ന്യൂയോര്‍ക്ക് : അമേരിക്കയിലെ മിസിസിപ്പി യൂണിവേഴ്സിറ്റിയില്‍ ടേണിംഗ് പോയിന്‍റ് എന്ന പരിപാടിയില്‍ അമേരിക്കന്‍ വൈസ് പ്രസിഡന്‍റ് ജെ.ഡി. വാന്‍സിനെ വിറപ്പിച്ച, നിരായുധനാക്കിയ ചോദ്യങ്ങള്‍ ചോദിച്ച ആ ഇന്ത്യന്‍ പെണ്‍കുട്ടിയുടെ വിശദാംശങ്ങള്‍ ഇന്‍റര്‍നെറ്റ് തെരഞ്ഞെങ്കിലും ഇതുവരെയും കണ്ടുകിട്ടിയിട്ടില്ല. ജെ.ഡി വാന്‍സ് നടത്തിയ ഒരു പരാമര്‍ശത്തെ ആധാരമാക്കിയാണ് ഈ പെണ്‍കുട്ടി കൂസലില്ലാതെ ചോദ്യങ്ങള്‍ ചോദിച്ചത്. പെണ്‍കുട്ടി ഉയര്‍ത്തിയ രണ്ട് ചോദ്യങ്ങള്‍ക്ക് മുന്‍പില്‍ ഒരു നിമിഷം ജെഡി വാന്‍സ് പതറി.
താന്‍ ക്രിസ്ത്യാനിയാണെന്നും തന്റെ ഭാര്യ ഉഷ വാന്‍സ് ഒരു ഹിന്ദു ആണെന്നും എന്നെങ്കിലും ഒരു ദിവസം അവരും ക്രിസ്ത്യന്‍ മതത്തെ പുല്‍കുമെന്നും ആണ് താന്‍ ആഗ്രഹിക്കുന്നതെന്നുള്ള ജെ.ഡി വാന്‍സിന്റെ പഴയൊരു പ്രസ്താവനയിലാണ് ആ പെണ്‍കുട്ടി കയറിപ്പിടിച്ചത്. “എന്തിനാണ് ഭാര്യ ഹിന്ദു മതം വിട്ട് ക്രിസ്ത്യന്‍ മതത്തില്‍ ചേരണമെന്ന് ആഗ്രഹിക്കുന്നത്? അവര്‍ക്ക് വ്യത്യസ്തമായ തന്റെ സംസ്കാരം നിലനിര്‍ത്തിക്കൊണ്ട് ജീവിതത്തില്‍ മുന്നോട്ട് പോയ്‌ക്കൂടേ? എന്തിനാണ് അവര്‍ കൂടി ക്രിസ്ത്യന്‍ മതത്തില്‍ ലയിക്കണമെന്ന് ആഗ്രഹിക്കുന്നത്?”- പെണ്‍കുട്ടിയുടെ ഈ ചോദ്യത്തിന് വ്യക്തമായ ഉത്തരം നല്‍കാന്‍ ജെ.ഡി വാന്‍സിന് കഴിഞ്ഞില്ല. ഈ സംവാദം അമേരിക്കയിലാകെ വലിയ ചര്‍ച്ചാവിഷയമായി മാറി. ഉഷ വാന്‍സ് തന്നെ താന്‍ ഹിന്ദുമതം ഉപേക്ഷിക്കില്ലെന്ന് തുറന്നു പറയുന്നതിലേക്ക് വരെ കാര്യങ്ങള്‍ മുന്നോട്ട് പോയി.
