ന്യൂദല്‍ഹി: ജനങ്ങളുടെ പ്രശ്നങ്ങളെക്കുറിച്ച് വ്യക്തമായ ധാരണയുള്ള, ജനകീയനായ നേതാവായിരുന്നു വി.കെ. മല്‍ഹോത്രയെന്ന് പ്രധാനമന്ത്രി നരേന്ദ്രമോദി അനുശോചന സന്ദേശത്തില്‍ പറഞ്ഞു. ദല്‍ഹിയില്‍ പാര്‍ട്ടിയെ ശക്തിപ്പെടുത്തുന്നതില്‍ അദ്ദേഹം നിര്‍ണായക പങ്ക് വഹിച്ചു. പാര്‍ലമെന്റിലെ അദ്ദേഹത്തിന്റെ ഇടപെടലുകളും സംഭാവനകളും എന്നും ഓര്‍മിക്കപ്പെടുമെന്നും പ്രധാനമന്ത്രി അഭിപ്രായപ്പെട്ടു.
പൊതുജീവിതത്തിന് വി.കെ. മല്‍ഹോത്ര നല്‍കിയ സംഭാവനകള്‍ എന്നും ഓര്‍മ്മിക്കപ്പെടുമെന്ന് ഉപരാഷ്‌ട്ര പതി സി.പി. രാധാകൃഷ്ണന്‍ അനുശോചനസന്ദേശത്തില്‍ പറഞ്ഞു. ജനസംഘത്തില്‍ നിന്ന് ജനതാ പാര്‍ട്ടിയിലേക്കും ബിജെപിയിലേക്കും സംഘടനയെ രൂപപ്പെടുത്തുന്നതിലും വികസിപ്പിക്കുന്നതിലും മുഖ്യപങ്കുവഹിച്ച നേതാവായിരുന്നു വി.കെ. മല്‍ഹോത്രയെന്ന് കേന്ദ്രആഭ്യന്തരമന്ത്രി അമിത്ഷാ അനുശോചന സന്ദേശത്തില്‍ പറഞ്ഞു.
രാഷ്‌ട്രത്തിന്റെയും സമൂഹത്തിന്റെയും സംഘടനയുടെയും ഉന്നമനത്തിനുമായി വി.കെ. മല്‍ഹോത്ര നടത്തിയ പോരാട്ടങ്ങളും സംഭാവനയും ത്യാഗവും അവിസ്മരണീയമാണെന്ന് ബിജെപി ദേശീയ അധ്യക്ഷന്‍ ജെ.പി. നഡ്ഡ അനുശോചന സന്ദേശത്തില്‍ പറഞ്ഞു. അദ്ദേഹത്തിന്റെ ജീവിതവും ചിന്തകളും ബിജെപി പ്രവര്‍ത്തകര്‍ക്ക് എന്നും പ്രചോദനമാണെന്നും അദ്ദേഹം കൂട്ടിച്ചേര്‍ത്തു.
