തിരുവനന്തപുരം: വികസിത ഭാരതത്തിന്റെ നിര്‍മാണത്തിനായി ജനങ്ങളുടെ കൂട്ടായ പരിശ്രമം ഉണ്ടാകണമെന്നും ഇതില്‍ യുവജനങ്ങള്‍ക്ക് നിസ്തുല പങ്കു വഹിക്കാനാകുമെന്നും മുന്‍ കേന്ദ്രമന്ത്രി വി. മുരളീധരന്‍.
സര്‍ദാര്‍ വല്ലഭ്ഭായ് പട്ടേലിന്റെ 150-ാം ജന്മവാര്‍ഷികാഘോഷങ്ങളുടെ ഭാഗമായി കേന്ദ്ര യുവജനകാര്യ കായിക മന്ത്രാലയത്തിന് കീഴിലെ മേരാ യുവ് ഭാരതിന്റെ ആഭിമുഖ്യത്തില്‍ സംഘടിപ്പിച്ച ജില്ലാതല ഏകതാ പദയാത്രയുടെ സമാപന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ഭാരതത്തിലെ ജനങ്ങള്‍ സുഖ സമൃദ്ധിയോടെ ജീവിക്കുക എന്നത് ഐക്യഭാരതം കെട്ടിപ്പടുത്ത സര്‍ദാര്‍ വല്ലഭ്ഭായ് പട്ടേലിന്റേയും സ്വാതന്ത്ര്യത്തിനായി ജീവത്യാഗം ചെയ്ത സ്വാതന്ത്ര്യസമര സേനാനികളുടേയും സ്വപ്‌നമായിരുന്നു. ഈ സ്വപ്‌നത്തില്‍ ഊന്നിയാണ് 2047ല്‍ ഭാരതത്തെ വികസിതമാക്കുക എന്ന ലക്ഷ്യം പ്രധാനമന്ത്രി നരേന്ദ്ര മോദി മുന്നോട്ടുവെച്ചിട്ടുള്ളത്. ഇതിനായി സമൂഹം ഒറ്റക്കെട്ടായി മുന്നോട്ട് വരണമെന്നും അദ്ദേഹം പറഞ്ഞു.
രാവിലെ കവടിയാര്‍ വിവേകാനന്ദ സമൃതി മണ്ഡപത്തില്‍ സര്‍ദാര്‍ വല്ലഭ്ഭായ് പട്ടേലിന്റെ ഛായാചിത്രത്തില്‍ ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍ പുഷ്പാഞ്ജലി അര്‍പ്പിച്ചു. തുടര്‍ന്ന് ആരംഭിച്ച ഏകതാ പദയാത്ര ഗവര്‍ണര്‍ ഫ്‌ളാഗ് ഓഫ് ചെയ്തു. മുന്‍ കേന്ദ്ര മന്ത്രി വി. മുരളീധരന്‍ പദയാത്രയില്‍ പങ്കെടുത്ത വോളണ്ടിയര്‍മാര്‍ക്ക് ഏകത പ്രതിജ്ഞ ചൊല്ലിക്കൊടുത്തു. സെന്‍ട്രല്‍ സ്റ്റേഡിയത്തില്‍ പദയാത്ര സമാപിച്ചു.
കവടിയാര്‍ വിവേകാനന്ദ സ്മൃതി മണ്ഡപത്തിലും സെന്‍ട്രല്‍ സ്‌റ്റേഡിയത്തിലെ പൊതു സമ്മേളനത്തിലുമായി നടന്ന പരിപാടികളില്‍ പ്രസ് ഇന്‍ഫര്‍മേഷന്‍ ബ്യൂറോ അഡീ. ഡയറക്ടര്‍ ജനറല്‍ വി. പളനിച്ചാമി, മേരാ യുവ ഭാരത് സ്റ്റേറ്റ് ഡയറക്ടര്‍ അനില്‍ കുമാര്‍ എം., കേരള യൂണിവേഴ്‌സിറ്റി ആന്റ് ഹെല്‍ത്ത് സയന്‍സ്, യൂണിവേഴ്‌സിറ്റി ഓഫ് കേരള വിസി ഡോ. മോഹനന്‍ കുന്നുമ്മല്‍, ഡിജിറ്റല്‍ യൂണിവേഴ്‌സിറ്റി വിസി സിസ തോമസ്, കായിക യുവജനക്ഷേമ വകുപ്പ് ഡയറക്ടര്‍ വിഷ്ണു രാജ, എന്‍സിസി ഡയറക്ടര്‍ കേണല്‍ പ്രമോദ്, സായി എല്‍എന്‍സിപിഇ പ്രിന്‍സിപ്പല്‍ ഡോ. ജി. കിഷോര്‍, സായി ആര്‍സിഎല്‍എന്‍സിപി ഡയറക്ടര്‍ എന്‍.എസ്. രവി, എന്‍എസ്എസ് റീജിയണല്‍ ഡയറക്ടര്‍ വൈ.എം. ഉപ്പിന്‍, ജില്ലാ യൂത്ത് ഓഫീസര്‍ സുഹാസ് എന്‍. എന്നിവര്‍ പങ്കെടുത്തു.
