ശബരിമല: ശബരിമല നട തുലാമാസ പൂജകള്‍ക്കായി തുറന്നു. തന്ത്രി കണ്ഠര് മഹേഷ് മോഹനരുടെ സാന്നിധ്യത്തില്‍ മേല്‍ശാന്തി അരുണ്‍കുമാര്‍ നമ്പൂതിരി നടതുറന്ന് ദീപം
തെളിയിച്ചു. സാധാരണ മാസപൂജയ്‌ക്കായി വൈകീട്ട് അഞ്ചിനാണ് നട തുറക്കുന്നതെങ്കിലും ദ്വാരപാലക ശില്പങ്ങളില്‍ നവീകരിച്ച സ്വര്‍ണപ്പാളികള്‍ ഉറപ്പിക്കാനുള്ളതിനാല്‍ ഇക്കുറി നാലുമണിക്കേ തുറന്നു.
അതിനുശേഷം, നിറം മങ്ങിയതിന്റെ പേരില്‍, സ്പെഷ്യല് കമ്മിഷണറെ അറിയിക്കാതെ കഴിഞ്ഞ മാസം ദ്വാരപാലക ശില്‍പത്തില്‍ നിന്നും അഴിച്ചെടുത്ത 12 സ്വര്‍ണ പാളികളും പുതുക്കിയശേഷം ഇന്നലെ പുനസ്ഥാപിച്ചു. സ്വര്‍ണം പൂശി, സ്‌ട്രോങ് റൂമില്‍ സൂക്ഷിച്ചിരുന്ന സ്വര്‍ണപ്പാളികളാണ് ശ്രീകോവിലിന് മുന്നില്‍ എത്തിച്ചത്. തുടര്‍ന്ന് ഒരു മണിക്കൂറിനുള്ളില്‍ ദ്വാരപാലക ശില്‍പത്തില്‍ പാളികള്‍ സ്ഥാപിച്ചു.
2019ല്‍ ഉണ്ണികൃഷ്ണന്‍ പോറ്റി ദ്വാരപാലക പാളികള്‍ ചെന്നൈ സ്മാര്‍ട് ക്രിയേഷന്‍സില്‍ എത്തിച്ച് സ്വര്‍ണ കവചം അഴിച്ചുമാറ്റിയ ശേഷമാണ് സ്വര്‍ണം പൂശിയത്. അഞ്ചുവര്‍ഷം കഴിഞ്ഞതോടെ പാളികളുടെ നിറം മങ്ങിയതിനെ തുടര്‍ന്നാണ് കഴിഞ്ഞ മാസം അഴിച്ചെടുത്ത് വീണ്ടും സ്വര്‍ണം പൂശാനായി പോറ്റി ചെന്നൈ സ്മാര്‍ട് ക്രിയേഷന്‍സില്‍ എത്തിച്ചത്. ആരോരുമറിയാതെ നടത്തിയ ഈ രഹസ്യ നീക്കത്തെപ്പറ്റി ദേവസ്വം കമ്മിഷണര്‍ ഹൈക്കോടതിയില്‍ റിപ്പോര്‍ട്ട് നല്‍കി. ഹൈക്കോടതി ഇടപെട്ടതിനെ തുടര്‍ന്നാണ് 2019ലെ വിവാദ ഇടപെടലുകള്‍ പുറത്തുവന്നത്.
ദേവസ്വം ബോര്‍ഡ് പ്രസിഡന്റ് അഡ്വ. പി.എസ്. പ്രശാന്ത്, അംഗങ്ങളായ അഡ്വ. എ. അജികുമാര്‍, അഡ്വ. പി.ഡി. സന്തോഷ് കുമാര്‍, ശബരിമല സ്പെഷ്യല് കമ്മിഷണര്‍ ആര്‍. ജയകൃഷ്ണന്‍, തിരുവാഭരണം കമ്മിഷണര്‍ ആര്‍. രജിലാല്‍, ദേവസ്വം വിജിലന്‍സ് എസ്പി സുനില്‍കുമാര്‍, ശബരിമല എക്‌സി. ഓഫീസര്‍ ഒ.ജി. ബിജു അഡ്മിനിസ്‌ട്രേറ്റീവ് ഓഫീസര്‍ ശ്രീനിവാസ്, ദേവസ്വം സ്മിത്ത്, ദേവസ്വം മരാമത്ത് ഉദ്യോഗസ്ഥര്‍ എന്നിവരുടെ സാന്നിധ്യത്തിലാണ് സ്വര്‍ണം പൂശിയ പാളികള്‍ പുനസ്ഥാപിച്ചത്.
പുനസ്ഥാപിച്ചശേഷം തന്ത്രി കണ്ഠര് മഹേഷ് മോഹനരുടെ കാര്‍മികത്വത്തില്‍ ശുദ്ധിപൂജകള്‍ നടന്നു. ഇന്ന് രാവിലെ 5 മണിക്ക് നടതുറക്കും. 7 മണിക്കാണ് ശബരിമല, മാളികപ്പുറം ക്ഷേത്രങ്ങളിലെ മേല്‍ശാന്തിമാരെ തെരഞ്ഞെടുക്കുന്നതിനുള്ള നറുക്കെടുപ്പ്.
പന്തളം കൊട്ടാരത്തിലെ കുട്ടികളായ കശ്യപ് വര്‍മ ശബരിമല മേല്‍ശാന്തിയെയും മൈഥിലി കെ. വര്‍മ മാളികപ്പുറം മേല്‍ശാന്തിയെയും നറുക്കെടുക്കും. തുലാമാസ പൂജയുടെ അവസാന ദിവസമായ 22 നാണ് രാഷ്‌ട്രപതി ദ്രൗപതിമുര്‍മു ദര്‍ശനം നടത്തുക.
