അഹമ്മദാബാദ്: ദക്ഷിണാഫ്രിക്കയ്‌ക്കെതിരായ ടി20 പരമ്പര ഇന്ത്യക്ക് . വെളളിയാഴ്ച അഹമ്മദാബാദില്‍ നടന്ന അഞ്ചാം മത്സരത്തില്‍ 30 റണ്‍സിനാണ് ഇന്ത്യ വിജയിച്ചത്. പരമ്പര 3-1ന് സ്വന്തമാക്കി.
പരമ്പരയിലെ ആദ്യ മത്സരത്തിലും മൂന്നാം മത്സരത്തിലും ഇന്ത്യ വിജയിച്ചിരുന്നു. രണ്ടാം മത്സരത്തില്‍ ദക്ഷിണാഫ്രിക്ക വിജയിച്ചു.നാലാം മത്സരം കനത്ത മഞ്ഞുവീഴ്ച മൂലം ഉപേക്ഷിച്ചു.
ഇന്ന് ആദ്യം ബാറ്റ് ചെയ്ത ഇന്ത്യ 20 ഓവറില്‍ അഞ്ച് വിക്കറ്റ് നഷ്ടത്തിലാണ് 231 റണ്‍സ് എടുത്തത്. ദക്ഷിണാഫ്രിക്കയ്‌ക്ക് എട്ട് വിക്കറ്റ് നഷ്ടത്തില്‍ 201 റണ്‍സ് എടുക്കാനെ സാധിച്ചുള്ളു. 65 റണ്‍സെടുത്ത ക്വിന്റണ്‍ ഡി കോക്കും 31 റണ്‍സെടുത്ത ഡിവാള്‍ഡ് ബ്രെവിസും നന്നായി ബാറ്റ് ചെയ്‌തെങ്കിലും ടിമീനെ വിജയത്തിലെത്തിക്കാനായില്ല.
ഒരു വിക്കറ്റ് നഷ്ടത്തില്‍ 120 എന്ന നിലയില്‍ നിന്ന് എട്ട് വിക്കറ്റ് നഷ്ടത്തില്‍ 177 എന്ന നിലയിലേയ്‌ക്ക് ദക്ഷിണാഫ്രിക്ക തകര്‍ന്നടിയുകയായിരുന്നു. ഇന്ത്യയ്‌ക്കായി വരുണ്‍ ചക്രവര്‍ത്തി നാല് വിക്കറ്റ് എടുത്തു. ജസ്പ്രീത് ബുംറ രണ്ട് വിക്കറ്റും അര്‍ഷ്ദീപ് സിംഗും ഹാര്‍ദിക് പാണ്ഡ്യയും ഓരോ വിക്കറ്റ് വീതവും വീഴ്‌ത്തി.
42 പന്തില്‍ 10 ബൗണ്ടറിയും ഒരു സിക്‌സും അടക്കം 73 റണ്‍സെടുത്ത തിലക് വര്‍മയാണ് ഇന്ത്യയുടെ ടോപ്‌സ്‌കോറര്‍.ഹാര്‍ദിക് പാണ്ഡ്യ 25 പന്തില്‍ 63 റണ്‍സാണ് എടുത്തത്. അഞ്ച് ബൗണ്ടറിയും അഞ്ച് സിക്‌സും ഹാര്‍ദിക്ക് അടിച്ചു പറത്തി.
സഞ്ജു സാംസണ്‍ 37 റണ്‍സും അഭിഷേക് 34 റണ്‍സും എടുത്തു. ദക്ഷിണാഫ്രിക്കയ്‌ക്ക് വേണ്ടി കൊര്‍ബിന്‍ ബോഷ് രണ്ട് വിക്കറ്റ് വീഴ്‌ത്തി. ജോര്‍ജ് ലിന്‍ഡെയും ഒറ്റ്‌നെയ്ല്‍ ബാര്‍ട്ട്മാനും ഓരോ വിക്കറ്റ് വീതമെടുത്തു.
ഹാര്‍ദിക്ക് പാണ്ഡ്യ ആണ് മത്സരത്തിലെ താരം. വരുണ്‍ ചക്രവര്‍ത്തിയാണ് പരമ്പരയിലെ താരം.
