ന്യൂദല്‍ഹി: പരമ്പരാഗത വൈദ്യശാസ്ത്രം ഒരു നിര്‍ണായക വഴിത്തിരിവിലെന്ന് പ്രധാനമന്ത്രി നരേന്ദ്ര മോദി. ലോകാരോഗ്യ സംഘടന ആയുഷ് മന്ത്രാലയവുമായി സഹകരിച്ച് ഭാരത മണ്ഡപത്തില്‍ സംഘടിപ്പിച്ച രണ്ടാമത് പരമ്പരാഗത വൈദ്യശാസ്ത്ര ആഗോള ഉച്ചകോടിയുടെ സമാപന സമ്മേളനത്തില്‍ സംസാരിക്കുകയായിരുന്നു പ്രധാനമന്ത്രി.
ലോക ജനസംഖ്യയുടെ വലിയൊരുഭാഗം വളരെക്കാലമായി പരമ്പരാഗത വൈദ്യശാസ്ത്രത്തെ ആശ്രയിക്കുന്നു. എന്നാല്‍ അപാരമായ സാധ്യതകള്‍ ഉണ്ടായിരുന്നിട്ടും അതിന് അര്‍ഹമായ സ്ഥാനം ലഭിച്ചിട്ടില്ല. ശാസ്ത്രത്തിലൂടെ വിശ്വാസം നേടണം. അതിന്റെ വ്യാപ്തി വര്‍ദ്ധിപ്പിക്കണം. ഈ ഉത്തരവാദിത്തം ഏതെങ്കിലും ഒരു രാഷ്‌ട്രത്തിന്റേതല്ല, എല്ലാവരുടേതുമാണെന്നും അദ്ദേഹം പറഞ്ഞു.
ലോകാരോഗ്യ സംഘടനയുടെ ദക്ഷിണ പൂര്‍വ ഏഷ്യന്‍ മേഖലാ ഓഫീസ് സമുച്ചയം പ്രധാനമന്ത്രി ഉദ്ഘാടനം ചെയ്തു. ആയുര്‍വേദം, യോഗ, യുനാനി, സിദ്ധ, ഹോമിയോപ്പതി എന്നിവയുമായി ബന്ധപ്പെട്ട എല്ലാ സേവനങ്ങളും ലഭ്യമാക്കുന്ന മൈ ആയുഷ് ഇന്റഗ്രേറ്റഡ് സര്‍വീസസ് പോര്‍ട്ടല്‍ പ്രധാനമന്ത്രി ഉദ്ഘാടനം ചെയ്തു. ആയുഷ് ഉത്പന്നങ്ങളുടെയും സേവനങ്ങളുടെയും ഗുണനിലവാരത്തിനായുള്ള ആഗോള മാനദണ്ഡമായി വിഭാവനം ചെയ്ത ആയുഷ് മാര്‍ക്ക് പ്രധാനമന്ത്രി അനാച്ഛാദനം ചെയ്തു. യോഗ പരിശീലനത്തെക്കുറിച്ചുള്ള ലോകാരോഗ്യ സംഘടനയുടെ സാങ്കേതിക റിപ്പോര്‍ട്ടും പുസ്തകവും അശ്വഗന്ധയെക്കുറിച്ചുള്ള തപാല്‍ സ്റ്റാമ്പും പ്രധാനമന്ത്രി പ്രകാശനം ചെയ്തു. 2021- 2025 വര്‍ഷങ്ങളിലെ യോഗയുടെ പ്രോത്സാഹനത്തിനും വികസനത്തിനും നല്‍കിയ മികച്ച സംഭാവനകള്‍ക്കുള്ള പുരസ്‌കാരങ്ങള്‍ നേടിയവരെ പ്രധാനമന്ത്രി ആദരിച്ചു.
ലോകാരോഗ്യ സംഘടന ഡയറക്ടര്‍ ജനറല്‍ ഡോ. ടെഡ്രോസ് അദാനോം ഗെബ്രിയേസസ്, കേന്ദ്രമന്ത്രിമാരായ ജെ.പി. നഡ്ഡ, പ്രതാപറാവു ജാദവ്, മറ്റ് പ്രമുഖര്‍ ചടങ്ങില്‍ പങ്കെടുത്തു. ലോകാരോഗ്യ സംഘടനയും ഭാരതവുമായുള്ള പങ്കാളിത്തത്തിലെ ഒരു സുപ്രധാന നാഴികക്കല്ലാണ് തലസ്ഥാനത്തെ പുതിയ ഡബ്ല്യുഎച്ച്ഒ ദക്ഷിണ പൂര്‍വ ഏഷ്യന്‍ മേഖലാ ഓഫീസ് സമുച്ചയം. ഡബ്ല്യുഎച്ച്ഒ ഇന്ത്യ കണ്‍ട്രി ഓഫീസും ഇവിടെ പ്രവര്‍ത്തിക്കും.
