ന്യൂദല്‍ഹി: സിഡ്‌നിയിലെ ബോണ്ടി ബീച്ചിലുണ്ടായ കൂട്ട വെടിവെപ്പിനെ പ്രധാനമന്ത്രി നരേന്ദ്ര മോദി അപലപിച്ചു. ‘ഹനുക്ക എന്ന ജൂത ഉത്സവത്തിന്റെ ആദ്യ ദിനം ആഘോഷിക്കുന്ന ആളുകളെ ലക്ഷ്യമിട്ട് ഓസ്ട്രേലിയയിലെ ബോണ്ടി ബീച്ചില്‍ നടന്ന ഭീകരാക്രമണത്തെ ശക്തമായി അപലപിക്കുന്നു,’ പ്രധാനമന്ത്രി പറഞ്ഞു.
‘ഭാരതത്തിലെ ജനങ്ങളുടെ പേരില്‍, പ്രിയപ്പെട്ടവരെ നഷ്ടപ്പെട്ട കുടുംബങ്ങള്‍ക്ക് എന്റെ ആത്മാര്‍ത്ഥമായ അനുശോചനം അറിയിക്കുന്നു. ദുഃഖത്തിന്റെ ഈ വേളയില്‍ ഓസ്ട്രേലിയയിലെ ജനങ്ങളോടൊപ്പം ഞങ്ങള്‍ ഐക്യദാര്‍ഢ്യം പ്രഖ്യാപിക്കുന്നു. ഭീകരതയോട് ഭാരതം ഒരു തരത്തിലും സഹിഷ്ണുത കാണിക്കുന്നില്ല, ഭീകരവാദത്തിന്റെ എല്ലാ രൂപങ്ങള്‍ക്കും പ്രകടനങ്ങള്‍ക്കുമെതിരായ പോരാട്ടത്തെ പിന്തുണയ്‌ക്കുന്നു’. ഭീകരതയ്‌ക്കെതിരെ സംസാരിച്ചുകൊണ്ട് അദ്ദേഹം സമൂഹമാധ്യമത്തില്‍ കുറിച്ചു.
വിദേശകാര്യ മന്ത്രി എസ്. ജയശങ്കറും ആക്രമണത്തെ അപലപിച്ചു. ‘ഓസ്ട്രേലിയയിലെ ബോണ്ടി ബീച്ചില്‍ ഹനുക്ക ആഘോഷങ്ങള്‍ക്കിടെയുണ്ടായ ഭീകരാക്രമണത്തെ ശക്തമായി അപലപിക്കുന്നു. ഇരകള്‍ക്കും അവരുടെ കുടുംബങ്ങള്‍ക്കും ഒപ്പമാണ് ഞങ്ങളുടെ ചിന്തകള്‍,’ അദ്ദേഹം പറഞ്ഞു.
