ന്യൂദല്‍ഹി : സെപ്തംബര്‍ 22 തിങ്കളാഴ്ച മുതല്‍ രാജ്യത്ത് ജിഎസ്‌ടി നിരക്കിലെ ഇളവ് പ്രാബല്യത്തില്‍ വരുന്നതോടെ നിത്യോപയോഗ സാധനങ്ങളുടെ വില കുറയുമെന്ന് പ്രധാനമന്ത്രി നരേന്ദ്ര മോദി. ജിഎസ്‌ടി നിരക്കിലെ ഇളവ് സാധാരണക്കാരെ നികുതിഭാരത്തില്‍ നിന്നും മോചിപ്പിക്കുമെന്നും പ്രധാനമന്ത്രി പറഞ്ഞു.
ജിഎസ്‌ടി പരിഷ്‌കരണം രാജ്യത്തിന്റെ വികസനത്തെ ത്വരിതപ്പെടുത്തുമെന്നും യുവാക്കള്‍ക്കും കർഷകർക്കും മധ്യവർഗത്തിനും ഇതിന്റെ പ്രയോജനം ലഭിക്കുമെന്നും പ്രധാനമന്ത്രി വ്യക്തമാക്കി.രാജ്യത്തെ ജനങ്ങള്‍ക്ക് അദ്ദേഹം നവരാത്രി ആശംസകള്‍ നേർന്നു.
തിങ്കളാഴ്ച മുതല്‍ സാധനങ്ങള്‍ കുറഞ്ഞ വിലയില്‍ വാങ്ങാൻ സാധിക്കുമെന്നും ദൈനംദിന ആവശ്യങ്ങള്‍ വളരെ കുറഞ്ഞ ചെലവില്‍ നിറവേറ്റാനാകുമെന്നും അദ്ദേഹം പറഞ്ഞു. ജിഎസ്‌ടി നിരക്കിലെ ഇളവ് ആത്മനിർഭർ ഭാരതിലേക്കുള്ള ഒരു ചുവടുവയ്‌പ്പ് കൂടിയാണെന്നും പ്രധാനമന്ത്രി വ്യക്തമാക്കി.
ഒരു രാജ്യം, ഒരു നികുതി എന്ന സ്വപ്‌നമാണ് സാക്ഷാത്‌കരിക്കപ്പെടുന്നത്. വിവിധ നികുതികള്‍ സാധാരണക്കാരെ ബുദ്ധിമുട്ടിക്കുന്നുണ്ട്. നികുതി ഘടന ലഘൂകരിക്കുക എന്നതാണ് ഈ പരിഷ്‌ക്കാരത്തിന്റെ ലക്ഷ്യം.- അദ്ദേഹം പറഞ്ഞു.
