കൊച്ചി: എത്യോപ്യയിലെ അഗ്‌നിപര്‍വത സ്‌ഫോടനത്തിന്റെ പശ്ചാത്തലത്തില്‍ നെടുമ്പാശേരിയില്‍ നിന്നുള്ള രണ്ട് വിമാന സര്‍വീസുകള്‍ റദ്ദാക്കി. ജിദ്ദയിലേക്കുള്ള ആകാശ് എയര്‍, ദുബായിലേക്കുള്ള ഇന്‍ഡിഗോ സര്‍വീസുകളാണ് റദ്ദാക്കിയത്. ചൊവ്വാഴ്ച പകരം സര്‍വീസ് നടത്തുമെന്ന് ഇന്‍ഡിഗോ അറിയിച്ചു. ആകാശ് എയര്‍ സര്‍വീസ് പുനഃക്രമീകരണം അറിയിച്ചിട്ടില്ല. സര്‍വീസുകള്‍ റദ്ദാക്കിയതോടെ ഉംറ തീര്‍ത്ഥാടകര്‍ വിമാനത്താവളത്തില്‍ കുടുങ്ങി.
കണ്ണൂരില്‍ നിന്ന് അബുദാബിയിലേക്ക് പോകുകയായിരുന്ന 6ഇ 1433 എന്ന ഇന്‍ഡിഗോ വിമാനം വഴിതിരിച്ചുവിട്ടു. ഇന്‍ഡിഗോ വിമാനം അഹമ്മദാബാദില്‍ സുരക്ഷിതമായി ഇറങ്ങി. യാത്രക്കാര്‍ക്കായി കണ്ണൂരിലേക്ക് തിരിച്ച് സര്‍വീസ് നടത്തുമെന്ന് ഇന്‍ഡിഗോ അറിയിച്ചു.
ഞായറാഴ്ചയാണ് ഹെയ്ലി ഗുബ്ബി അഗ്‌നിപര്‍വ്വതം പൊട്ടിത്തെറിച്ചത്. 10000 വര്‍ഷത്തിന് ശേഷമാണ് എത്യോപ്യയില്‍ ഈ അഗ്‌നിപര്‍വ്വതം പൊട്ടിത്തെറിച്ചത്. ഈ പശ്ചാത്തലത്തില്‍ ഉയരുന്ന പുക വിമാനങ്ങള്‍ക്ക് ഭീഷണിയാവുകയാണ്.
