തിരുവനന്തപുരം: ലോകത്തിലെ ഏറ്റവും വലിയ സന്നദ്ധസംഘടന അഥവാ എന്‍ജിഒ എന്നത് ആര്‍എസ്എസ് ആണെന്നും അതില്‍ ഒരു സംശയവും വേണ്ട കേട്ടോ എന്നും ഏഷ്യാനെറ്റിലെ ഉണ്ണി ബാലകൃഷ്ണന്. സര്‍ജിക്കല്‍ സ്ട്രൈക്ക് എന്ന തന്റെ പരിപാടിയില്‍ ആര്‍എസ്എസിന് 100 വയസ്സ് തികഞ്ഞതുമായി ബന്ധപ്പെട്ട് ചെയ്ത പ്രോഗ്രാമിലാണ് ഉണ്ണി ബാലകൃഷ്ണന്റെ ഈ വെളിപാട്. സാധാരണ ആര്‍എസ്എസിനെ തള്ളിക്കളയുകയും ഇടത് പക്ഷത്തെ ചങ്കില്‍ കൊണ്ടുനടക്കുകയും ചെയ്ത ഈ മാധ്യമപ്രവര്‍ത്തകന്‍ ആര്‍എസ്എസിന്റെ ശക്തി അംഗീകരിക്കുന്നത് കണ്ടപ്പോള്‍ പലരും അത്ഭുതപ്പെട്ടു.
“കഴിഞ്ഞ ആഗസ്ത് 15ല്‍ പ്രധാനമന്ത്രി നരേന്ദ്രമോദി ചെങ്കോട്ടയില്‍ നിന്നും പ്രസംഗിക്കുകയുണ്ടായി. അദ്ദേഹം ആ പ്രസംഗത്തില്‍ ആര്‍എസ്എസിനെക്കുറിച്ച് പരാമര്‍ശിക്കുകയുണ്ടായി. അതില്‍ ലോകത്തിലെ ഏറ്റവും വലിയ സന്നദ്ധസംഘടന ആര്‍എസ്എസ് ആണെന്ന് മോദി പറഞ്ഞിരുന്നു. അക്കാര്യത്തില്‍ യാതൊരു വിധ സംശയവും വേണ്ട കേട്ടോ”- ഉണ്ണി ബാലകൃഷ്ണന് പ്രേക്ഷകരെ ഓര്‍മ്മപ്പെടുത്തുന്നു.
“ആര്‍എസ്എസില്‍ 40 ലക്ഷം പേരാണ് പ്രവര്‍ത്തിച്ചുകൊണ്ടിരിക്കുന്നത്. ഖത്തര്‍ എന്ന രാജ്യത്തിന്റെ ആകെ ജനസംഖ്യ 32 ലക്ഷം മാത്രമാണ്. അതിനേക്കാള്‍ അംഗബലത്തില്‍ വലിപ്പക്കൂടുതല്‍ ആര്‍എസ്എസിനാണ്. ബഹ്റൈന്റെ ജനസംഖ്യ 17 ലക്ഷം മാത്രമാണ്. ഇതിനേക്കാളെല്ലാം വലിയ രാജ്യമാണ് ആര്‍എസ്എസ്. ആര്‍എസ്എസ് ഒരു രാഷ്‌ട്രീയപാര്‍ട്ടിയല്ല, സന്നദ്ധസംഘടനയാണ്. ഈ സന്നദ്ധസംഘടനയില്‍ 83000 ശാഖകളുണ്ട്. ശാഖകളാണ് ആര്‍എസ്എസിന്റെ അടിസ്ഥാന യൂണിറ്റുകള്‍.”- ഉണ്ണി ബാലകൃഷ്ണന് പറയുന്നു.
“ഏറ്റവും കൂടുതല്‍ ശാഖകളുള്ളത് ഉത്തര്‍പ്രദേശിലാണ്. 8000 ശാഖകള്‍. അത് കഴിഞ്ഞാല്‍ ഏറ്റവും കൂടുതല്‍ ശാഖകള്‍ ഉള്ളസംസ്ഥാനം കേരളാണ്. 6,845 ശാഖകളാണ് ആര്‍എസ്എസിന് കേരളത്തില്‍ ഉള്ളത്. 50 കോടി ജനങ്ങളെ സേവിക്കുന്ന എസ് ബിഐ ബാങ്കിന് ആകെയുള്ളത് 22,500 ശാഖകളേ ഉള്ളൂ. അപ്പോള്‍ ആര്‍എസ്എസിന്റെ വിന്യാസം എത്ര വലുതാണെന്ന് മനസ്സിലാകും.”- ഉണ്ണി ബാലകൃഷ്ണന് പറയുന്നു.
