പാലക്കാട്: മണ്ണാര്ക്കാട് എല്ഡിഎഫിനെതിരെ തുറന്ന പോരിനിറങ്ങി മുന് എംഎല്എയും മുന് സിപിഎംഏരിയ സെക്രട്ടറിയും കെടിഡിസി ചെയര്മാനുമായ പി.കെ.ശശിയെ അനുകൂലിക്കുന്ന വിഭാഗം. തദ്ദേശതെരഞ്ഞെടുപ്പില് ഇതുവരെ കാണാത്ത ഒരു മത്സരമാണ് എല്ഡിഎഫ് മണ്ണാര്ക്കാട് നേരിടുന്നത്. ജനകീയ മതേതര മുന്നണി സ്ഥാനാര്ത്ഥികളെ പ്രഖ്യാപിച്ചാണ് പി.കെ.ശശി വിഭാഗം രണ്ടും കല്പ്പിച്ച് രംഗത്തിറങ്ങിയിരിക്കുന്നത്. കോട്ടോപ്പാടം, കാരാകുര്ശ്ശി, കാഞ്ഞിരപ്പുഴ പഞ്ചായത്തുകള്, മണ്ണാര്ക്കാട് നഗരസഭ, മണ്ണാര്ക്കാട്, തിരുവിഴാംകുന്ന് ബ്ലോക്ക് എന്നിവിടങ്ങളിലാണ് ശശി വിഭാഗത്തിന് കരുത്തുള്ളത്.
പ്രത്യക്ഷത്തില് സിപിഎമ്മിനെ അനുകൂലിച്ച് പറയുന്നുണ്ടെങ്കിലും, പരോക്ഷമായിട്ടുള്ള അണിയറ പ്രവര്ത്തനം ശക്തമായിട്ടുണ്ടെന്ന് അനുകൂലികള് പറയുന്നു. അലനല്ലൂര്, കോട്ടോപ്പാടം, കാരാകുര്ശ്ശി, കാഞ്ഞിരപ്പുഴ പഞ്ചായത്തുകളില് ഓരോ വാര്ഡിലും ശ്രീകൃഷ്ണപുരം കാരാകുര്ശ്ശി ഡിവിഷനിലും പി.കെ.ശശി വിഭാഗത്തിന് യുഡിഎഫ് പിന്തുണയുമുണ്ട്. മണ്ണാര്ക്കാട് നഗരസഭയില് പത്ത് വാര്ഡുകളിലാണ് ജനകീയ മതേതര മുന്നണി സ്ഥാനാര്ത്ഥികള് മത്സരിക്കുന്നത്. സിപിഎമ്മിന് മേല്ക്കോയ്മയുള്ള വാര്ഡുകളാണ് എല്ലായിടത്തും. കുമരംപുത്തൂര് പഞ്ചായത്തിലെ വിവിധ വാര്ഡുകളില് സേവ് സിപിഐക്കും, യുഡിഎഫിനും പിന്തുണ നല്കുമെന്നും പറയുന്നു.
ശശി വിഭാഗം സ്ഥാനാര്ത്ഥികള്ക്കു പത്രിക പിന്വലിക്കാന് കനത്ത സമ്മര്ദ്ദം ഉണ്ടായിരുന്നതായി പറയുന്നു. പത്രിക പിന്വലിക്കുന്ന അവസാന ദിവസമായ തിങ്കളാഴ്ച നേതാക്കള് നേരിട്ടും ഫോണിലും വന് സമ്മര്ദ്ദമാണത്രേ ചെലുത്തിയത്. ഇതിനെ തുടര്ന്ന് ചിലയിടങ്ങളില് സ്ഥാനാര്ത്ഥിത്വം പിന്വലിച്ചിരുന്നു.
നഗരസഭയിലെ പെരിഞ്ചോളം, ആല്ത്തറ, വിനായകനഗര്, പെരിമ്പടാരി, പാറപ്പറം, വടക്കുമണ്ണം, നടമാളിക, ഉഭയ മാര്ഗം, കുളര്മുണ്ട്, കാഞ്ഞിരം വാര്ഡുകളിലാണ് ശശി വിഭാഗത്തിന് സ്ഥാനാര്ത്ഥികളുള്ളത്. കോട്ടോപ്പാടത്ത് കണ്ടമംഗലം, കോട്ടോപ്പാടം ഈസ്റ്റ്, പത്തംഗം, തെയ്യോട്ടുചിറ എന്നിവിടങ്ങളിലും മത്സരിക്കുന്നുണ്ട്. അലനല്ലൂര് എടത്തനാട്ടുകരയിലും, അട്ടപ്പാടിയിലെ വിവധ പഞ്ചായത്തുകളിലും, കാരാകുര്ശ്ശി പൊന്തിയാംപുറം വാര്ഡില് മുന് ബ്രാഞ്ച് സെക്രട്ടറി അക്ബര് അലിക്കും കോട്ടോപ്പാടം പത്താം വാര്ഡിലെ രജനി ഇടമുറ്റത്തിനും കാഞ്ഞിരപ്പുഴ പള്ളിപ്പടി വാര്ഡിലെ അരുണ് ഓലിക്കലിനും യുഡിഎഫ് പിന്തുണയുമുണ്ട്. ശ്രീകൃഷ്ണപുരം ബ്ലോക്കിലെ കാരാകുര്ശ്ശി ഡിവിഷനില് ഫിറോസ് കഞ്ഞിച്ചാലും യുഡിഎഫ് പിന്തുണയോടെയാണ് മത്സരിക്കുന്നത്. മണ്ണാര്ക്കാട് ബ്ലോക്ക് തിരുവിഴാംകുന്ന് ഡിവിഷനില് കെ.ഷാനിഫ് ശശി വിഭാഗത്തിന്റെ സ്ഥാനാര്ത്ഥിയായി മത്സരിക്കുന്നു. പല വാര്ഡുകളിലും യുഡിഎഫിന് പിന്തുണ നല്കുവാനുള്ള തീരുമാനവുമായാണ് ‘ജനകീയ മതേതര മുന്നണി’ മുന്നോട്ടുപോകുന്നത്.
