കോഴിക്കോട്: താമരശേരിയിലെ ഒന്പതുകാരി അനയയുടെ മരണം ചികിത്സാ പിഴവുമൂലമെന്ന് ആരോപിച്ച് അന്വേഷണം ആവശ്യപ്പെട്ട് അമ്മ.താമരശേരി ഡിവൈഎസ്പിക്ക് പരാതി നല്കി.
നേരത്തെ ഉന്നയിച്ച കാര്യങ്ങള് പോസ്റ്റ്മോര്ട്ടം റിപ്പോര്ട്ടിലൂടെ തെളിഞ്ഞു. ആശുപത്രിയിലെ ഡോക്ടര്മാര് വേണ്ടതു പോലെ ശ്രദ്ധിച്ചില്ല. പ്രാഥമിക ചികിത്സ പോലും കൃത്യമായി നല്കിയില്ല.
തലേന്ന് വരെ ആരോഗ്യവതിയായിരുന്ന കുട്ടിയാണ് അടുത്ത ദിവസം മരിച്ചത്. അന്ന് കുട്ടിയെ ചികിത്സിച്ച ഡോക്ടര്മാര്ക്കെതിരെ നടപടി എടുക്കണം. മരണത്തില് ആരോഗ്യ വകുപ്പിനും പരാതി നല്കുമെന്ന് കുട്ടിയുടെ അമ്മ പറഞ്ഞു.
അനയയുടെ മരണം ഇന്ഫ്ളുവന്സ എ അണുബാധ മൂലമുള്ള വൈറല് ന്യൂമോണിയയുടെ സങ്കീര്ണതകള് കാരണമാണെന്നാണ് പോസ്റ്റുമോര്ട്ടം റിപ്പോര്ട്ടില് പറയുന്നത്.എന്നാല് കുട്ടി മരിച്ചത് അമീബിക് മസ്തിഷ്ക ജ്വരം മൂലമാണെന്നായിരുന്നു ആരോഗ്യ വകുപ്പ് നേരത്തെ അറിയിച്ചത്.
കുട്ടി മരിച്ചതില് പ്രകോപിതനായി പിതാവ് താമരശേരിയിലെ ആശുപത്രിയിലെ ഡോക്ടറെ വെട്ടി പരിക്കേല്പ്പിച്ചത് ഡോക്ടര്മാരുടെ പ്രതിഷേധത്തിന് കാരണമായിരുന്നു. പരിക്കേറ്റ ഡോക്ടര് ആശുപത്രി വിട്ടു. കുട്ടിയുടെ പിതാവ് റിമാന്ഡിലാണ്.
