അസിം മുനീറിന് സൗദി അറേബ്യയുടെ പരമോന്നത ബഹുമതി ; എന്തുകൊണ്ടാണ് സൽമാൻ രാജകുമാരൻ പാകിസ്ഥാൻ സൈന്യത്തെ പ്രീണിപ്പിക്കുന്നത് ?

റിയാദ് : പാകിസ്ഥാൻ സർവ്വ സൈനിക മേധാവിയായ അസിം മുനീറിന് സൗദി അറേബ്യൻ സർക്കാർ കിംഗ് അബ്ദുൽ അസീസ് മെഡൽ സമ്മാനിച്ചു. സൗദി പ്രതിരോധ മന്ത്രി ഖാലിദ് ബിൻ സൽമാൻ രാജകുമാരൻ റിയാദിൽ മുനീറിന് ഈ അവാർഡ് സമ്മാനിച്ചു. സൗദി അറേബ്യയുടെ പരമോന്നത ദേശീയ ബഹുമതിയാണിത്. സമീപ മാസങ്ങളിൽ പാകിസ്ഥാനും സൗദി അറേബ്യയും തമ്മിലുള്ള ബന്ധം മെച്ചപ്പെട്ടതിനെ പ്രതിഫലിപ്പിക്കുന്നതാണ് മുനീറിന്റെ അവാർഡ്.

നേരത്തെ പരസ്പരം സംരക്ഷിക്കുമെന്ന് വാഗ്ദാനം ചെയ്യുന്ന ഒരു കരാറിൽ ഇരു രാജ്യങ്ങളും ഈ വർഷം ഒപ്പുവച്ചിരുന്നു. എന്തെങ്കിലും സംഘർഷമുണ്ടായാൽ പാകിസ്ഥാൻ സൈന്യത്തിന് അവരുടെ പേരിൽ പോരാടാൻ കഴിയുന്ന തരത്തിൽ പാകിസ്ഥാൻ സൈന്യവുമായി അടുത്ത ബന്ധം വളർത്തിയെടുക്കാനുള്ള സൗദി അറേബ്യയുടെ ശ്രമമായാണ് ഇതിനെ കാണുന്നത്.

അതേ സമയം സൗദി അറേബ്യയുടെ പ്രതിരോധ മന്ത്രിയായ ഖാലിദ് രാജകുമാരൻ തന്റെയും അസിം മുനീറിന്റെയും ഫോട്ടോകൾ ഇൻസ്റ്റാഗ്രാമിൽ പങ്കിട്ടു. “പരസ്പര സഹകരണം പ്രോത്സാഹിപ്പിക്കുന്നതിലും സൗദി-പാകിസ്ഥാൻ ബന്ധം മെച്ചപ്പെടുത്തുന്നതിലും അദ്ദേഹം നടത്തിയ മികച്ച ശ്രമങ്ങൾക്ക് ഞാൻ അസിം മുനീറിനെ കിംഗ് അബ്ദുൽ അസീസ് മെഡൽ ഓഫ് എക്സലന്റ് ക്ലാസ് നൽകി ആദരിച്ചു. ഞങ്ങളുടെ കൂടിക്കാഴ്ചയിൽ, അന്താരാഷ്‌ട്ര സമാധാനവും സുരക്ഷയും പ്രോത്സാഹിപ്പിക്കുന്നതിനുള്ള ഞങ്ങളുടെ ശ്രമങ്ങളെക്കുറിച്ചും പരസ്പര താൽപ്പര്യമുള്ള വിഷയങ്ങളെക്കുറിച്ചും ഞാൻ അദ്ദേഹവുമായി ചർച്ച ചെയ്തു.” – ഖാലിദ് ഇൻസ്റ്റഗ്രാമിൽ എഴുതി.

സൗദിയോട് നന്ദി പറഞ്ഞ് മുനീർ

സൗദി പ്രതിരോധ മന്ത്രി പ്രിൻസ് ഖാലിദ് ബിൻ സൽമാനുമായി പ്രാദേശിക സുരക്ഷാ സാഹചര്യം, പ്രതിരോധ, സൈനിക സഹകരണം, തന്ത്രപരമായ സഹകരണം, ഉയർന്നുവരുന്ന ഭൗമരാഷ്‌ട്രീയ വെല്ലുവിളികൾ എന്നിവയെക്കുറിച്ച് അസിം മുനീർ ചർച്ച ചെയ്തതായി പാകിസ്ഥാൻ സൈന്യം പുറത്തിറക്കിയ പ്രസ്താവനയിൽ പറയുന്നു. പാകിസ്ഥാനും സൗദി അറേബ്യയും തമ്മിലുള്ള ബന്ധം കൂടുതൽ മെച്ചപ്പെടുത്തേണ്ടതിന്റെ ആവശ്യകത ഇരുപക്ഷവും ഊന്നിപ്പറഞ്ഞു.

ഇതിനു പുറമെ സൗദി അറേബ്യയുടെ പരമോന്നത ബഹുമതി ലഭിച്ചതിൽ അസിം മുനീർ അഭിമാനം പ്രകടിപ്പിച്ചു. പാകിസ്ഥാനും സൗദി അറേബ്യയും തമ്മിലുള്ള നിലനിൽക്കുന്ന ബന്ധത്തിന്റെ പ്രതീകമായാണ് അവാർഡിനെ അദ്ദേഹം വിശേഷിപ്പിച്ചത്.

സൗദി-പാകിസ്ഥാൻ ബന്ധം

ഈ വർഷം സെപ്റ്റംബറിൽ പാകിസ്ഥാനും സൗദി അറേബ്യയും ഒരു സുപ്രധാന കരാറിലെത്തിയിരുന്നു. നാറ്റോ ശൈലിയിലുള്ള ഈ പ്രതിരോധ ഉടമ്പടി ഒരു രാജ്യത്തിനു നേരെയുള്ള ഒരു ബാഹ്യ ആക്രമണം ഇരു രാജ്യങ്ങൾക്കുമെതിരെയുള്ള ആക്രമണമായിട്ടാണ് അംഗീകരിക്കുന്നത്. അതായത് ഒരു രാജ്യം സൗദി അറേബ്യയെ ആക്രമിച്ചാൽ പാകിസ്ഥാൻ സൈന്യം അവരുടെ പ്രതിരോധത്തിന് എത്തണമെന്ന് കരാർ അനുശാസിക്കുന്നു.

അതേ സമയം സൗദി അറേബ്യ അസിം മുനീറിന് പരമോന്നത ബഹുമതി നൽകിയത് ഭാവിയിൽ ഇരു രാജ്യങ്ങളും തമ്മിൽ കൂടുതൽ പ്രതിരോധ ഏകോപനം ഉണ്ടാക്കാനുള്ള സാധ്യതതെയാണ് സൂചിപ്പിക്കുന്നത്.