കൊച്ചി : സിപിഎം നേതാവ് കെ ജെ ഷൈന്‍ ടീച്ചര്‍ നല്‍കിയ അധിക്ഷേപ പരാതിയില്‍ പ്രതിയായ കോണ്‍ഗ്രസ് നേതാവ് ഗോപാലകൃഷ്ണന് ചോദ്യം ചെയ്യലിന് ഹാജരാകാന്‍ നോട്ടീസ് നല്‍കി. ചൊവ്വാഴ്ച ഹാജരാകാനാണ് അന്വേഷണ സംഘം നിര്‍ദേശം നല്‍കിയത്.ഗോപാലകൃഷ്ണന്റെ വീട്ടില്‍ പരിശോധന നടത്തിയ ശേഷമാണ് നോട്ടീസ് നല്‍കിയത്.പരിശോധനയില്‍ ഫോണ്‍ പിടിച്ചെടുത്തു.
സൈബര്‍ ആക്രമണത്തില്‍ അന്വേഷണ സംഘത്തിന് മുന്നില്‍ കൂടുതല്‍ തെളിവുകള്‍ കെ ജെ ഷൈന്‍ നല്‍കിയിരുന്നു. സാമൂഹിക മാധ്യമങ്ങളിലൂടെ അപവാദപ്രചാരണം നടത്തിയവരുടെ പേര് വിവരങ്ങളാണ് നല്‍കിയത്
വിവിധ ജില്ലകളില്‍ നിന്ന് ലഭിച്ച വിവരങ്ങള്‍ കണക്കിലെടുത്ത് പുതിയ കേസുകളും രജിസ്റ്റര്‍ ചെയ്യാനാണ് നീക്കം. വ്യാജപ്രചാരണം നടത്തിയ കോണ്‍ഗ്രസ് സൈബര്‍ ഹാന്‍ഡിലുകളെകുറിച്ചും നേതാക്കളെകുറിച്ചും പൊലീസ് അന്വേഷണം നടത്തുന്നുണ്ട്.കെ ജെ ഷൈനിന്റെ പരാതിയില്‍ കുന്നംകുളത്തെ യൂത്ത് കോണ്‍ഗ്രസ് ചൊവ്വന്നൂര്‍ മണ്ഡലം പ്രസിഡന്റ് സുജിത്തിന്റെ പേരും ഉണ്ട്.
സ്ത്രീത്വത്തെ അപമാനിക്കുന്ന രീതിയില്‍ ലൈംഗിക ചുവയുള്ള പോസ്റ്റുകള്‍
സമൂഹ മാധ്യമത്തിലൂടെ പങ്കുവെച്ചുവെന്നാണ് പരാതി.അപവാദ പ്രചാരണം നടത്തിയ പലരും പോസ്റ്റുകള്‍ പിന്‍വലിച്ചതിനാല്‍ ഇത് വീണ്ടെടുക്കാന്‍ സൈബര്‍ പൊലീസ് മെറ്റയുടെ സഹായവും തേടി. ഫേസ്ബുക്ക് പോസ്റ്റുകള്‍ ഇട്ടവര്‍ക്കെതിരായ സാക്ഷി മൊഴികളും പൊലീസ് ശേഖരിക്കുന്നുണ്ട്.
അതിനിടെ കേസിലെ മുഖ്യപ്രതി സി കെ ഗോപാലകൃഷ്ണന് ഒളിവില്‍ പോയി.വി ഡി സതീശന്‍ എംഎല്‍എയുടെ ഓഫീസിലാണ് ഗോപാലകൃഷ്ണനെ ഒളിപ്പിച്ചിരിക്കുന്നതെന്ന് ആരോപിച്ച് പറവൂരിലെ സിപിഎം നേതാക്കള്‍ രംഗത്തെത്തി. കഴിഞ്ഞ ദിവസം ഗോപാലകൃഷ്ണന്റെ വീട്ടിലേക്ക് സിപിഎം പ്രതിഷേധ മാര്‍ച്ച് നടത്തിയിരുന്നു.
