പുടിന്റെ ഇന്ത്യന്‍ പ്രേമം കൂടുന്നു…ഇന്ത്യയ്‌ക്ക് അസംസ്കൃത എണ്ണ വീണ്ടും വിലകുറച്ചുനല്‍കുമെന്ന് റഷ്യ; ഇന്ത്യ നവമ്പറില്‍ കൂടുതല്‍ റഷ്യന്‍ എണ്ണ വാങ്ങും

ന്യൂദല്‍ഹി: ഇന്ത്യയ്‌ക്ക് അസംസ്കൃത എണ്ണ വീണ്ടും വിലകുറച്ചുനല്‍കുമെന്ന് റഷ്യന്‍ പ്രസിഡന്‍റ് വ്ളാഡിമിര്‍ പുടിന്‍. നേരത്തെ ഇന്ത്യയ്‌ക്ക് ബാരലിന് ഒരു ഡോളര്‍ വീതമാണ് ഡിസ്കൗണ്ട് നല്‍കിയിരുന്നതെങ്കില്‍ നവമ്പര്‍ ഇറക്കുമതിയ്‌ക്ക് രണ്ടു മുതല്‍ 2.5 ഡോളര്‍ വരെ ഡിസ്കൗണ്ട് നല്‍കുമെന്ന് റഷ്യ അറിയിച്ചിട്ടുണ്ട്. ഇന്ത്യയിലെ ജനങ്ങള്‍ക്കുള്ള ഊര്‍ജ്ജ സുരക്ഷ ഉറപ്പാക്കാനുള്ള മോദി സര്‍ക്കാരിന്റെ കരുതലിന് റഷ്യ വീണ്ടും കൈത്താങ്ങാവുകയാണ്. മാത്രമല്ല, റഷ്യന്‍ എണ്ണയില്‍ നിന്നുള്ള ലാഭം സര്‍ക്കാരിന്റെ മറ്റ് ജനക്ഷേമ-വികസനപദ്ധതികള്‍ക്ക് കൂടി ഊര്‍ജ്ജം പകരുന്നുണ്ട്. റഷ്യന്‍ എണ്ണ വാങ്ങരുതെന്ന അമേരിക്കന്‍ പ്രസിഡന്‍റ് ട്രംപിന്റെ വിലക്കുകള‍ും സമ്മര്‍ദ്ദങ്ങളും അതിജീവിച്ച് ഇന്ത്യ അതിന് മുതിരുന്നത് ഇന്ത്യയുടെ സമ്പദ് വ്യവസ്ഥയുടെ ഭാവി ഓര്‍ത്തിട്ടാണ്.

ഇതോടെ റഷ്യയില്‍ നിന്നുള്ള അസംസ്കൃത എണ്ണയുടെ ഇറക്കുമതി ഇന്ത്യ വര്‍ധിപ്പിച്ചേക്കും. ഒരു ഡോളര്‍ അധികമായി ഡിസ്കൗണ്ട് ലഭിച്ചാല്‍ പോലും കോടികളുടെ ലാഭം ഇന്ത്യയ്‌ക്ക് ലഭിക്കും. എണ്ണവില ഉയര്‍ന്നപ്പോള്‍ പോലും മോദി സര്‍ക്കാരിന് പെട്രോള്‍, ഡീസല്‍ വില പിടിച്ചുനിര്‍ത്താനായി എന്നത് വിലക്കയറ്റത്തെ തടഞ്ഞുനിര്‍ത്തുന്നതില്‍ വലിയ പങ്കുവഹിച്ചിട്ടുണ്ട്. 2022ല്‍ റഷ്യ-ഉക്രൈന്‍ യുദ്ധം പൊട്ടിപ്പുറപ്പെട്ടപ്പോള്‍ എണ്ണവില പൊടുന്നനെ കുതിച്ചുയര്‍ന്നിരുന്നു. 2021-22 സാമ്പത്തിക വര്‍ഷത്തെ ആദ്യ പകുതിയില്‍ ഇന്ത്യയുടെ മൂന്ന് എണ്ണ വിപണനകമ്പനികളുടെ (ഇന്ത്യന്‍ ഓയില്‍ കോര്‍പറേഷന്‍, ഭാരത് പെട്രോളിയം കോര്‍പറേഷന്‍, ഹിന്ദുസ്ഥാന്‍ പെട്രോളിയം കോര്‍പറേഷന്‍) ലാഭം 28,300 കോടി ആയിരുന്നെങ്കില്‍, റഷ്യ-ഉക്രൈയന്‍ യുദ്ധത്തിന് ശേഷമുള്ള വിലക്കയറ്റം കാരണം ഈ മൂന്ന് പൊതുമേഖലാസ്ഥാപനങ്ങളുടെയും 2022-23 സാമ്പത്തിക വര്‍ഷത്തിലെ ആദ്യ ആറുമാസത്തെ നഷ്ടം 27,200 കോടി രൂപയായിരുന്നു. അപ്പോള്‍ പോലും കേന്ദ്രസര്‍ക്കാര്‍ ആ എണ്ണവിലയിലെ സമ്മര്‍ദ്ദം ജനങ്ങള്‍ക്ക് കൈമാറിയില്ല. ഇതിനിടെ 2021 നവമ്പര്‍ നാലിനും 2022 മെയ് 22നും രണ്ട് തവണ കേന്ദ്രസര്‍ക്കാര്‍ ഇന്ധനത്തിനുള്ള കേന്ദ്ര എക്സൈസ് തീരുവ കുറച്ചു. ഇതുവഴി പെട്രോളിന് 13 രൂപയും ഡീസലിന് 16 രൂപയും കുറഞ്ഞു. ബിജെപി ഭരിയ്‌ക്കുന്ന സംസ്ഥാനങ്ങളിലെല്ലാം ഈ വിലക്കുറവ് ജനങ്ങള്‍ക്ക് കൈമാറിയിരുന്നു. ഇത് പണപ്പെരുപ്പം തടയാന്‍ സഹായിച്ചിരുന്നു.

ഒക്ടോബറില്‍ പ്രതിദിനം 17  ലക്ഷം ബാരല്‍ എണ്ണ കേന്ദ്രസര്‍ക്കാര്‍ റഷ്യയില്‍ നിന്നും വാങ്ങുന്നുണ്ട്. എണ്ണയുടെ പോക്കുവരവുകള്‍ നിരീക്ഷിക്കുന്ന കെപ്ലറിന്റെ കണക്ക് പ്രകാരമാണിത്. ഇത്രയും ഡിസ്കൗണ്ട് വാഗ്ദാനം ചെയ്ത സ്ഥിതിയ്‌ക്ക് നവമ്പറില്‍ ഇന്ത്യ ഇനിയും റഷ്യന്‍ എണ്ണയുടെ ഇറക്കുമതി കൂട്ടിയേക്കും.