ന്യൂയോര്‍ക്ക് : കനേഡിയന്‍ വിദേശകാര്യ മന്ത്രി അനിത ആനന്ദിന്‌റെ ഇന്ത്യ സന്ദര്‍ശനത്തിനു മുന്നോടിയായി വിദേശകാര്യ മന്ത്രി എസ്. ജയശങ്കര്‍ ന്യൂയോര്‍ക്കില്‍ അവരുമായി കൂടിക്കാഴ്ച നടത്തി. ഇരുരാജ്യങ്ങളും തമ്മില്‍ 2023-ല്‍ വഷളായ ബന്ധം മെച്ചപ്പെടുത്തുന്നതിന്‌റെ ഭാഗമായാണ് അനിതയുടെ സന്ദര്‍ശനം. ഒക്ടോബര്‍ 13-14 തീയതികളിലാണ് അവര്‍ ഇന്ത്യയിലുണ്ടാവുക.
‘വിദേശകാര്യ മന്ത്രി അനിത ആനന്ദുമായി ഇന്ന് രാവിലെ ന്യൂയോര്‍ക്കില്‍ വെച്ച് നല്ലൊരു കൂടിക്കാഴ്ച നടന്നു. ബന്ധം പുനഃസ്ഥാപിക്കുന്നതിനിടയില്‍ ഹൈക്കമ്മീഷണര്‍മാരുടെ നിയമനം സ്വാഗതാര്‍ഹമാണ്,’ അനിത ആനന്ദുമായുള്ള കൂടിക്കാഴ്ചയ്‌ക്ക് ശേഷം ജയശങ്കര്‍ സോഷ്യല്‍ മീഡിയയില്‍ പറഞ്ഞു. വിദേശകാര്യ മന്ത്രി ആനന്ദിനെ ഇന്ത്യയിലേയ്‌ക്ക് സ്വാഗതം ചെയ്യാന്‍ ആഗ്രഹിക്കുന്നു’ അദ്ദേഹം കൂട്ടിച്ചേര്‍ത്തു.
കഴിഞ്ഞ ദിവസം ഒരു കനേഡിയന്‍ ടിവി ഷോയ്‌ക്ക് നല്‍കിയ അഭിമുഖത്തില്‍, ഇന്ത്യാ സന്ദര്‍ശന വേളയില്‍ ‘നയതന്ത്ര ബന്ധത്തിലെ അടുത്ത ഘട്ടങ്ങള്‍’ ചര്‍ച്ച ചെയ്യുമെന്ന് അനിത ആനന്ദ് പറഞ്ഞിരുന്നു.
