അമ്പലപ്പുഴ : നിത്യ അന്നദാനമില്ലാത്ത അമ്പലപ്പുഴ ശ്രീകൃഷ്ണസ്വാമി ക്ഷേത്രത്തില് ദേവസ്വം ബോര്ഡ് ഭക്തരെ കബളിപ്പിക്കുന്നതായി പരാതി. നിത്യ അന്നദാനം ദേവസ്വം ബോര്ഡ് നിര്ത്തലാക്കിയിട്ടും അന്നദാനത്തിനായുള്ള കാണിക്കവഞ്ചി മാറ്റിയിട്ടില്ല. ക്ഷേത്രത്തില് വരുന്ന ഭക്തര് ഇപ്പോഴും ഈ കാണിക്കവഞ്ചിയില് പണം നിക്ഷേപിക്കുകയാണ്. ജൂണ് 21 ന് ആണ് നഷ്ടത്തിന്റെ കണക്കു പറഞ്ഞ് അന്നദാനം നിര്ത്തലാക്കിയത്.
അന്നദാനം തുടരണമെങ്കില് ക്ഷേത്രം മാനേജര് സ്വന്തമായി സ്പോണ്സര്മാരെ കണ്ടെത്തണം എന്നായിരുന്നു ദേവസ്വം ബോര്ഡ് ഇറക്കിയ ഉത്തരവ്. ഇക്കാരണത്താല് കഴിഞ്ഞ നാലു മാസമായി ഉച്ചസമയത്തെ അന്നദാനമില്ല. ശബരിമല, നിലയ്ക്കല്, എരുമേലി, പമ്പ എന്നിവിടങ്ങളില് മാത്രം അന്നദാനം മതിയെന്ന നിലപാടിലാണ് ദേവസ്വം ബോര്ഡ്.
അമ്പലപ്പുഴ ക്ഷേത്രത്തിന്റെ വടക്കുഭാഗത്ത് സ്ഥിതി ചെയ്യുന്ന അന്നദാനപ്പുരയിലാണ് കഴിഞ്ഞ ഇരുപതു വര്ഷമായി ഭക്തര്ക്ക് ഉച്ചയ്ക്ക് 12 മുതല് ഒരു മണി വരെ സൗജന്യമായി ഭക്ഷണം നല്കി വന്നിരുന്നത്. കൊവിഡിനെ തുടര്ന്ന് നാല് വര്ഷക്കാലം നിര്ത്തിവെച്ചിരുന്ന അന്നദാനം ഭക്തരുടെ നിരന്തര ആവശ്യത്തെ തുടര്ന്ന് പുനരാരംഭിക്കുകയായിരുന്നു. ഇതാണ് വീണ്ടും നിര്ത്തലാക്കിയത്.
ഞായര്, വ്യാഴം ദിവസങ്ങളില് നൂറു പേര്ക്കും മറ്റ് ദിവസങ്ങളില് 50 പേര്ക്കുമാണ് ദിനംപ്രതി അന്നദാനം നല്കി വന്നിരുന്നത്. ഇതിനായി അന്നദാനസംഭാവന എന്ന പേരില് ഭക്തരില് നിന്ന് ഒരാള്ക്ക് 30 രൂപ എന്ന കണക്കില് വാങ്ങുകയും ഇതില് 12 രൂപ ദേവസ്വം എടുത്ത ശേഷം ബാക്കി 18 രൂപ അന്നദാനം വിതരണം കരാര് എടുത്തവര്ക്കും നല്കി വന്നിരുന്നു. ഒരു ദിവസം 5000 പേര്ക്ക് അന്നദാനത്തിനായി ഏതെങ്കിലും ഭക്തര് പണം അടച്ചാലും ദേവസ്വം ബോര്ഡ് നിശ്ചയിച്ച 50 പേര്ക്ക് മാത്രമാണ് അന്നദാനം നല്കി വന്നിരുന്നത്.
കേരളത്തില് ഗുരുവായൂര് ക്ഷേത്രം പോലെ പ്രാധാന്യമുള്ള ക്ഷേത്രമായ അമ്പലപ്പുഴയില് അന്നദാന സംഭാവന എന്ന പേരില് ലക്ഷങ്ങളാണ് ദേവസ്വം ബോര്ഡ് പിരിച്ചെടുക്കുന്നത്. കൂടാതെ അന്ന ദാന കാണിക്ക ഇനത്തിലും നല്ലൊരു തുക ഭക്തരില് നിന്നും ദേവസ്വം ബോര്ഡിന് ലഭിക്കുന്നുണ്ട്. എന്നിട്ടും ലാഭമില്ലെന്ന കാരണം പറഞ്ഞ് അന്നദാനം നിര്ത്തലാക്കിയതിനെതിരെ ശക്തമായ പ്രതിഷേധമാണ് ഭക്തരില്നിന്ന് ഉയരുന്നത്.
