കോട്ടയം : ദേശീയ വിദ്യാഭ്യാസ നയത്തിന്റെ അനിവാര്യമായ പിഎം ശ്രീയില്‍ ഭാഗമാകാന്‍ തീരുമാനിച്ചശേഷം സിപിഐ നടത്തുന്നത് സ്വര്‍ണ കവര്‍ച്ച വഴിമാറ്റാനുള്ള ചക്കളത്തില്‍ പോരാട്ടമാണെന്ന് ബി.ജെ പി നേതാവ് എന്‍. ഹരി . ഒരിക്കല്‍ ശബരിമലയെ തൊട്ടു കൈ പൊള്ളിയ ഇടതു മുന്നണി ജനമനസുകളില്‍ നിന്നും ആ വികാരം മായ്ച്ചു കളയാനുള്ള സംഘടിത ശ്രമമാണെന്ന് നടത്തുന്നത്. ശബരിമല സ്വര്‍ണക്കൊള്ളയ്‌ക്കെതിരെ ജ്വലിക്കുന്ന ജനവികാരം വഴി തിരിച്ചുവിടാനാണ് ഇപ്പോഴത്തെ സമരങ്ങളിലു’ടെ ലക്ഷ്യമിടുന്നത്.
സ്വതന്ത്ര ഭാരതം കണ്ട ഏറ്റവും വലിയ ക്ഷേത്ര സ്വര്‍ണകൊള്ളയില്‍ നിന്നു ശ്രദ്ധ തിരിച്ച് ഭരണ മുന്നണിയുടെ മുഖം രക്ഷിക്കുന്നതിനുള്ള കമ്മ്യൂണിസ്റ്റ് തന്ത്രമാണിത്. ഇതിനെ കേരളം തിരിച്ചറിഞ്ഞു കഴിഞ്ഞു.
ഇന്‍ഡി സഖ്യത്തിലെ വല്യേട്ടനായ കോണ്‍ഗ്രസും ശബരിമല സ്വര്‍ണക്കവര്‍ച്ച മറയ്‌ക്കാന്‍ പരോക്ഷമായി സഹായിക്കുന്നു.ദേശീയ മുന്നണിയുടെ പരസ്പര സഹായ സഹകരണ സംഘമാണ് ഇവിടെ പ്രവര്‍ത്തിക്കുന്നത്.
രാജ്യത്തെ വിദ്യാഭ്യാസ ധാരയ്‌ക്കൊപ്പം കേരളത്തെയും ചേര്‍ക്കുന്ന പി എം ശ്രീ
യുടെ ഭാഗമാകുക എന്നത് ഒരു സാധാരണ നടപടിക്രമം മാത്രമാണ്. ജനാധിപത്യ രാജ്യത്ത് ഒരേ വീക്ഷണമുള്ള ഭാവി തലമുറയെ സൃഷ്ടിക്കുന്നതിന് അനുവര്‍ത്തിക്കേണ്ട നടപടി മാത്രം.
സംസ്ഥാന മന്ത്രിസഭ
തീരുമാനം അനുസരിച്ച് ന്യൂദല്‍ഹിയില്‍ പോയി പദ്ധതിയുടെ ഭാഗമായ ശേഷം സിപിഐ തങ്ങള്‍ ഇരുട്ടില്‍ ആണെന്ന് പറയുന്നത് ആരെ കബളിപ്പിക്കുന്നതിനാണ്. അത്ര എതിര്‍പ്പ് ഉണ്ടായിരുന്നെങ്കില്‍ സിപിഐ ആണത്തമുള്ള പ്രതിഷേധം പ്രകടിപ്പിക്കുമായിരുന്നു. മുന്നണി വിട്ട് പുറത്തു വരാനുള്ള തീരുമാനമെടുക്കാനുള്ള ചങ്കൂറ്റമുണ്ടോ. ഉണ്ടെങ്കില്‍ അത് തെളിയിക്കാന്‍ വെല്ലുവിളിക്കുന്നു.
മുന്നണിയുടെ പ്രതിസന്ധി ഘട്ടങ്ങളിലെല്ലാം മറ്റൊരു വിവാദം ഉണ്ടാക്കി ശ്രദ്ധ തിരിക്കാന്‍ വല്യേട്ടനെ സഹായിക്കുന്നത് സിപിഐയുടെ പതിവാണ്. അതാണ് പ്രതിഷേധത്തിന്റെയും സമരത്തിന്റെയും രൂപത്തില്‍ സിപിഐയും യുവജന സംഘടനകളും ചെയ്യുന്നത്.
തദ്ദേശ സ്വയംഭരണ തെരഞ്ഞെടുപ്പിന് മുമ്പ് ശബരിമല സ്വര്‍ണ്ണപ്പാളി കവര്‍ച്ചയില്‍ നിന്നും കരകയറുക എന്നതാണ് മുന്നണി ലക്ഷ്യമിടുന്നത്.അതിന് തന്നാലായത് സിപിഐ ചെയ്യുന്നു.ഉദ്ദിഷ്ട കാര്യങ്ങള്‍ക്ക് ഉപകാരസ്മരണ വേണമല്ലോ.തുടര്‍ഭരണത്തിന്റെ മനപ്പായസം ഉണ്ണുന്ന സിപിഎമ്മിന് ഊര്‍ജ്ജം പകരുകയാണ് സിപിഐ ചെയ്യുന്നതെന്നും എന്‍. ഹരി പറഞ്ഞു.
