുമെന്ന് ഫിച്ച് റേറ്റിംഗ്സ്. അന്താരാഷ്‌ട്ര പ്രശസ്തമായ റേറ്റിംഗ് ഏജന്‍സിയാണ് ഫിച്ച് റേറ്റിംഗ് സ്. ഇന്ത്യയുടെ ജിഡിപി വളര്‍ച്ച 7.4 ശതമാനമായി ഉയരുമെന്നും കറന്‍സിയുടെ മൂല്യത്തിലെ ദൗര്‍ബല്യം കയറ്റുമതിയുടെ കുതിപ്പിന് കാരണമാകുമെന്നും ഫിച്ച് റേറ്റിംഗ്സ് പ്രവചിക്കുന്നു.
ഇന്ത്യയുടെ കമ്മി ഇപ്പോള്‍ ജിഡിപിയുടെ 1.5 ശതമാനം മാത്രമേയുള്ളൂ. നേരിട്ടുള്ള വിദേശനിക്ഷേപമാകട്ടെ പല മേഖലയിലും കുതിക്കുന്നുണ്ട്. ഇനി ഇന്ത്യയുടെ മേലുള്ള വ്യാപാരത്തീരുവ വെട്ടിക്കുറച്ചുകൊണ്ട് ട്രംപ് ഇന്ത്യയുമായി ഒരു വ്യാപാരക്കരാര്‍ ഒപ്പുവെയ്‌ക്കുന്നതോടെ ഇന്ത്യയുടെ സമ്പദ്ഘടന കുതിയ്‌ക്കുമെന്ന പ്രതീക്ഷയും അന്തരീക്ഷത്തിലുണ്ട്.
അതിനിടെ രൂപയുടെ മൂല്യം സുസ്ഥിരമാക്കാന്‍ ചില നടപടികളുമായി റിസര്‍വ്വ് ബാങ്ക് മുന്നോട്ട് വരുന്നുണ്ട്. അതില്‍ ഒന്ന് റിസര്‍വ്വ് ബാങ്കിന്റെ കരുതല്‍ ധനത്തില്‍ നിന്നും ഡോളര്‍ വിറ്റഴിച്ച് രൂപയുടെ മൂല്യം ഉയര്‍ത്താനുള്ള നടപടിയാണ്. കഴിഞ്ഞ ദിവസം വന്‍തോതില്‍ ഡോളറുകള്‍ വിറ്റഴിച്ചതിനെ തുടര്‍ന്ന് രൂപയുടെ മൂല്യം ഉയര്‍ത്താന്‍ റിസര്‍വ്വ് ബാങ്കിന് കഴിഞ്ഞിരുന്നു. ഇത് ഭാവിയിലും തുടരും.
ആയിരം കോടിയുടെ ഡോളര്‍-റുപി സ്വാപും ഒരിയ്‌ക്കല്‍ കൂടി നടത്താന്‍ പോവുകയാണ്. 2026 ജനവരിയില്‍ ഈ ഡോളര്‍ സ്വാപ് നടക്കും. ഇതുവഴി റിസര്‍വ്വ് ബാങ്ക് ഇന്ത്യയിലെ ബാങ്കുകളുടെ കൈവശമുള്ള ഡോളറുകള്‍ വാങ്ങിക്കൂട്ടും. പകരം ബാങ്കുകള്‍ക്ക് ഇന്ത്യന്‍ രൂപ നല്‍കും. ഇതോടെ രൂപയുടെ ക്ഷാമം പരിഹരിക്കപ്പെടുന്നതോടെ രൂപയുടെ മൂല്യവും സുസ്ഥിരമാകും.
