ന്യൂദല്‍ഹി: ജമാഅത്തെ ഇസ്ലാമിയുമായി ഇടത്-വലത് മുന്നണികള്‍ ഉണ്ടാക്കിയ ബന്ധവും രാഷ്‌ട്രീയ ധാരണയും ഇനി കേരളത്തില്‍ മാത്രമല്ല, ഭാരതം മുഴുവനും ചര്‍ച്ച ചെയ്യപ്പെടുമെന്ന് ബിജെപി ദേശീയ നിര്‍വ്വാഹക സമിതി അംഗം പി.കെ. കൃഷ്ണദാസ്. ന്യൂദല്‍ഹിയില്‍ പ്രധാനമന്ത്രി നരേന്ദ്രമോദിയുമായുള്ള കൂടിക്കാഴ്ചയ്‌ക്കുശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. മതരാഷ്‌ട്രവാദത്തിന്റെ ബുദ്ധി കേന്ദ്രമായ ജമാഅത്തെ ഇസ്ലാമിയുമായുള്ള ഇരുമുന്നണികളുടെയും ബന്ധത്തെക്കുറിച്ച് മുഖ്യമന്ത്രിയും പ്രതിപക്ഷനേതാവും തുറന്നു സമ്മതിച്ചിരിക്കുകയാണ്, അദ്ദേഹം പറഞ്ഞു.
രാഹുല്‍ മാങ്കൂട്ടത്തിലിനെതിരായ കേസും ശബരിമലയിലെ സ്വര്‍ണക്കൊള്ളക്കേസും പാതിവഴിയില്‍ നിര്‍ത്തി അന്വേഷണം അവസാനിപ്പിക്കാന്‍ ഇടതു – വലതു മുന്നണികള്‍ ധാരണ ഉണ്ടാക്കിയോ എന്ന് സംശയമുണ്ട്. ശബരിമല സ്വര്‍ണക്കൊള്ളക്കേസില്‍ നിലവില്‍ സിപിഎം നേതാക്കളാണ് അറസ്റ്റിലായിരിക്കുന്നത്. അന്വേഷണം കൂടുതല്‍ മുന്നോട്ടു പോയാല്‍ കോണ്‍ഗ്രസ് നേതാക്കളും കുടുങ്ങുമോയെന്ന ഭയമുണ്ട്. ഈ സാഹചര്യത്തില്‍ ഇരു കേസുകളും പാതിവഴിയില്‍ അവസാനിപ്പിക്കാന്‍ മുഖ്യമന്ത്രിയും പ്രതിപക്ഷനേതാവും ധാരണ ഉണ്ടാക്കിയോ എന്ന് സംശയമുണ്ട്. ഇത്രദിവസമായിട്ടും എംഎല്‍എയായ രാഹുല്‍ മാങ്കൂട്ടത്തിലിനെ കണ്ടെത്താനായില്ല എന്നത് ഇക്കാര്യത്തില്‍ സംശയത്തിന് വകനല്‍കുന്നതാണെന്നും അദ്ദേഹം പറഞ്ഞു.
തദ്ദേശ തെരഞ്ഞെടുപ്പില്‍ എന്‍ഡിഎയ്‌ക്കും ബിജെപിയ്‌ക്കും വലിയ പ്രതീക്ഷയാണുള്ളതെന്നും കൃഷ്ണദാസ് പറഞ്ഞു. കേരളത്തിലെ വോട്ടര്‍മാര്‍ എല്‍ഡിഎഫും യുഡിഎഫും മതിയായി എന്‍ഡിഎ മതി എന്ന് രാഷ്‌ട്രീയ തീരുമാനത്തിലേക്ക് എത്തി. 2024ല്‍ തൃശ്ശൂരിലുണ്ടായ രാഷ്‌ട്രീയ മാറ്റം ഈ തെരഞ്ഞെടുപ്പില്‍ കേരളം മുഴുവന്‍ വ്യാപിക്കും. ജനക്ഷേമ – വികസനരാഷ്‌ട്രീയത്തിന്റെ വിജയം തൃശ്ശൂരില്‍ സുരേഷ് ഗോപിയിലൂടെയാണ് ഉണ്ടായത്. ഈ തെരഞ്ഞെടുപ്പോടെ കേരളത്തിലും ഡബിള്‍ എഞ്ചിന്‍ വരും. കേന്ദ്രത്തില്‍ മോദി സര്‍ക്കാരും നിരവധി തദ്ദേശ സ്ഥാപനങ്ങളില്‍ എന്‍ഡിഎ – ബിജെപി നേതൃത്വം നല്‍കുന്ന പ്രാദേശിക ഭരണകൂടങ്ങളും നിലവില്‍ വരും. അത് അവിടെ നിന്ന് ഉയര്‍ന്ന് ട്രിപ്പിള്‍ എഞ്ചിന്‍ സര്‍ക്കാരിലേക്ക് മുന്നോട്ടുപോകും. വികസനം, ജനക്ഷേമം എന്നിവയെക്കുറിച്ചാണ് എന്‍ഡിഎ തെരഞ്ഞെടുപ്പില്‍ ചര്‍ച്ച ചെയ്തത്. വികസിതകേരളം എന്നതായിരുന്നു പ്രധാന ചര്‍ച്ചാ കേന്ദ്രം. വികസനത്തിന്റെ രാഷ്‌ട്രീയമാണ് ബിജെപി മുന്നോട്ടുവെച്ചത്. എന്നാല്‍ എല്‍ഡിഎഫും യുഡിഎഫും അധോലോക രാഷ്‌ട്രീയവും അശ്ലീല രാഷ്‌ട്രീയവുമാണ് ചര്‍ച്ച ചെയ്തത്. ഇതോടെ ജനങ്ങള്‍ക്ക് ഇരുകൂട്ടരുടെയും തനിനിറം ബോധ്യപ്പെട്ടു. അതു കൊണ്ടാണ് മാറാത്തത് മാറും എന്ന തീരുമാനത്തില്‍ ജനങ്ങള്‍ എത്തിയത്.
പ്രധാനമന്ത്രിയുമായുള്ള കൂടിക്കാഴ്ചയില്‍ സമകാലിക രാഷ്‌ട്രീയ സാഹചര്യവും ചര്‍ച്ചയായെന്ന് പി.കെ. കൃഷ്ണദാസ് -പറഞ്ഞു. തദ്ദേശസ്ഥാപന തെരഞ്ഞെടുപ്പിനെക്കുറിച്ചും കഴിഞ്ഞ മാസങ്ങളില്‍ ബിജെപിയും എന്‍ഡിഎയും നടത്തിയ പ്രവര്‍ത്തനത്തെക്കുറിച്ചും പ്രധാനമന്ത്രി ചോദിച്ചറിഞ്ഞു. കേരളത്തിലെ രാഷ്‌ട്രീയ സാഹചര്യം ബിജെപിയ്‌ക്കും എന്‍ഡിഎയ്‌ക്കും അനു കൂലമാണെന്ന് വിലയിരുത്തി. വികസനകാര്യത്തില്‍ കേന്ദ്രസര്‍ക്കാര്‍ കേരളത്തിന് ഒപ്പം നില്‍ക്കുമെന്ന് ആവര്‍ത്തിച്ച് വ്യക്തമാക്കിയതായും കൃഷ്ണ ദാസ് കൂട്ടിച്ചേര്‍ത്തു.
