ന്യൂദല്ഹി: ദീപാവലിക്ക് സമ്മാനമായി ഫാസ്ടാഗ് വാര്ഷിക പാസ് നല്കാം. ഈ പാസ് രാജ്യത്തുടനീളമുള്ള ദേശീയപാതകളിലും ദേശീയ എക്സ്പ്രസ് വേകളിലും വര്ഷം മുഴുവന് സുഗമമായ യാത്ര സാധ്യമാക്കും.
രാജ്മാര്ഗ് യാത്ര ആപ്പ് വഴി വാര്ഷിക പാസ് സമ്മാനമായി നല്കാം. ആപ്പിലെ ആഡ് പാസ് എന്ന ഓപ്ഷനില് ക്ലിക്ക് ചെയ്ത് ഫാസ്ടാഗ് വാര്ഷിക പാസ് സമ്മാനമായി നല്കാന് ആഗ്രഹിക്കുന്ന വ്യക്തിയുടെ വാഹന നമ്പറും ബന്ധപ്പെടാനുള്ള വിശദാംശങ്ങളും നല്ക്കുക. ഒടിപി അധിഷ്ഠിത പരിശോധനക്ക് ശേഷം, ആ വാഹനത്തില് ഘടിപ്പിച്ചിരിക്കുന്ന ഫാസ്ടാഗില് വാര്ഷിക പാസ് സജീവമാകും. ദേശീയപാത ഉപയോക്താക്കള്ക്ക് സുഗമവും സാമ്പത്തികവുമായ യാത്രയ്ക്ക്, ഫാസ്ടാഗ് വാര്ഷിക പാസ് വഴിയൊരുക്കുന്നു.
ഭാരതത്തിലുടനീളമുള്ള ഏകദേശം 1,150 ടോള് പ്ലാസകളില് ഇത് ബാധകമാണ്.
ഫാസ്ടാഗ് ഇടയ്ക്കിടെ റീചാര്ജ് ചെയ്യേണ്ടതിന്റെ ആവശ്യകത ഇല്ലെന്നതാണ് വാര്ഷിക പാസിന്റെ സവിശേഷത. ഒരു വര്ഷത്തെ സമയപരിധി അല്ലെങ്കില് 200 ടോള് പ്ലാസ ക്രോസിംഗുകള്ക്കായി 3,000 രൂപ ഒറ്റത്തവണ ഫീസ് അടയ്ക്കാം. സാധുവായ ഫാസ്ടാഗുള്ള എല്ലാ വാണിജ്യേതര വാഹനങ്ങള്ക്കും ഈ പാസ് ബാധകമാണ്. രാജ്മാര്ഗ് യാത്ര ആപ്പ് വഴി ഒറ്റത്തവണ ഫീസ് അടച്ച ശേഷം വാഹനവുമായി ബന്ധിതമായിട്ടുള്ള നിലവിലുള്ള ഫാസ്ടാഗില് രണ്ട് മണിക്കൂറിനുള്ളില് വാര്ഷിക പാസ് സജീവമാകും. 2025 ആഗസ്ത് 15ന് ആരംഭിച്ച ഫാസ്ടാഗ് വാര്ഷിക പാസ്, രണ്ട് മാസത്തിനുള്ളില് ഏകദേശം 25 ലക്ഷം ഉപയോക്താക്കളുമായി 5.67 കോടി ഇടപാടുകള് നടത്തി.
