ഏകതയുടെ മനോജ്ഞ ശില്‍പം

182 മീറ്റര്‍ ഉയരത്തില്‍, സര്‍ദാര്‍ സരോവര്‍ അണക്കെട്ടിലെ ജലാശയത്തിന് നടുവിലുള്ള സാധു ബേട്ട് ദ്വീപിലാണ് ലോകത്തിലെ തന്നെ ഉയരം കൂടിയ ഈ പ്രതിമ. ഇന്ത്യയുടെ പ്രഥമ ആഭ്യന്തര മന്ത്രിയായിരുന്ന സര്‍ദാര്‍ വല്ലഭഭായ് പട്ടേലിന്റെ ശാശ്വത സ്മരണയ്‌ക്കായി പണിതീര്‍ത്ത ഈ പ്രതിമക്ക് അമേരിക്കയുടെ സ്വാതന്ത്ര്യ പ്രതിമ (statue of liberty) യുടെ രണ്ടിരട്ടി വലുപ്പമുണ്ട്. ആരംഭഘട്ടത്തില്‍ പല കോണുകളില്‍ നിന്നും വിമര്‍ശനങ്ങളെ അഗണ്യകോടിയില്‍ത്തള്ളി നിത്യേന പതിനായിരക്കണക്കിനു സന്ദര്‍ശകര്‍ ഇവിടെയെത്തുന്നു. മിക്കദിവസങ്ങളിലും 12 മണി ആകുമ്പോഴേക്കും ടിക്കറ്റ് തീര്‍ന്നു പോകുന്നു.

വെറുമൊരു പ്രതിമ മാത്രമല്ല അത്ഭുതങ്ങളുടെ ഒരു കലവറയാണ് ഇവിടെ സന്ദര്‍ശകരെ കാത്തിരിക്കുന്നത്. മ്യുസിയം, സ്മാരക ഉദ്യാനം, കണ്‍വന്‍ഷന്‍ സെന്റര്‍, പട്ടേലിന്റെ ജീവിതത്തിലെ പ്രധാന സംഭവങ്ങള്‍ ഉള്‍ക്കൊള്ളിച്ചുള്ള ലേസര്‍ ഷോ, 500 അടി ഉയരത്തില്‍ നിന്നും പട്ടേല്‍ പ്രതിമ കാണാനുള്ള സൗകര്യം എന്നിവ അതില്‍ ചിലതുമാത്രം. കൂടാതെ വാലി ഓഫ് ഫ്‌ലവര്‍ ഷോ, ബോട്ടിങ്, ട്രക്കിങ് . ഷോപ്പിങ് സൗകര്യവുമുണ്ട്.

കേവാഡിയയില്‍് നിന്ന് സൗജന്യമായി സന്ദര്‍ശകരെ പ്രത്യേക വാഹനങ്ങളില്‍ പ്രതിമ സ്ഥിതി ചെയ്യുന്ന സ്ഥലത്തേക്ക് എത്തിക്കും.

തുടക്കത്തില്‍ മോദി സര്‍ക്കാരിന്റെ ഈ മെഗാ ടൂറിസം പദ്ധതിയെ നിശിതമായി വിമര്‍ശിച്ചവര്‍ ഇപ്പോള്‍ നിശബ്ദരാണ്. കാരണം ഓരോ വര്‍ഷവും റിക്കാര്‍ഡ് വരുമാനം ആണ് ഇവിടെ നിന്ന് ലഭിക്കുന്നത്.

പിരമിഡുകളുടെ പേരില്‍ ഈജിപ്തും പിസാ ഗോപുരത്താല്‍ ഇറ്റലിയും അറിയപ്പെടുന്നതുപോലെ, ഒരിക്കല്‍ ‘ഇന്ത്യന്‍ ഐക്കണ്‍’ ആയിരുന്ന താജ് മഹലിനെയും അപ്രസക്തമാക്കുംവിധം പട്ടേല്‍ പ്രതിമ സപ്ത സംവത്സരംകൊണ്ട് ഭാരതീയ ശില്‍പ-വാസ്തു സംസ്‌കൃതിയുടെ മുഖമുദ്രയായി മാറിക്കഴിഞ്ഞു.

ഭാരതത്തിന്റെ ഉരുക്കു മനുഷ്യന്‍ സര്‍ദാര്‍ പട്ടേലിന്റെ 143-ാം ജന്മദിനത്തില്‍, 2018 ഒക്ടോബര്‍ 31-നാണ് ഈ പ്രതിമ രാജ്യത്തിന് സമര്‍പ്പിച്ചത്. ഇന്ത്യന്‍ ഏകീകരണത്തില്‍ പട്ടേലിന്റെ സംഭാവന അനുസ്മരിക്കുക എന്നതിലുപരി ഈ പ്രതിമ രാജ്യത്തിന്റെ ഐക്യത്തെയും ദേശസ്‌നേഹത്തെയുമാണ് ഇന്ന് പ്രതീകവല്‍ക്കരിക്കുന്നതും പ്രതിനിധീകരിക്കുന്നതും. ഭാരതത്തിന്റെ ആദ്യ ആഭ്യന്തര മന്ത്രിക്ക് ഒരു സ്മാരകം എന്നതിലുപരി പട്ടേല്‍ പ്രതിമ ഭാരത ടൂറിസ, പ്രാദേശിക വികസനങ്ങള്‍ക്കു നല്‍കിയ ഗതിവേഗവും ഇപ്പോള്‍ അതു നല്‍കുന്ന കോടികളുടെ വരുമാനവും കാണാതെ പോകരുത്.

വിനോദസഞ്ചാര മേഖലയില്‍ ലോകരാജ്യങ്ങളുമായി മത്സരിക്കാന്‍ ഭാരതം നടത്തിയ വലിയ ചുവടുവയ്‌പാണ് ഏക്താ നഗറിലെ പട്ടേല്‍ പ്രതിമ എന്ന് നിസ്സംശയം പറയാം. പട്ടേലിന്റെ 150-ാം ജന്മദിനം ആഘോഷിക്കുന്ന ഈ വേളയില്‍ അദ്ദേഹത്തിന്റെ അതുല്യവും അനുപമവുമായ സംഭാവനകളെ ഭക്ത്യാദരം സ്മരിക്കാം.

എന്തായാലും ലോകത്തിലെ ഏറ്റവും ഉയരം കൂടിയ പ്രതിമ ഭാരതത്തില്‍ ആണെന്നതില്‍ ഓരോ ഭാരതീയനും അഭിമാനിക്കാം. അതേ, ഈ പ്രതിമ ഭാരതീയ ശില്‍പസംസ്‌കൃതിയുടെ നിദര്‍ശനമാകുന്നതിനൊപ്പം ഏകതയുടെയും അഖണ്ഡതയുടേയും പ്രതീകം കൂടിയാകുന്നു.