മൂവാറ്റുപുഴ: ഉഗ്രശേഷിയുള്ള സ്ഫോടക വസ്തുക്കള് കൈവശം സൂക്ഷിച്ച കേസിലെ ഒന്നാം പ്രതിക്ക് കഠിന തടവും പിഴയും. പെരുമ്പാവൂര് പൂപ്പാനി മംഗലശ്ശേരി വീട്ടില് മാഹിന് ഷായെയാണ് മൂവാറ്റുപുഴ അഡി. ഡിസ്ട്രിക്ട് ആന്ഡ് സെഷന്സ് കോടതി ജഡ്ജി കെ.എന്. ഹരികുമാര് അഞ്ച് വര്ഷം തടവും 10,000 രൂപ പിഴയും ശിക്ഷ വിധിച്ചത്. 2016ല് രജിസ്റ്റര് ചെയ്ത കേസിലാണ് ശിക്ഷ.
അനധികൃതമായി 6400 ല് പരം ജലാറ്റിന് സ്റ്റിക്കുകള് വീട്ടില് സൂക്ഷിച്ചതിന് പെരുമ്പാവൂര് പോലീസ് രജിസ്റ്റര് ചെയ്ത കേസിലാണ് നടപടി. പെരുമ്പാവൂര് എക്സൈസ് സിഐയുടെ നേതൃത്യത്തിലുള്ള എക്സൈസ് സംഘം പ്രതിയുടെ വീട്ടില് നിന്ന് 180 ഗ്രാം ഉണക്ക കഞ്ചാവും കഞ്ചാവ് നിറച്ച 87 സിഗററ്റുകളും പിടിച്ചെടുത്തിരുന്നു. എക്സൈസ് ഉദ്യോഗസ്ഥര് അറിയിച്ചതിനെ തുടര്ന്നാണ് പെരുമ്പാവൂര് പോലീസ് തുടര് നടപടികള് സ്വീകരിച്ചത്. കേസില് രണ്ടാം പ്രതിയായ മുണ്ടേത്ത് ജബാറിനെ കോടതി വെറുതെവിട്ടു. പെരുമ്പാവൂര് പോലീസ് സ്റ്റേഷന് സബ് ഇന്സ്പെക്ടറായിരുന്ന പി.എ. ഫൈസല് ആണ് അന്വേഷണം നടത്തി പ്രതികള്ക്കെതിരെ കോടതിയില് കുറ്റപത്രം സമര്പ്പിച്ചത്. പ്രോസിക്യൂഷനു വേണ്ടി അഡി. പബ്ലിക് പ്രോസിക്യൂട്ടര് കെ.എസ്. ജ്യോതികുമാര് ഹാജരായി.
