കൊച്ചി : ഇത്തവണ ചലച്ചിത്ര അവാർഡ് കൊടുക്കാൻ പാകത്തിലുള്ള ബാലതാരങ്ങളുടെ പ്രകടനം കണ്ടില്ലെന്ന സാംസ്കാരിക മന്ത്രി സജി ചെറിയാന്റെ പ്രസ്താവനയ്ക്കെതിരെ ശ്രീജിത് പണിക്കർ. ഇന്നലെ വൈകിട്ടാണ് കുട്ടികൾക്ക് ചലച്ചിത്ര അവാർഡ് പരിഗണിക്കാത്ത ജൂറിയുടെ നടപടിയെ ന്യായീകരിച്ച് സജി ചെറിയാൻ രംഗത്തെത്തിയത്. ഇതിനെയാണ് ശ്രീജിത് പരിഹാസേന ഫേസ്ബുക്കിൽ വിമർശിച്ചത്. അദ്ദേഹത്തിന്റെ വാക്കുകൾ ഇങ്ങനെ:
“ഇത്തവണ കുട്ടികളുടെ അഭിനയം ജൂറി “കണ്ടില്ല, പക്ഷേ അടുത്ത തവണ “കാണും” എന്ന് സജിയണ്ണൻ ഉവാച! ഒരു സംശയം — അവാർഡ് ഉണ്ടായിരിക്കുമോ ഇല്ലായിരിക്കുമോ എന്നൊക്കെ തീരുമാനിക്കുന്നത് അണ്ണനാണോ അതോ ജൂറിയാണോ?” – ശ്രീജിത് ഫേസ്ബുക്കിൽ കുറിച്ചു.
അതേ സമയം ഇത്തവണ അവാർഡ് കൊടുക്കാൻ പാകത്തിലുള്ള ബാലതാരങ്ങളുടെ പ്രകടനം കണ്ടില്ലെന്നാണ് പ്രകാശ് രാജ് ചെയർമാനായ ജൂറി വിലയിരുത്തിയതെന്നായിരുന്നു സജി ചെറിയാന്റെ ന്യായീകരണം. കൂടാതെ കഴിഞ്ഞ വർഷം കുട്ടികൾക്ക് അവാർഡ് ലഭിച്ചിരുന്നു. ഈ വർഷം അങ്ങനെയുണ്ടായില്ല എന്നത് പരിഹരിക്കേണ്ട പ്രശ്നമാണ്.
വിഷയം ചർച്ച ചെയ്യാൻ സിനിമാ മേഖലയിലെ ബന്ധപ്പെട്ടവരുടെ യോഗം വിളിക്കും. സർക്കാർ സഹായം ആവശ്യമെങ്കിൽ നൽകുമെന്നും മറ്റുമാണ് മന്ത്രി മാധ്യമങ്ങളോട് പ്രതികരിച്ചത്.
