ഇസ്ലാമാബാദ്: പാകിസ്ഥാൻ ഇപ്പോൾ ഫീൽഡ് മാർഷൽ അസിം മുനീറിന്റെ നേതൃത്വത്തിൽ പട്ടാളഭരണത്തിലേക്ക് വഴിമാറുന്ന സാഹചര്യത്തിൽ, പ്രധാനമന്ത്രി ഷെഹ്ബാസ് ഷെരീഫ് രാജ്യം വിട്ടോടിയിരിക്കുകയാണ്.
ഇമ്രാൻ ഖാനെ മോചിപ്പിക്കണമെന്ന ആവശ്യവുമായി പാക് നഗരങ്ങളിലാകെ ഇമ്രാൻ പാർട്ടി അനുയായികൾ വലിയ പ്രക്ഷോഭങ്ങൾ ആരംഭിച്ചതോടെ രാജ്യത്തെ സ്ഥിതി കൂടുതൽ വഷളായി. പ്രതിഷേധങ്ങളുടെ പശ്ചാത്തലത്തിൽ അസിം മുനീർ പട്ടാള നിയന്ത്രണം ശക്തമാക്കാൻ തയ്യാറെടുക്കുകയാണെന്ന് റിപ്പോർട്ടുകൾ സൂചിപ്പിക്കുന്നു. ഇതിന് പിന്നിൽ അമേരിക്കയുടെ ഇടപെടലും അസിം മുനീറിന് പിന്തുണയുമുണ്ടെന്ന വിവരങ്ങളും പുറത്തുവരുന്നു.
ഇമ്രാൻ ഖാന്റെ പാർട്ടി അധികാരത്തിലുള്ള ഖൈബർ പക്തൂൺഖ്വാ പ്രവിശ്യയിൽ അടിയന്തരാവസ്ഥ പ്രഖ്യാപിച്ചിരിക്കുകയാണ്. ഇവിടെ നേരത്തേ തന്നെ പട്ടാളഭരണത്തിന്റെ രൂപത്തിൽ നിയന്ത്രണം ഏർപ്പെടുത്തിയതായി വാർത്തകൾ പറയുന്നു.
പാകിസ്ഥാന്റെ ആദ്യ ചീഫ് ഓഫ് ഡിഫൻസ് ഫോഴ്സസ് (CDF) ആയി ഫീൽഡ് മാർഷൽ അസിം മുനീറിനെ നിയമിക്കുന്നതിന്റെ വിജ്ഞാപനം പുറത്തിറങ്ങാനിരിക്കെയായിരുന്നു ഷെഹ്ബാസ് ഷെരീഫിന്റെ അപ്രതീക്ഷിതമായ വിദേശയാത്ര. വിജ്ഞാപനം പുറത്തിറങ്ങുമ്പോൾ ഉത്തരവാദിത്വങ്ങളിൽ നിന്ന് മാറിനിൽക്കാനാണ് ഷെഹ്ബാസ് ശ്രമിച്ചതെന്ന് റിപ്പോർട്ട് ചെയ്യുന്നു.
ഭരണഘടനയിലെ 27-ാം ഭേദഗതിയിലൂടെ സൃഷ്ടിച്ച സി.ഡി.എഫ്. പദവി നേടുന്നതോടെ പാകിസ്ഥാന്റെ ചരിത്രത്തിലെ ഏറ്റവും ശക്തനായ സൈനിക മേധാവിയായി അസിം മുനീർ ഉയർന്നേരും. അഞ്ചുവർഷത്തേക്ക് സി.ഡി.എഫ് ചുമതല നൽകുന്ന ഉത്തരവിനെക്കുറിച്ചുള്ള അന്തിമനടപടികൾ നടക്കുമ്പോൾതന്നെ ഷെഹ്ബാസ് രാജ്യം വിടുകയായിരുന്നു.
ഷെഹ്ബാസ് ഷെരീഫ് ആദ്യം ബഹ്റൈനിലേക്കും പിന്നീട് ലണ്ടനിലേക്കുമാണ് പോയതെന്ന് നാഷണൽ സെക്യൂരിറ്റി അഡ്വൈസറി ബോർഡിന്റെ മുൻ അംഗം തിലക് ദേവാഷർ എഎൻഐയോട് പറഞ്ഞു. ഉത്തരവിൽ ഒപ്പുവെച്ചുവെന്ന ക്ഷോഭം ഒഴിവാക്കാനാണ് ഷെഹ്ബാസ് രാജ്യം വിട്ടതെന്നും അദ്ദേഹം സൂചിപ്പിച്ചു.
കരസേനാ മേധാവിയായിരുന്ന അസിം മുനീറിന്റെ കാലാവധി അവസാനിച്ച ദിവസം ആയിരുന്നു നവംബർ 29 — അന്നുതന്നെ സി.ഡി.എഫ് നിയമനം സംബന്ധിച്ച വിജ്ഞാപനം പുറപ്പെടുവിക്കേണ്ടതായിരുന്നു. പക്ഷേ അത് പുറത്തുവന്നില്ല. ഇതോടെ ഭരണ-സൈനിക അധികാരങ്ങളുടെ സംഘർഷം കൂടുതൽ ഗുരുതര ഘട്ടത്തിലേക്ക് നീങ്ങിയിരിക്കുകയാണ്.