വിദേശത്തുനിന്നുള്ളവരുടെ കുടിയേറ്റം തടയുന്ന ട്രംപിന്റെ പുതിയ കുടിയേറ്റ നിയമത്തെയാണ് രണ്ടാമത് ഈ പെണ്‍കുട്ടി ചോദ്യം ചെയ്തത്. “അമേരിക്ക എന്ന സ്വപ്നം നിങ്ങള്‍ എന്തിനാണ് ഞങ്ങള്‍ക്ക് നല്‍കിയത്? ആ സ്വപ്നം കയ്യെത്തിപ്പിടിക്കാന്‍ ഈ രാജ്യത്ത് ഞങ്ങളുടെ യൗവ്വനവും പണവും ഞങ്ങള്‍ ചെലവഴിച്ചു. അതിനായി ഞങ്ങള്‍ കഠിനമായി ഇവിടെ അധ്വാനിച്ചു. എന്നിട്ടും അമേരിക്കന്‍ വൈസ് പ്രസിഡന്‍റായ നിങ്ങള്‍ പറയുന്നു ഞങ്ങള്‍ക്ക് ഇത്തരത്തിലുള്ള ധാരാളം കുട്ടികള്‍ ഉണ്ട് എന്ന്. ഇനി ഞങ്ങളെയെല്ലാം പുറത്താക്കാന്‍ പോകുകയാണെന്നും നിങ്ങള്‍ പറയുന്നു. പിന്നെ എന്തിനാണ് അമേരിക്ക എന്ന സ്വപ്നം നിങ്ങള്‍ ഞങ്ങള്‍ക്ക് വിറ്റത്? – ഇതായിരുന്നു ആ പെണ്‍കുട്ടിയുടെ രണ്ടാമത്തെ ചോദ്യം. ഇതിന് വ്യക്തമായ ഉത്തരം നല്‍കാന്‍ ജെ.ഡി. വാന്‍സിനായില്ല. കാരണം എച്ച് 1 ബി വിസയ്‌ക്ക് ഒരു ലക്ഷം ഡോളര്‍ ആയി ഫീസ് ഉയര്‍ത്തിയത് തന്നെ അമേരിക്കന്‍ സ്വപ്നങ്ങള്‍ തേടി വിദേശരാജ്യങ്ങളില്‍ നിന്നും എത്തിച്ചേരുന്നവരെ തടയുക എന്ന ഉദ്ദേശ്യത്തോടെയായിരുന്നു. കാമ്പസുകളില്‍ ഗവേഷണത്തിനും മറ്റുമായി എത്തുന്നവരെയും ട്രംപ് ഭരണകൂടം പഴയതുപോലെ തുറന്നമനസ്സോടെ സ്വീകരിക്കുന്നില്ലെന്നതും അമേരിക്കയിലെ പുതിയ വിഷമകരമായ സാഹചര്യം തന്നെയാണ്. പക്ഷെ ജെ.ഡി. വാന്‍സ് പറഞ്ഞത് പഠിച്ച് മിടുക്കരായവരുടെ കുടിയേറ്റം തടയില്ലെന്നും അനധികൃതമായി വരുന്നവരെയും പഠനനിലവാരം കുറഞ്ഞവരെയും മാത്രമാണ് അമേരിക്ക ഒഴിവാക്കുക എന്നാണ് ജെ.ഡി. വാന്‍സ് ആ പെണ്‍കുട്ടിക്ക് ഉത്തരം നല്‍കിയത്. ബോട്ടുകളില്‍ വരുന്ന മുസ്ലിം കുടിയേറ്റക്കാരെ ഒരു കാരണവശാലും അമേരിക്കയിലേക്ക് പ്രവേശിപ്പിക്കില്ലെന്ന് ട്രംപ് പ്രഖ്യാപിച്ചിരുന്നു. കാരണം ഇവര്‍ അമേരിക്ക പ്രതീക്ഷിക്കുന്ന മനുഷ്യ വിഭവശേഷി ഉള്ളവരല്ല. അമേരിക്കയ്‌ക്ക് ആവശ്യം ബുദ്ധിപരമായ ഉയര്‍ന്ന നിലവാരം പുലര്‍ത്തുന്നവരെയാണ്.
പക്ഷെ ജെ.ഡി. വാന്‍സിനെ ചോദ്യം ചോദിച്ച് മുട്ടുകുത്തിച്ച ഈ മിടുക്കിയായ പെണ്‍കുട്ടി ഇന്ത്യയില്‍ വേരുകളുള്ള പെണ്‍കുട്ടിയാണ് എന്നതല്ലാതെ ഇവരെക്കുറിച്ച് വ്യക്തിപരമായ വിശദാംശങ്ങള്‍ ഇതുവരെയും പുറത്തുവന്നിട്ടില്ല.
