കൊച്ചി (17-11-2025): എസ് എഫ് ഐ മുൻ സംസ്ഥാന സെക്രട്ടറിയും ഡി വൈ എഫ് ഐ നേതാവുമായ പി എം ആർഷോയ്‌ക്ക് എതിരെ പരാതി നൽകിയ എ ഐ എസ് എഫ് വനിതാ നേതാവ് നിമിഷ രാജു തദ്ദേശ തെരഞ്ഞെടുപ്പിൽ എൽ ഡി എഫ് സ്ഥാനാർഥിയാകും. പറവൂർ ബ്ലോക്കിൽ കെടാമംഗലം ഡിവിഷനിൽ മത്സരിക്കാനാണ് ധാരണ. ജാതി അധിക്ഷേപ പരാതിയാണ് ആർഷോക്കെതിരെ നിമിഷ നൽകിയിരുന്നത്. ഇത് ബിജെപി നേതാവ് പ്രശാന്ത് ശിവൻ കഴിഞ്ഞ ദിവസം ചൂണ്ടിക്കാട്ടിയിരുന്നു.
നിലവിൽ എ ഐ എസ് എഫിന്റെ സംസ്ഥാന ജോയിന്‍റ് സെക്രട്ടറിയായ നിമിഷ, സി പി ഐ സ്ഥാനാർഥിയായാണ് മത്സരത്തിനിറങ്ങുന്നത്. നിമിഷയെ സ്ഥാനാർത്ഥിയാക്കുന്നതിനെ എസ് എഫ് ഐയും ഡി വൈ എഫ് ഐയും എതിർത്തിരുന്നു എന്നാണ് സൂചന. എന്നാൽ ഈ എതിർപ്പ് വകവയ്‌ക്കാതെയാണ് സി പി ഐ നിമിഷയെ മത്സരിപ്പിക്കുന്നതെന്നും റിപ്പോർട്ടുകളുണ്ട്.
