ന്യൂദല്‍ഹി: സര്‍ക്കാര്‍ തലവനെന്ന നിലയില്‍ നരേന്ദ്ര മോദി 25-ാം വര്‍ഷത്തിലേക്ക്. 2001 ഒക്ടോബര്‍ ഏഴിനാണ് മോദി ആദ്യമായി ഗുജറാത്ത് മുഖ്യമന്ത്രിയാകുന്നത്. തുടര്‍ന്നിങ്ങോട്ട് ഇടവേളകളില്ലാതെ ഭരണത്തലവനെന്ന നിലയില്‍ രാഷ്‌ട്രത്തെയും ജനങ്ങളെയും സേവിക്കുന്നു. മൂന്ന് തവണ ഗുജറാത്ത് മുഖ്യമന്ത്രി, 2014ല്‍ പ്രധാനമന്ത്രി പദവിയിലേക്ക്, തുടര്‍ന്നുള്ള രണ്ടു ലോക്‌സഭാ തെരഞ്ഞെടുപ്പുകളിലും രാഷ്‌ട്രത്തെ നയിക്കാനുള്ള ചുമതല മോദിയില്‍ തന്നെ നിക്ഷിപ്തമായി.
രാജ്യത്തെ ജനങ്ങള്‍ തുടര്‍ച്ചയായി അര്‍പ്പിച്ച വിശ്വാസത്തിനും സ്‌നേഹത്തിനും പ്രധാനമന്ത്രി ഇന്നലെ നന്ദി രേഖപ്പെടുത്തി. വികസിത ഭാരതമെന്ന ലക്ഷ്യം സാക്ഷാത്കരിക്കാന്‍ കൂടുതല്‍ ദൃഢനിശ്ചയത്തോടെ പ്രവര്‍ത്തിക്കുമെന്ന് പ്രതിജ്ഞയെടുക്കുന്നതായും അദ്ദേഹം സമൂഹ മാധ്യമങ്ങളില്‍ കുറിച്ചു. ഗുജറാത്ത് മുഖ്യമന്ത്രിയെന്ന ഉത്തരവാദിത്തം പാര്‍ട്ടി ഏല്‍പ്പിച്ചത് വളരെ പരീക്ഷണാത്മകമായ സാഹചര്യത്തിലായിരുന്നെന്ന് പ്രധാനമന്ത്രി അനുസ്മരിച്ചു.
ഈ 25 വര്‍ഷങ്ങള്‍ നിരവധി അനുഭവങ്ങള്‍ നിറഞ്ഞതാണ്. നമ്മുടെ പ്രിയപ്പെട്ട രാഷ്‌ട്രത്തെ സേവിക്കുകയെന്നത് ഏറ്റവുമുയര്‍ന്ന ബഹുമതിയാണ്, ഈ കടമ എന്നില്‍ നന്ദിയും ലക്ഷ്യബോധവും നിറയ്‌ക്കുന്നു. ഭരണഘടനാമൂല്യങ്ങള്‍ നിരന്തരമായ വഴികാട്ടിയായതിനാല്‍, വികസിത ഭാരതമെന്ന കൂട്ടായ സ്വപ്‌നം സാക്ഷാത്കരിക്കാന്‍ വരുംകാലങ്ങളില്‍ കൂടുതല്‍ കഠിനാധ്വാനം ചെയ്യുമെന്നും പ്രധാനമന്ത്രി വ്യക്തമാക്കി.
