തിരുവനന്തപുരം: ശബരിമല സ്വര്‍ണക്കൊള്ളയുമായി ബന്ധപ്പെട്ട് അന്വേഷണം നടത്തുന്ന പ്രത്യേക സംഘം സ്വര്‍ണം പൊതിഞ്ഞതിന്റെ രേഖകള്‍ പിടിച്ചെടുത്തു. ദേവസ്വം ആസ്ഥാനത്ത് നിന്നാണ് രേഖകള്‍ പിടിച്ചെടുത്തിരിക്കുന്നത്. വിജയ് മല്യ ഏത്ര അളവിലാണ് സ്വര്‍ണം പൊതിഞ്ഞത് എന്നതിന്റെ നിര്‍ണായക വിവരങ്ങള്‍ അന്വേഷണസംഘത്തിന് ലഭിച്ചെന്നാണ് സൂചന.
ശബരിമലയില്‍ ഏത്ര അളവില്‍ എന്തിലൊക്കെ സ്വര്‍ണം പൊതിഞ്ഞെന്ന് വ്യക്തമാക്കുന്ന രേഖകള്‍ ഹാജരാക്കണമെന്ന് പ്രത്യേക അന്വേഷണസംഘം ദേവസ്വം ബോര്‍ഡിന് നിര്‍ദേശം നല്‍കിയിരുന്നു. എന്നാല്‍ ദേവസ്വം ബോര്‍ഡിന്റെ അന്വേഷണത്തില്‍ സ്വര്‍ണം പൂശിയതിന്റെ രേഖകളൊന്നും കണ്ടെത്താന്‍ സാധിച്ചിരുന്നില്ല.
രേഖകള്‍ കണ്ടെത്താന്‍ ദേവസ്വം കമ്മീഷണറെയും സ്പെഷ്യല്‍ ഓഫിസറെയും ചുമതലപ്പെടുത്തിയെന്ന് ദേവസ്വം പ്രത്യേക അന്വേഷണസംഘത്തിന് മറുപടിയും നല്‍കിയിരുന്നു. തുടര്‍ന്ന് പ്രത്യേക അന്വേഷണസംഘം ദേവസ്വം ആസ്ഥാനത്ത് നടത്തിയ പരിശോധനയിലാണ് സ്വര്‍ണം പൂശിയതുമായി ബന്ധപ്പെട്ട നിര്‍ണായക രേഖകള്‍ കണ്ടെത്തിയത്.
വിജയ് മല്യ എത്ര അളവിലാണ് സ്വര്‍ണം പൊതിഞ്ഞതെന്നതില്‍ കൃത്യമായ വിവരമില്ലെന്നത് അന്വേഷണസംഘത്തെ കുഴക്കിയിരുന്നു. 30.8 കിലോയോളം സ്വര്‍ണം പൊതിഞ്ഞു എന്നതായിരുന്നു വിജയ് മല്യയുമായി ബന്ധപ്പെട്ട വൃത്തങ്ങള്‍ പറഞ്ഞിരുന്നത്. പുതിയ രേഖകള്‍ കണ്ടെത്തിയതോടെ നഷ്ടപ്പെട്ടത് എത്രമാത്രം സ്വര്‍ണമെന്ന് കൃത്യമായി കണ്ടെത്താന്‍ കഴിയും.
ഇതിന്റെ നിജസ്ഥിതി പരിശോധിക്കാനും നഷ്ടപ്പെട്ടത് എത്രമാത്രം സ്വര്‍ണമെന്ന് കൃത്യമായി കണ്ടെത്താനും പുതിയ രേഖകളുടെ വെളിച്ചത്തില്‍ അന്വേഷണസംഘത്തിന് സാധിക്കും.
