വാഷിങ്ടണ്: യുഎസിലെ ഏറ്റവും ദൈര്ഘ്യമേറിയ അടച്ചുപൂട്ടല് അവസാനിച്ചു. പ്രതിനിധി സഭ പാസാക്കിയതിന് രണ്ട് മണിക്കൂറിനുള്ളില് യുഎസ് പ്രസിഡന്റ് ഡൊണാള്ഡ് ട്രംപ് സര്ക്കാരിന്റെ ഫണ്ടിങ് ബില്ലില് ഒപ്പുവച്ചു.
നാല്പ്പത്തിമൂന്ന് ദിവസത്തെ ഷട്ട്ഡൗണ് അമേരിക്കന് ജനതയെ കാര്യമായി വലച്ചിരുന്നു. ഷട്ട്ഡൗണിന്റെ ഭാഗമായി നിരവധി ഫെഡറല് ജീവനക്കാരെ പിരിച്ചുവിടുകയും പല സര്ക്കാര് നടപടികള് സ്തംഭിക്കുകയും ചെയ്തിരുന്നു. ബില് പാസാക്കുന്നതിനും ഷട്ട്ഡൗണ് അവസാനിപ്പിക്കുന്നതിനും ഡെമോക്രാറ്റുകളെ സമ്മര്ദത്തിലാക്കുന്നതിനായിരുന്നു ട്രംപ് ഭരണകൂടത്തിന്റെ ഈ നടപടികള്. ഒക്ടോബര് ഒന്നിനാണ് യുഎസില് അടച്ചുപൂട്ടല് ആരംഭിച്ചത്.
ജനുവരി 30 വരെ ഫെഡറല് ഫണ്ടിങ് നീട്ടുന്ന പുതിയ ബില്ലിന് റിപ്പബ്ലിക്കന് ഭൂരിപക്ഷമുള്ള സഭയില് 222 മുതല് 209 വരെയുള്ള വോട്ടുകളുടെ പിന്തുണ ലഭിച്ചു. ഏഴ് ഡെമോക്രാറ്റുകളും ഒരു സ്വതന്ത്രനും പിന്തുണയ്ക്കാന് സമ്മതിച്ചതിനെത്തുടര്ന്നാണ് ബില്ലിന് അംഗീകരം ലഭിച്ചത്.
ബില്ലില് ട്രംപ് ഒപ്പുവച്ചെങ്കിലും പ്രധാന പ്രശ്നങ്ങളിലൊന്ന് പരിഹരിച്ചിട്ടില്ല. യുഎസ് ആരോഗ്യ ഇന്ഷുറന്സ് സബ്സിഡികള് പുതുക്കുന്നത് സംബന്ധിച്ച് ഇതുവരെ തീരുമാനം ആയിട്ടില്ല. ആരോഗ്യ ഇന്ഷുറന്സ് സബ്സിഡികളെക്കുറിച്ചുള്ള വോട്ടെടുപ്പ് ഡിസംബറോടെ സെനറ്റില് നടക്കും.
