ന്യൂദൽഹി: എത്യോപ്യൻ പാർലമെന്റിൽ പ്രസംഗിച്ച് പ്രധാനമന്ത്രി നരേന്ദ്ര മോദി. അദ്ദേഹത്തിന്റെ പ്രസംഗത്തെ കരഘോഷത്തോടെയാണ് ഏവരും സ്വീകരിച്ചത്. എത്യോപ്യയുടെ പരമോന്നത ബഹുമതിയായ നിഷാൻ നൽകി ആദരിക്കപ്പെട്ടതിൽ തനിക്ക് അഭിമാനമുണ്ട് എന്ന് പ്രധാനമന്ത്രി പറഞ്ഞു. ഇന്ത്യൻ ജനതയ്‌ക്ക് വേണ്ടി കൂപ്പുകൈകളോടെയും വിനയത്തോടെയും ഞാൻ ഈ അവാർഡ് സ്വീകരിക്കുന്നുവെന്നും അദ്ദേഹം പറഞ്ഞു.
കൂടാതെ ഇന്ത്യയും എത്യോപ്യയും ഊഷ്മളമായ കാലാവസ്ഥയും ആത്മാവും പങ്കിടുന്നുണ്ടെന്ന് പ്രധാനമന്ത്രി പറഞ്ഞു. ഏകദേശം 2,000 വർഷങ്ങൾക്ക് മുമ്പ് നമ്മുടെ പൂർവ്വികർ കടലുകൾക്കപ്പുറത്ത് ബന്ധം സ്ഥാപിച്ചു. ഇന്ത്യൻ മഹാസമുദ്രത്തിലൂടെ വ്യാപാരികൾ സുഗന്ധദ്രവ്യങ്ങളും സ്വർണ്ണവുമായി സഞ്ചരിച്ചു, പക്ഷേ അവർ സാധനങ്ങൾ മാത്രമല്ല വ്യാപാരം ചെയ്തത് മറിച്ച് അവർ ആശയങ്ങളും ജീവിതശൈലികളും കൈമാറിയെന്നും മോദി ഓർമ്മപ്പെടുത്തി.
ഇതിനു പുറമെ അഡിസ്, ധോലേര തുടങ്ങിയ തുറമുഖങ്ങൾ വെറും വ്യാപാര കേന്ദ്രങ്ങൾ മാത്രമായിരുന്നില്ല മറിച്ച് നാഗരികതകൾക്കിടയിലുള്ള പാലങ്ങളായിരുന്നു. ഈ ആധുനിക കാലത്ത് നമ്മുടെ ബന്ധം ഒരു പുതിയ യുഗത്തിലേക്ക് കടക്കുകയാണ്. 1941-ൽ എത്യോപ്യയുടെ സ്വാതന്ത്ര്യത്തിനായി ഇന്ത്യൻ സൈനികർ എത്യോപ്യക്കാർക്കൊപ്പം പോരാടിയെന്നും പ്രധാനമന്ത്രി പറഞ്ഞു.
കൂടാതെ ഇന്ത്യയുടെ ദേശീയ ഗാനമായ വന്ദേമാതരവും എത്യോപ്യയുടെ ദേശീയ ഗാനവും നമ്മുടെ ഭൂമിയെ ‘അമ്മ’ എന്ന് വിളിക്കുന്നുവെന്ന് പ്രധാനമന്ത്രി പറഞ്ഞു. നമ്മുടെ പൈതൃകം, സംസ്കാരം, സൗന്ദര്യം എന്നിവയിൽ അഭിമാനിക്കാനും നമ്മുടെ മാതൃരാജ്യത്തെ സംരക്ഷിക്കാനും അവ നമ്മെ പ്രചോദിപ്പിക്കുന്നുവെന്നും അദ്ദേഹം വ്യക്തമാക്കി.
ഇതിനു പുറമെ ഈ മനോഹരമായ കെട്ടിടത്തിൽ നിങ്ങളുടെ നിയമങ്ങൾ നിർമ്മിക്കപ്പെടുന്നു, ഇവിടെ ജനങ്ങളുടെ ഇഷ്ടം രാജ്യത്തിന്റെ ഇഷ്ടമായി മാറുന്നു, രാജ്യത്തിന്റെ ഇഷ്ടം ജനങ്ങളുടെ ഇഷ്ടവുമായി പൊരുത്തപ്പെടുമ്പോൾ പദ്ധതികളുടെ ചക്രങ്ങൾ മുന്നോട്ട് നീങ്ങുന്നുവെന്ന് അദ്ദേഹം പറഞ്ഞു. നിങ്ങളിലൂടെ വയലുകളിൽ പണിയെടുക്കുന്ന രാജ്യത്തെ കർഷകരോടും, പുതിയ ആശയങ്ങൾ സൃഷ്ടിക്കുന്ന സംരംഭകരോടും, സമൂഹങ്ങൾക്ക് നേതൃത്വം നൽകുന്ന സ്ത്രീകളോടും, ഭാവി രൂപപ്പെടുത്തുന്ന എത്യോപ്യയിലെ യുവാക്കളോടും താൻ സംസാരിക്കുകയാണെന്നും അദ്ദേഹം പാർലമെൻ്റ് അംഗങ്ങളോടായി പറഞ്ഞു.
