യുദ്ധഭീതിയിൽ ക്രൂയിസ് ടൂറിസം; ആഡംബര വിനോദസഞ്ചാര കപ്പലുകള്‍ കുറഞ്ഞു, കേരള ടൂറിസത്തിനും കൊച്ചി തുറമുഖത്തിനും കോടികളുടെ നഷ്ടം

കൊച്ചി: യുദ്ധഭീതിയും യുറോപ്യന്‍ പ്രതിസന്ധിയും ആഡംബര കപ്പല്‍ വിനോദ സഞ്ചാര മേഖല (ക്രൂയിസ് ടൂറിസം) യ്‌ക്ക് തിരിച്ചടിയാകുന്നു. നവംബര്‍ മുതല്‍ മെയ് വരെയുള്ള ആഗോള ക്രൂയിസ് ടൂറിസം സീസണ്‍കാലം പ്രതീക്ഷകളെ തളര്‍ത്തുകയാണ്. ഭാരതത്തില്‍ കൊച്ചിയടക്കം അഞ്ച് മേജര്‍ തുറമുഖങ്ങളിലാണ് ക്രൂയിസ് കപ്പലുകളെത്തുന്നത്.
ക്രൂയിസ് സീസണിന് തുടക്കം കുറിച്ച് കൊച്ചി തുറമുഖത്ത് 18ന് ആദ്യ ആഡംബര കപ്പല്‍ എത്തും. 26 മെയ് വരെയുള്ള സീസണില്‍ കൊച്ചിയില്‍ 16 കപ്പലുകളാണ് ഇതുവരെ ചാര്‍ട്ട് ചെയ്തിട്ടുള്ളത്. കഴിഞ്ഞ ഒന്നര പതിറ്റാണ്ടിനിടെ ഇത്രയും കുറഞ്ഞ കപ്പലുകളെത്തുന്നത് ഈ വര്‍ഷമാണെന്നാണ് ക്രൂയിസ് കപ്പല്‍ എജന്‍സികള്‍ പറയുന്നത്.

കൊവിഡിനുശേഷം ഉണരുന്ന ആഡംബരക്കപ്പല്‍ വിനോദസഞ്ചാര മേഖലയ്‌ക്ക് യുദ്ധഭീതി വന്‍ തിരിച്ചടിയാണുണ്ടാക്കുന്നത്. ഇത് കേരള ടൂറിസത്തിനും കൊച്ചി തുറമുഖത്തിനും കോടികളുടെ വരുമാന നഷ്ടമാണുണ്ടാക്കുന്നത്.

ക്രൂയിസ് ടൂറിസം മേഖലയില്‍ കൊച്ചി തുറമുഖത്ത് പോയ വര്‍ഷവും പ്രതീക്ഷിച്ചതിനെക്കാള്‍ കുറഞ്ഞ ആഡംബര കപ്പലുകളാണ് എത്തിയത്. ക്രൂയിസ് ടൂറിസ്റ്റ് സീസണ്‍ 2023 നവംബര്‍ മുതല്‍ 2024 മെയ് വരെ എത്തിയത് 30 ഓളം വിദേശ കപ്പലുകള്‍ മാത്രം. 2020, 2021 വര്‍ഷങ്ങളില്‍ കപ്പല്‍ വരവ് ഇല്ലാതായതോടെ ഈ മേഖലയില്‍ മാത്രം പ്രതിവര്‍ഷം കൊച്ചി തുറമുഖത്തിന് 15 – 20 കോടി രൂപയാണ് വരുമാന നഷ്ടമുണ്ടായത്. കൂടാതെ സംസ്ഥാന ടൂറിസം രംഗത്ത് വിവിധ മേഖലകളിലും കോടികള്‍ നഷ്ടമുണ്ടായി. പ്രതിവര്‍ഷം സീസണ്‍ ശരാശരിയില്‍ 45 ഓളം ആഡംബര വിദേശ വിനോദ സഞ്ചാര കപ്പലുകളാണ് കൊച്ചി തുറമുഖത്ത് എത്താറുള്ളത്. ചെറുതും വലുതുമായ കപ്പലുകള്‍ തുറമുഖത്ത് എത്തിയാല്‍ വാര്‍ഫേജ് നിരക്കടക്കം 40-60 ലക്ഷം രൂപ വരെയാണ് തുറമുഖത്തിന് ലഭിക്കുക. കൂടാതെ ക്ലിയറിങ്, കുടിവെള്ളം, ചികിത്സ പരിശോധന, മാലിന്യനീക്കം തുടങ്ങി മറ്റിന ങ്ങളിലും വരുമാനമുണ്ട്.

600 മുതല്‍ 2800 യാത്രക്കാരും 1200 ല്‍ ഏറെ കപ്പല്‍ ജീവനക്കാരുമാണ് കപ്പലുകളിലെത്തുക. ഒരു സീസണില്‍ അരലക്ഷത്തിലെറെ ക്രൂയീസ് സഞ്ചാരികളെത്തും. ഒരു വിനോദസഞ്ചാരി ശരാശരി 800 – 1000 ഡോളര്‍ വരെ (6000-8000 രൂപ) ചെലവഴിക്കുമെന്നാണ് കണക്ക്. ഇതിലൂടെ പ്രതിവര്‍ഷം 30-40 കോടി രൂപയാണ് പ്രാദേശിക വരുമാന നഷ്ടം കണക്കാക്കുന്നത്. കൂടാതെ വാഹനയാത്രാ ചെലവിലുള്ള വരുമാന നഷ്ടം വേറെയും. 2020 മാര്‍ച്ച് ആദ്യവാരമാണ് രാജ്യത്തെ മേജര്‍ തുറമുഖങ്ങളില്‍ ആഡംബര വിദേശ വിനോദസഞ്ചാര കപ്പലുകള്‍ക്ക് വിലക്കേര്‍പ്പെടുത്തിയത്. മറ്റു തുറമുഖങ്ങളിലടക്കം 25 ഓളം കപ്പലുകള്‍ക്ക് ഭാരത തുറമുഖങ്ങളില്‍ വിലക്കേര്‍പ്പെടുത്തുകയും ചെയ്തു.

കൊച്ചി, മംഗലാപുരം, ഗോവ, ചെന്നൈ, മുംബൈ തുടങ്ങി മേജര്‍ തുറമുഖങ്ങളിലാണ് ആഡംബര കപ്പലുകളെത്തുന്നത്. 2020 ഒക്ടോബര്‍ -21 മെയ് വരെ സീസണില്‍ 60 കപ്പലുകള്‍വരെ കൊച്ചി ലക്ഷ്യമിട്ടിരുന്നു.

ആഡംബര കപ്പലുകള്‍ക്കും സഞ്ചാരികള്‍ക്കും മികച്ച സേവനവും ആധുനിക സൗകര്യവുമായി പുതിയ ക്രൂയിസ് ടെര്‍മിനലും കൊച്ചി തുറമുഖ അതോറിറ്റി സജ്ജീകരിച്ച് തുറക്കുകയും ചെയ്തു. നിരക്ക് ഇളവുകളും നല്കിയിട്ടുണ്ട്. മുംബൈ- കൊച്ചി- ലക്ഷദ്വീപ് ഗോവ ടൂറിസം കേന്ദ്രങ്ങളെ ബന്ധിപ്പിച്ച് ആഭ്യന്തര ടൂറിസം കപ്പലുകളും കൊച്ചി തുറമുഖം കേന്ദ്രീകരിച്ച് സര്‍വീസ് നടത്തുന്നുണ്ട്.