കോട്ടയം: വിദ്യാഭ്യാസ സ്ഥാപനങ്ങള്‍ ഭാവിയെ രൂപപ്പെടുത്തുന്ന വര്‍ക്ക്ഷോപ്പുകളാണെന്ന് രാഷ്ട്രപതി ദ്രൗപദി മുര്‍മു. സമഗ്ര പഠനത്തിനും സാമൂഹ്യ നീതിക്കും ഊന്നല്‍ നല്കിക്കൊണ്ടുള്ള സെന്റ് തോമസ് കോളജിന്റെ സേവനം അഭിനന്ദനാര്‍ഹമാണെന്നും അവര്‍ പറഞ്ഞു, പാലാ സെന്റ് തോമസ് കോളജിന്റെ പ്ലാറ്റിനം ജൂബിലി ആഘോഷങ്ങളുടെ സമാപനം ഉദ്ഘാടനം ചെയ്യുകയായിരുന്നു രാഷ്ട്രപതി.
വിദ്യകൊണ്ട് പ്രബുദ്ധരാകുക എന്നു പറഞ്ഞ ശ്രീനാരായണ ഗുരുദേവന്റെ ശിവഗിരിയില്‍ നിന്നാണ് ഞാന്‍ വരുന്നത്. സാമൂഹികവും വിദ്യാഭ്യാസപരവുമായ പരിവര്‍ത്തനങ്ങളുടെ മഹത്തായ അധ്യായങ്ങള്‍ക്ക് കോട്ടയം സാക്ഷ്യം വഹിച്ചിട്ടുണ്ടെന്ന് പറഞ്ഞ അവര്‍ തൊട്ടുകൂടായ്‌മ നിര്‍മാര്‍ജനത്തിനായുള്ള ‘വൈക്കം സത്യഗ്രഹം’ എന്നറിയപ്പെടുന്ന മഹത്തായ പ്രസ്ഥാനം നൂറു വര്‍ഷങ്ങള്‍ക്ക് മുമ്പ് കോട്ടയത്താണ് നടന്നതെന്നും പറഞ്ഞു. ജനങ്ങള്‍ വളരെ സജീവമായി പ്രവര്‍ത്തിച്ചതിന്റെ ഫലമായാണ് ‘സാക്ഷര കേരളം’ പ്രസ്ഥാനം ശക്തിപ്പെട്ടത്.
വളരെ ലളിതവും എന്നാല്‍ ശക്തവുമായ ‘വായിച്ചു വളരുക’ എന്ന സന്ദേശത്തില്‍ നിന്നാണ് പി.എന്‍. പണിക്കര്‍, ഗ്രന്ഥശാല പ്രസ്ഥാനത്തിലൂടെ പഠനം പ്രോത്സാഹിപ്പിക്കാനുള്ള മഹത്തായ സംരംഭത്തിനുള്ള പ്രചോദനം ഉള്‍ക്കൊണ്ടത്. സാക്ഷരതയുടേയും വിദ്യാഭ്യാസത്തിന്റേയും ഉറവിടമായതിനാല്‍ കോട്ടയം ‘അക്ഷരനഗരി’യാണ്. കേരളത്തിലെ ആദ്യത്തേതും ഭാരതത്തിലെ ആദ്യകാല അച്ചടിശാലകളില്‍ ഒന്നുമായ അച്ചടിശാല കോട്ടയത്താണ് സ്ഥാപിതമായത്. സാക്ഷരത, വിദ്യാഭ്യാസം, അറിവ് എന്നിവയുടെ ശക്തി നിരവധി മാനവ വികസന മാനദണ്ഡങ്ങളില്‍ കേരളത്തെ മുന്‍നിര സംസ്ഥാനങ്ങളില്‍ ഒന്നാകാന്‍ പ്രാപ്തമാക്കി.
കായികരംഗത്തെ മികവ് പ്രോത്സാഹിപ്പിക്കുന്നതിന് കോളജ് പ്രത്യേക അഭിനന്ദനം അര്‍ഹിക്കുന്നു. മുന്‍ രാഷ്ട്രപതി കെ.ആര്‍. നാരായണനെയും അവര്‍ ചടങ്ങില്‍ അനുസ്മരിച്ചു. തിരുവനന്തപുരത്തെ രാജ്ഭവനില്‍, അദ്ദേഹത്തിന്റെ പ്രതിമ അനാച്ഛാദനം ചെയ്യാന്‍ എനിക്ക് ഭാഗ്യം ലഭിച്ചു. ഇപ്പോള്‍, അദ്ദേഹത്തിന്റെ ജന്മസ്ഥലത്തിനടുത്തു നിന്ന് ഞാന്‍ വീണ്ടും അദ്ദേഹത്തിന്റെ ഓര്‍മകളെ വിനയപൂര്‍വം അഭിവാദ്യം ചെയ്യുന്നുവെന്നും രാഷ്ട്രപതി പറഞ്ഞു.
പ്രശസ്തര്‍ക്ക് ജന്മം നല്‍കിയ കോളജാണിത്. സാക്ഷരത കൊണ്ട് മുന്നേറുന്ന കേരളം രാജ്യത്തിന് അഭിമാനമാണെന്ന് ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍ പറഞ്ഞു. കേന്ദ്രമന്ത്രി ജോര്‍ജ് കുര്യന്‍, മന്ത്രി വി.എന്‍. വാസവന്‍, മന്ത്രി റോഷി അഗസ്റ്റിന്‍, കോളജ് പ്രിന്‍സിപ്പല്‍ ഡോ. സിബി ജെയിംസ് എന്നിവര്‍ സംസാരിച്ചു.
കോളജിന്റെ ഉപഹാരം പാലാ രൂപതാ അധ്യക്ഷന്‍ മാര്‍ ജോസഫ് കല്ലറങ്ങാട്ട് സമ്മാനിച്ചു. എംപിമാരായ ജോസ് കെ. മാണി, കെ. ഫ്രാന്‍സിസ് ജോര്‍ജ്, മാണി സി. കാപ്പന്‍ എംഎല്‍എ എന്നിവര്‍ പങ്കെടുത്തു. പാലാ സെന്റ് തോമസിലെ ചടങ്ങിന് ശേഷം രാഷ്ട്രപതി കുമരകത്തേക്ക് മടങ്ങി. ഇന്ന് രാവിലെ കുമരകത്തെ ബോട്ടിങ്ങിന് ശേഷം കൊച്ചിയിലേക്ക് മടങ്ങും.
