ജാതകവശാല് രാഹു പിഴച്ചു നില്ക്കുന്നവര്ക്ക് രാഹുര് ദശാകാലത്ത് പലവിധ ദോഷാനുഭവങ്ങള് ഉണ്ടാകാം. രാഹുര് ദശയയില് ഏറ്റവും കൂടുതല് അനുഭവപ്പെടുന്നത് ത്വക്രോഗങ്ങളാണ്. എന്നാല് ജാതകത്തില് രാഹുവിന്റെ സ്ഥിതിയും, രാഹുവിന് ഗുളികനുമായുള്ള ബന്ധവും ഇതര ഗ്രഹയോഗദൃഷ്ടികളും അനുസരിച്ച് വിഷസംബന്ധമായ വൈഷമ്യങ്ങളും ഉണ്ടാകാം. രാഹുവിന്റെ അധിദേവത സര്പ്പങ്ങളാകയാല് രാഹുര്ദോഷശാന്തിക്കായി സര്പ്പപ്രീതിയാണ് വരുത്തേണ്ടത്. കുടുംബക്കാവുകള് സംരക്ഷിക്കുകയും അവിടെ സര്പ്പപൂജ, സര്പ്പംപാട്ട് തുടങ്ങിയവ മുടങ്ങാതിരിക്കാനും ശ്രദ്ധിക്കണം.
മേടം, ചിങ്ങം, മകരം, കുംഭം രാശികളില് നില്ക്കുന്ന രാഹു ദോഷപ്രദമാകയാല് വാസുകീ പ്രതിഷ്ഠയുള്ള ക്ഷേത്രങ്ങളില് ദര്ശനം നടത്തി യഥാശക്തി വഴിപാടുകള് കഴിക്കണം. വാസുകി ശൈവമൂര്ത്തിയായ സര്പ്പമാണ്. എന്നാല് മീനം, മിഥുനം, കന്നി, ധനു എന്നീ രാശികളില് രാഹു നില്ക്കുന്നവര് വൈഷ്ണവ മൂര്ത്തിയായ അനന്തപ്രതിഷ്ഠയുള്ള ക്ഷേത്രങ്ങളിലാണ് ദര്ശനവും വഴിപാടുകളും നടത്തേണ്ടത്. രാഹു ആറിലോ എട്ടിലേ ആയാണ് ജാതകത്തില് നില്ക്കുന്നതെങ്കില് പരിഹാരമായി ചെയ്യേണ്ടത് സര്പ്പബലിയാണ്. പത്തില് രാഹുനില്ക്കുന്നവരും സര്പ്പബലി നടത്തുന്നത് നന്ന്. എന്നാല് രാഹു ഏഴിലോ പന്ത്രണ്ടിലോ ആണെങ്കില് സര്പ്പംപാട്ടും സര്പ്പംതുള്ളലുമാണ് പ്രതിവിധി. രാഹുലഗ്നത്തിലാണെങ്കില് നാഗരാജാവിനോ, നാഗയക്ഷിക്കോ, പാലഭിഷേകമോ, ഇളനീരഭിഷേകമോ നടത്തണം. ഭരണി, പൂരം, പൂരാടം, രോഹിണി, അത്തം തിരുവോണം എന്നീ നാളുകാര് രാഹുദശയില് കുടുംബക്കാവില് നടത്തിവന്നിരുന്ന കര്മ്മങ്ങള് ലോപം കൂടാതെ തുടരണം. അല്ലെങ്കില് ത്വക്രോഗങ്ങള് ബാധിക്കാം. ഒന്നിലധികം തവണ വിഷം തീണ്ടിയിട്ടുള്ളവര് ജാതകപരിശോധന നടത്തി തക്കതായ പ്രതിവിധി ചെയ്യണം. നാഗരാജ ക്ഷേത്രത്തില് മഞ്ഞള് കൊണ്ടു തുലാഭാരം നടത്തുന്നതും നന്ന്.
(ജ്യോതിഷസുധ എന്ന ഗ്രന്ഥത്തില് നിന്ന്)
