ന്യൂദല്‍ഹി: തദ്ദേശസ്വയംഭരണ സ്ഥാപനങ്ങളിലേക്ക് നടന്ന തെരഞ്ഞെടുപ്പില്‍ കേരളത്തില്‍ ബിജെപി – എന്‍ഡിഎ നേടിയ മുന്നേറ്റം ദേശീയതലത്തിലും ചര്‍ച്ചയായി. പ്രധാനമന്ത്രി നരേന്ദ്ര മോദി കേരളത്തിലെ വിജയത്തെ അഭിനന്ദിച്ച് എക്സില്‍ കുറിപ്പ് പങ്കുവെച്ചു. തിരുവനന്തപുരം കോര്‍പറേഷനിലെ വിജയത്തിന് പ്രധാനമന്ത്രി പ്രത്യേകം നന്ദിയും അറിയിച്ചു. വികസിത കേരളം എന്ന ഹാഷ്ടാഗോടെ മലയാളത്തിലും ഇംഗ്ലീഷിലുമായിരുന്നു പ്രധാനമന്ത്രിയുടെയും ബിജെപി ദേശീയ അധ്യക്ഷന്‍ ജെ.പി. നഡ്ഡയുടെയും കുറിപ്പുകള്‍.
തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പില്‍ ബിജെപിക്കും എന്‍ഡിഎയ്‌ക്കും ഒപ്പം നിന്നതിന് കേരളത്തിലെ ജനങ്ങള്‍ക്ക് ഹൃദയം നിറഞ്ഞ നന്ദി അറിയിക്കുന്നതായി ജെ.പി. നഡ്ഡ കുറിച്ചു. ഇത് സംസ്ഥാനത്തുടനീളമുള്ള ഭരണമാറ്റത്തിനായുള്ള ശക്തമായ ആഗ്രഹത്തെ സൂചിപ്പിക്കുന്നു. നരേന്ദ്ര മോദിയുടെ വികസിതകേരളം എന്ന ദര്‍ശനത്തിലുള്ള ജനങ്ങളുടെ വിശ്വാസം വ്യക്തമാണ്. ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖര്‍, എന്‍ഡിഎ കാര്യകര്‍ത്താക്കള്‍ എന്നിവരെ അഭിനന്ദിക്കുന്നതായും അദ്ദേഹം വ്യക്തമാക്കി.
ബിജെപിയെയും എന്‍ഡിഎയെയും വന്‍ വിജയത്തിലേക്ക് നയിച്ചതിന് കേരളത്തിലെ ജനങ്ങള്‍ക്ക് ഹൃദയം നിറഞ്ഞ നന്ദി അറിയിക്കുന്നതായി കേന്ദ്രമന്ത്രി അമിത് ഷാ കുറിച്ചു. തിരുവനന്തപുരത്തിന് ആദ്യമായി ബിജെപി മേയറെ ലഭിക്കും. പ്രധാനമന്ത്രി നരേന്ദ്ര മോദിയെ മാത്രമേ കേരളം വിശ്വസിക്കുന്നുള്ളൂ എന്ന സന്ദേശം വ്യക്തമാണെന്നും അദ്ദേഹം ചൂണ്ടിക്കാട്ടി. കേരള തലസ്ഥാനത്തിന് അഭിമാനത്തിന്റെയും വാഗ്ദാനത്തിന്റെയും നിമിഷമാണെന്ന് കേന്ദ്രമന്ത്രി രാജ്നാഥ് സിങ് എക്സില്‍ കുറിച്ചു. തിരുവനന്തപുരത്ത് ബിജെപിയുടെ അതിശയകരമായ പ്രകടനത്തിലൂടെ ഒരു പുതിയ അധ്യായം ആരംഭിച്ചു. മാറ്റത്തിനും വികസനത്തിനും സദ്ഭരണത്തിനും ഇത് ഹൃദയംഗമമായ അംഗീകാരമാണ്. പ്രവര്‍ത്തകരെയും ജനങ്ങളെയും ബിജെപിയുടെ കേരള നേതൃത്വത്തെയും ഊഷ്മളമായി അഭിനന്ദിക്കുന്നു. തിരുവനന്തപുരത്തെ ജനങ്ങളുടെ വിശ്വാസത്തിനും സ്നേഹത്തിനും നന്ദി അറിയിക്കുന്നുവെന്നും രാജ്നാഥ് സിങ് കൂട്ടിച്ചേര്‍ത്തു.
കേരളത്തിലെ ഓരോ വിജയവും ബലിദാനികള്‍ക്കും ദേശീയവാദിയായതിനാല്‍ ജയിലില്‍ കഴിയേണ്ടി വന്നവര്‍ക്കും സമര്‍പ്പിക്കുന്നതായി ബിജെപി ദേശീയ സംഘടനാ സെക്രട്ടറി ബി.എല്‍. സന്തോഷ് കുറിച്ചു. കേരളമേ, ഈ ചരിത്രപരമായ ജനവിധിക്ക് നന്ദിയെന്ന തലക്കെട്ടോടെയാണ് ബിജെപിയുടെ ദേശീയ ഔദ്യോഗിക എക്സ് അക്കൗണ്ടില്‍ പോസ്റ്റ് പങ്കുവെക്കപ്പെട്ടത്. ദൈവത്തിന്റെ സ്വന്തം നാട്ടില്‍ പരിവര്‍ത്തനാത്മകമായ ഒരു മാറ്റത്തിന് ഈ വിജയം വഴിയൊരുക്കുമെന്നും കുറിപ്പില്‍ പറയുന്നു.
കേരളത്തില്‍ പുതിയ അധ്യായം എന്നാണ് കേന്ദ്രമന്ത്രി നിതിന്‍ ഗഡ്കരി കുറിച്ചത്. ഈ ഹൃദയസ്പര്‍ശിയായ വിജയത്തിന് കഠിനാധ്വാനികളായ പ്രവര്‍ത്തകരെയും ബിജെപി കേരള നേതൃത്വത്തെയും അഭിനന്ദിക്കുന്നു. പ്രധാനമന്ത്രി നരേന്ദ്ര മോദിയുടെ ദീര്‍ഘവീക്ഷണമുള്ള നേതൃത്വത്തില്‍ സദ്ഭരണം നല്‍കാനും എല്ലാവര്‍ക്കും അവസരങ്ങളുള്ള ഒരു വികസിത കേരളം കെട്ടിപ്പടുക്കാനും കഴിവുള്ള ഒരേയൊരു ശക്തിയായി കേരളം എന്‍ഡിഎയെ കാണുന്നതായും അദ്ദേഹം കുറിച്ചു.
തിരുവനന്തപുരം കോര്‍പറേഷനിലെ വിജയം ചരിത്രനിമിഷമെന്നാണ് കേന്ദ്രമന്ത്രി പിയൂഷ് ഗോയല്‍ അഭിപ്രായപ്പെട്ടത്.
