എറണാകുളം: കലൂര്‍ സ്റ്റേഡിയത്തില് അതിക്രമിച്ചുകയറിയെന്ന് ജിസിഡിഎ നല്‍കിയ പരാതിയില്‍ പാലാരിവട്ടം പൊലീസ് കേസെടുത്തു.ഡി സി സി അധ്യക്ഷന്‍ മുഹമ്മദ് ഷിയാസിന്റെ നേതൃത്വത്തില്‍ അതിക്രമിച്ചു കയറിയെന്നായിരുന്നു പരാതി
അന്യായമായി സംഘം ചേര്‍ന്നു, അതിക്രമിച്ച് കയറി, സുരക്ഷാ ജീവനക്കാരെ കയ്യേറ്റം ചെയ്തു എന്നീ കുറ്റങ്ങളാണ് എഫ് ഐ ആറിലുളളത്. അര്‍ജന്റീന ഫുട്ബാള്‍ ടീമും മെസിയും കലൂര്‍ സ്റ്റേഡിയത്തില് കളിക്കുമെന്ന് പറഞ്ഞ് നവീകരണം നടത്തുമ്പോള്‍ ഇത് സംബന്ധിച്ച കരാറില്‍ വ്യക്തത ഇല്ലെന്ന് പറഞ്ഞാണ് കോണ്‍ഗ്രസ് നേതാക്കള്‍ സ്റ്റേഡിയത്തില് പരിശോധനയ്‌ക്ക് കഴിഞ്ഞ ദിവസം എത്തിയത്. ഇവരെ തടഞ്ഞ സുരക്ഷാ ജീവനക്കാരെ തളളി മാറ്റി സംഘം ഉളളില്‍ കടക്കുകയായിരുന്നു.
സ്റ്റേഡിയം നവീകരണത്തിന് തൃകക്ഷി കരാറുണ്ടെന്ന് പറയുമ്പോഴും അതാരൊക്കെ തമ്മിലെന്ന് വ്യക്തമാക്കാന്‍ ജിസിഡിഎ ചെയര്‍മാന്‍ തയാറായിട്ടില്ല. മെസിയുടെ വരവുമായി ബന്ധപ്പെട്ട് നടന്ന സാമ്പത്തിക ഇടപാടുകള്‍ അന്വേഷിക്കണമെന്ന ആവശ്യവും ഉയര്‍ന്നിട്ടുണ്ട്.കായിക മന്ത്രിയെ നയിക്കുന്നത് കച്ചവട താല്പര്യങ്ങളാണെന്നും സ്‌പോണ്‍സര്‍ക്ക് വേണ്ടി പണം ഇറക്കിയത് ചിട്ടിക്കമ്പനി മുതലാളിയാണെന്നും ഹൈബി ഈഡന്‍ എം പി കുറ്റപ്പെടുത്തി.
