ദുബായ്: കഴിഞ്ഞ 30 വര്ഷമായി സാമൂഹ്യനീതിക്കായി പ്രവര്ത്തിച്ചുവരുന്ന എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന് പൂര്ണ പിന്തുണ പ്രഖ്യാപിച്ച് യുഎഇയിലെ എട്ട് എസ്എന്ഡിപി യോഗം യൂണിയനുകള്.
അജ്മാന് ദുബായ് മെഡിക്കല് ഓഡിറ്റോറിയത്തില് നടന്ന സംയുക്ത പ്രവര്ത്തക സംഗമത്തിലാണ് ഐക്യദാര്ഢ്യം പ്രഖ്യാപിച്ചത്. യോഗത്തില് എസ്എന്ഡിപി യോഗം യുഎഇ കോഓര്ഡിനേറ്റര് അഡ്വ. സിനില് മുണ്ടപ്പള്ളി അധ്യക്ഷത വഹിച്ചു. വെള്ളാപ്പള്ളി നടേശനെതിരെ ചില രാഷ്ട്രീയപ്രേരിത ശക്തികള് അസംബന്ധ ആരോപണങ്ങള് ഉയര്ത്തുന്നതായി അദ്ദേഹം ചൂണ്ടിക്കാട്ടി.
വെള്ളാപ്പള്ളിയുടെ പ്രസംഗത്തില് നിന്നുള്ള ചില വാക്കുകള് വളച്ചൊടിച്ച് പ്രചരിപ്പിക്കപ്പെട്ടത് ദൗര്ഭാഗ്യകരമാണ്. വെള്ളാപ്പള്ളി നടേശന്റെ നേതൃത്വത്തില് സമൂഹത്തിന്റെ ശാക്തീകരണത്തിനായി യോഗം നിര്ണായക ഇടപെടലുകള് നടത്തിവരികയാണെന്നും സിനില് മുണ്ടപ്പള്ളി പറഞ്ഞു. കഴിഞ്ഞ 30 വര്ഷമായി യോഗത്തിന്റെ സാരഥ്യം വഹിക്കുന്ന വെള്ളാപ്പള്ളി നടേശനെ ആദരിക്കാനും യോഗം തീരുമാനിച്ചു.
93-ാമത് ശിവഗിരി തീര്ത്ഥാടനം ഭക്തിസാന്ദ്രമായി ആചാരാനുഷ്ടാനങ്ങളോടെ യുഎഇയില് സംഘടിപ്പിക്കും. പരിപാടികളുടെ പ്രചാരണങ്ങളുടെ ഭാഗമായി വിളംബര ഘോഷയാത്ര, സംയുക്ത പ്രവര്ത്തക യോഗങ്ങള്, പോഷകസംഘടന പ്രവര്ത്തകയോഗങ്ങള്, ജീവകാരുണ്യ പ്രവര്ത്തനങ്ങള്, ആദ്ധ്യാത്മിക സമ്മേളനങ്ങള് തുടങ്ങി ഒരു വര്ഷം നീളുന്ന വിവിധ പരിപാടികള് സംഘടിപ്പിക്കാനും തീരുമാനിച്ചു.
300 പേരടങ്ങുന്ന സ്വാഗതസംഘം രൂപീകരിച്ചു. യുഎഇയിലെ എട്ട് യൂണിയനുകളുടെ നേതൃത്വത്തില് ശ്രീനാരായണഗുരുദേവന്റെ പൂര്ണകായ വെങ്കല പ്രതിമ നിര്മിക്കാനും തീരുമാനിച്ചു.
സ്വാഗതസംഘം ചെയര്മാനായി ബി. ജയപ്രകാശിനേയും വൈസ് ചെയര്മാനായി സാജന് സത്യയേയും സെക്രട്ടറിയായി ശ്രീധരന് പ്രസാദിനേയും ട്രഷററായി ജെ.ആര്.സി. ബാബുവിനേയും ജനറല് കണ്വീനറായി സിജു മംഗലശ്ശേരിയേയും യോഗം ജനറല് സെക്രട്ടറി നിര്ദ്ദേശിച്ചു.
