ഛണ്ഡിഗഡ് : കോൺഗ്രസ് പാർട്ടി പ്രാഥമിക അംഗത്വത്തിൽ നിന്ന് സസ്പെൻഡ് ചെയ്തതിന് തൊട്ടുപിന്നാലെ ഡോ. നവജ്യോത് കൗർ സിദ്ധുവിന്റെ വിവാദ പ്രസ്താവന. പാർട്ടി നടപടിക്ക് തൊട്ടുപിന്നാലെ പഞ്ചാബ് കോൺഗ്രസ് പ്രസിഡന്റ് രാജ വാറിംഗിനെതിരെ നേരിട്ട് ആക്രമണം അഴിച്ചുവിട്ടുകൊണ്ട് ഡോ. സിദ്ധു അവരുടെ എക്സ് ഹാൻഡിൽ വഴി രൂക്ഷവിമർശനമുന്നയിച്ചു. അന്തരിച്ച മുൻ ആഭ്യന്തരമന്ത്രി ഭൂട്ടാ സിങ്ങിനെ അപമാനിക്കുന്ന ഭാഷയിൽ അപമാനിച്ച രാജ വാറിംഗിന്റെ പ്രസ്താവനയുടെ വീഡിയോയ്ക്കൊപ്പം അവർ തന്റെ പ്രസ്താവന പങ്കിട്ടു.
“വിവേകശൂന്യനും ഉത്തരവാദിത്തമില്ലാത്തവനും, ധാർമ്മികമായി സത്യസന്ധതയില്ലാത്തവനും, അഴിമതിക്കാരനുമായ ഒരു പ്രസിഡന്റിനൊപ്പം നിൽക്കാൻ ഞാൻ വിസമ്മതിക്കുന്നു. അദ്ദേഹത്തിന്റെ കഴിവില്ലായ്മയും ഉത്തരവാദിത്തമില്ലാത്ത പെരുമാറ്റവും മൂലം മുറിവേറ്റ എന്റെ എല്ലാ സഹോദരീസഹോദരന്മാർക്കും വേണ്ടി ഞാൻ നിലകൊള്ളുന്നു. അദ്ദേഹത്തെ ഒരു പ്രസിഡന്റായി അംഗീകരിക്കാൻ ഞാൻ വിസമ്മതിക്കുന്നു. മുഖ്യമന്ത്രി അദ്ദേഹത്തെ എന്തിനാണ് സംരക്ഷിക്കുന്നതെന്ന് എനിക്ക് അത്ഭുതമുണ്ട്. ” – അവർ എഴുതി.
അതേ സമയം ഡോ. സിദ്ധുവിന്റെ പ്രസ്താവന കോൺഗ്രസ് പാർട്ടിക്കുള്ളിൽ ഇതിനകം ഉയർന്നുവരുന്ന കോലാഹലങ്ങൾക്ക് കൂടുതൽ ആക്കം കൂട്ടുകയാണ്. അവര പ്രാഥമിക അംഗത്വം സസ്പെൻഡ് ചെയ്തുകൊണ്ട് പാർട്ടി ശക്തമായ സന്ദേശം നൽകാൻ ശ്രമിച്ചപ്പോൾ ഡോ. സിദ്ധു ഇപ്പോൾ സംസ്ഥാന പ്രസിഡന്റ് രാജ വാറിംഗിനെതിരെ അഴിമതിയും കഴിവില്ലായ്മയുമാണ് ആരോപിച്ചിരിക്കുന്നത്.
ഈ വിവാദം ഇവിടെ അവസാനിക്കുമോ അതോ വരും ദിവസങ്ങളിൽ പഞ്ചാബ് കോൺഗ്രസിൽ വലിയൊരു പിളർപ്പ് കാണപ്പെടുമോ എന്നതാണ് ഇപ്പോൾ രാഷ്ട്രീയ വൃത്തങ്ങളിലെ ചൂടുള്ള ചോദ്യം.
പഞ്ചാബ് മുഖ്യമന്ത്രിയാകണമെങ്കിൽ 500 കോടി രൂപ ചെലവാകുമെന്ന പരാമർശത്തെ തുടർന്നാണ് നവ്ജോത് കൗർ സിദ്ധുവിനെതിരായ നടപടി. 500 കോടി രൂപയുടെ സ്യൂട്ട്കേസ് നൽകുന്ന ഒരാൾക്ക് മാത്രമേ പഞ്ചാബ് മുഖ്യമന്ത്രിയാകാൻ കഴിയൂ എന്നായിരുന്നു പരാമർശം. പിന്നാലെ പഞ്ചാബിലെ കോൺഗ്രസ് അധ്യക്ഷൻ അമരീന്ദർ സിംഗ് രാജ വാരിംഗ് ആണ് നടപടി എടുത്തത്. നവ്ജോത് കൗർ സിദ്ധുവിനെ പാർട്ടിയുടെ പ്രാഥമിക അംഗത്വത്തിൽ നിന്ന് ഉടനടി സസ്പെൻഡ് ചെയ്തു എന്നാണ് അദ്ദേഹം അറിയിച്ചത്.
