പട് ന: ജനതാദള്‍ (യുണൈറ്റഡ്) നേതാവ് നിതീഷ് കുമാറിനെ മുഖ്യമന്ത്രിയാക്കില്ലെന്ന ലാലുപ്രസാദ് യാദവിന്റെ മകന്‍ തേജസ്വി യാദവിന്റെ വെല്ലുവിളിക്ക് മറുപടി നല്‍കി പ്രധാനമന്ത്രി മോദി. ബീഹാറില്‍ നിതീഷ് കുമാര്‍ തന്നെയാണ് മുഖ്യമന്ത്രിയാകുകയെന്നും മോദി പറഞ്ഞു. ഇന്ത്യാ ടുഡേ റിപ്പോര്‍ട്ടിലാണ് ഈ വെളിപ്പെടുത്തല്‍.
ബിജെപി നിതീഷ് കുമാറിനെ മുഖ്യമന്ത്രിയാക്കാന്‍ പോകുന്നില്ലെന്ന തേജസ്വി യാദവിന്റെ പ്രസ്താവനയ്‌ക്ക് കടുത്ത മറുപടി നല്‍കുകയായിരുന്നു മോദി. ഇതാദ്യമായാണ് എന്‍ഡിഎയുടെ മുഖ്യമന്ത്രി സ്ഥാനാര്‍ത്ഥിയായി മോദി നിതീഷ് കുമാറിനെ പ്രഖ്യാപിക്കുന്നത്. മുന്‍ വര്‍ഷങ്ങളുടേതിനേക്കാള്‍ റെക്കോഡ് ഭൂരിപക്ഷത്തോടെ ഇക്കുറി എന്‍ഡിഎ വിജയിക്കുമെന്നും മോദി പറഞ്ഞു.
മഹാഘട്ബന്ധന്‍ കഴിഞ്ഞ ദിവസം മുഖ്യമന്ത്രി സ്ഥാനാര്‍ത്ഥിയായി തേജസ്വി യാദവിനെ പ്രഖ്യാപിച്ചിരുന്നു. അതിന് തൊട്ടുപിന്നാലെയാണ് മോദി നിതീഷ് കുമാറിന്റെ പേര് എന്‍ഡിഎ മുഖ്യമന്ത്രിസ്ഥാനാര്‍ത്ഥിയായി പ്രഖ്യാപിച്ചത്. തെരഞ്ഞെടുപ്പ് തന്ത്രത്തിന്റെ ഭാഗമാണ് സമയോചിതമായ മോദിയുടെ ഈ നീക്കമെന്ന് കരുതുന്നു. ഒരു പക്ഷം മുഖ്യമന്ത്രിസ്ഥാനാര്‍ത്ഥിയെ പ്രഖ്യാപിക്കുകയും അതിനെച്ചൊല്ലി പരിഹാസം ഉയര്‍ത്തുകയും ചെയ്യുമ്പോള്‍ അതിന് അതേ നാണയത്തില്‍ മറുപടി നല്‍കാന്‍ വൈകിക്കൂടെന്ന വിലയിരുത്തലാകാം മോദി ബീഹാര്‍ മുഖ്യമന്ത്രിസ്ഥാനത്തേക്ക് നിതീഷ് കുമാറിനെ പ്രഖ്യാപിക്കാന്‍ കാരണം.
