ന്യൂദല്ഹി: ഭൂട്ടാൻ കാർ കടത്ത് കേസിൽ ആസൂത്രിതമായി കള്ളപ്പണം വെളുപ്പിക്കല് നടന്നതായി സംശയം ബലപ്പെട്ടിട്ടുള്ളതിനാല് ഇഡിയും അന്വേഷണത്തിനെത്തുമെന്നാണ് വിവരം. ഇതിന്റെ ഭാഗമായി ഇഡി. ഈ കേസുമായി ബന്ധപ്പെട്ട് പ്രാഥമിക വിവരങ്ങൾ തേടിയിട്ടുണ്ട്.
മറ്റൊരു കേസില് വാദം കേട്ടുകൊണ്ടിരിക്കുന്നതിനിടയിലാണ് ദല്ഹി ഹൈക്കോടതിയില് ഇഡി ഇക്കാര്യം വെളിപ്പെടുത്തിയത്. പുറമേ നിന്നു നോക്കിയാല് വെറും നികുതിവെട്ടിപ്പ് കേസ് മാത്രമാണെങ്കിലും അതിനപ്പുറം മാനങ്ങളുള്ള കേസാണിതെന്ന് അന്വേഷണ ഏജന്സികള് പറയുന്നു. ഭൂട്ടാന് വാഹനക്കള്ളക്കടത്ത് കേസ് ഇഡി അന്വേഷിക്കേണ്ടതല്ലേ എന്ന് ഹൈക്കോടതി ഡിവിഷൻ ബെഞ്ച് ഇഡിയോട് ചോദിച്ചിരുന്നു. ഇതോടെയാണ് ഭൂട്ടാന് വാഹന കള്ളക്കടത്തിൽ കള്ളപ്പണ ഇടപാട് നടന്നിട്ടുണ്ടെന്ന് കസ്റ്റംസ് ഇന്നലെ വ്യക്തമാക്കിയതിനാല് ഇഡി പ്രാഥമിക വിവരങ്ങൾ തേടിയിട്ടുണ്ടെന്ന് കേന്ദ്രസര്ക്കാരിന്റെ അഭിഭാഷകന് കോടതിയില് പറഞ്ഞത്.
അന്വേഷണം നടത്തുന്ന കസ്റ്റംസ് പ്രി വെൻറ്റീവ് വിഭാഗത്തിൽ നിന്നാണ് കൊച്ചിയിലെ ഇഡി ഉദ്യോഗസ്ഥർ വിവരങ്ങൾ തേടിയത്. കേസിൽ എംബസികളുടെ പേരിൽ വ്യാജ രേഖകൾ ചമച്ചത് വിദേശകാര്യ മന്ത്രാലയത്തെ അറിയിക്കും.
മാത്രമല്ല, ഈ കേസില് തീവ്രവാദികളുമായുള്ള ബന്ധവും ആരോപിക്കപ്പെടുന്നുണ്ട്. അതിനാല് ഭാവിയില് എന്ഐഎയും കേസിലേക്ക് കടന്നുവന്നേയ്ക്കുമെന്നറിയുന്നു.
