കണ്ണൂര്‍ : എസ്‌ഐആര്‍ ക്യാമ്പിന് ശേഷം വീട്ടിലേക്ക് മടങ്ങി പോകവെ ബിഎല്‍ഒ കുഴഞ്ഞുവീണു. അഞ്ചരക്കണ്ടി കുറ്റിക്കര സ്വദേശി വലിയവീട്ടില്‍ രാമചന്ദ്രന്‍ (53) ആണ് കുഴഞ്ഞു വീണത്. ജോലിസമ്മര്‍ദമാണ് കാരണമെന്നാണ് കുടുംബത്തിന്റെ ആരോപണം.രാമചന്ദ്രനെ ആശുപത്രിയില്‍ പ്രവേശിപ്പിച്ചു. കണ്ണൂര്‍ ഡിഡിഇ ഓഫീസിലെ ക്ലര്‍ക്കാണ് രാമചന്ദ്രന്‍.
അതേസമയം ജോലിസമ്മര്‍ദ്ദമെന്ന് ആരോപണം ഉയരുമ്പോഴും എസ്‌ഐആര്‍ സമയക്രമം മാറ്റില്ലെന്നും ഡിസംബര്‍ 9 ന് തന്നെ കരട് പട്ടിക പ്രസിദ്ധീകരിക്കുമെന്നും മുഖ്യതെരഞ്ഞെടുപ്പ് ഓഫീസര്‍ വ്യക്തമാക്കി.
തെരഞ്ഞെടുപ്പ് കമ്മീഷന്‍ ഇന്ന് വിളിച്ച യോഗത്തില്‍ തീവ്ര വോട്ടര്‍ പട്ടിക പരിഷ്‌കരണം നീട്ടണമെന്ന ആവശ്യമാണ് ബിജെപി ഒഴികെയുള്ള പാര്‍ട്ടികള്‍ മുന്നോട്ട് വച്ചത്. ബിഎല്‍ഒമാര്‍ ഫീല്‍ഡില്‍ ബുദ്ധിമുട്ട് നേരിടുന്നത് ഒഴിവാക്കാനും അവര്‍ക്ക് സുരക്ഷ നല്‍കാനും നിര്‍ദേശം നല്‍കിയയെന്ന് മുഖ്യ തിരഞ്ഞെടുപ്പ് ഓഫീസര്‍ രത്തന്‍ യു ഖേല്‍ക്കര്‍ പറഞ്ഞു.
ബിഎല്‍ഒമാര്‍ക്കെതിരെയുള്ള പ്രചാരണങ്ങള്‍ നേരിടും. ഇവരെ ഫീല്‍ഡുകളില്‍ സഹായിക്കാനാണ് കുടുംബശ്രീയില്‍ നിന്നടക്കമുള്ളവരെ പരിഗണിക്കുന്നത്. ഇതുവരെ പരിശീലനം ലഭിച്ചിട്ടിലാത്തവര്‍ക്ക് അത് നല്‍കും. രാഷ്‌ട്രീയപാര്‍ട്ടികളുടെ പിന്തുണകൂടി അതിനായി തേടും. സമയബന്ധിതമായി നടപടികള്‍ നടക്കണമെന്നും രത്തന്‍ യു ഖേല്‍ക്കര്‍ പറഞ്ഞു.
