തിരുവനന്തപുരം:തിരുവനന്തപുരം കോര്‍പ്പറേഷനില്‍ വികസനത്തിന്റെ പുതുചരിതം രചിക്കാന്‍ കര്‍മ പദ്ധതികള്‍ ആവിഷ്‌ക്കരിക്കുന്ന രാജീവ് ചന്ദ്രശേഖറിന് പിന്തുണയുമായി ഇന്‍ഡോര്‍ മേയര്‍ അഡ്വ.പുഷ്യമിത്ര ഭാര്‍ഗവ്.കൃത്യമായ ആസൂത്രണത്തോടെ ഭരണ മികവിലേക്കുയര്‍ന്ന രാജ്യത്തെത്തന്നെ ഒന്നാംകിട
കോര്‍പ്പറേഷന്റെ മേയറുമായി തിരുവനന്തപുരം നഗരത്തിന്റെ വികസന സങ്കല്‍പ്പങ്ങളാണ് രാജീവ് ചന്ദ്രശേഖര്‍ പങ്കുവച്ചത്.
”കേരളത്തിന്റെ തലസ്ഥാന നഗരിയായ തിരുവനന്തപുരം ഒരു മാതൃകാ നഗരമായി വികസിപ്പിക്കേണ്ടതുണ്ട്. അതുവഴി സേവനങ്ങളും അടിസ്ഥാന സൗകര്യങ്ങളും പ്രാന്തപ്രദേശങ്ങളിലേക്കും ഗ്രാമീണ മേഖലകളിലേക്കും എത്തിച്ചേരും.ഇതു വഴി ‘മെട്രോപൊളിറ്റന്‍ ‘ പ്രദേശങ്ങളുടെ വിസ്തൃതി വിശാലമാവും.നഗരത്തിലുടനീളമുള്ള ചേരികള്‍ക്കും അനധികൃത കോളനികള്‍ക്കും ജനകേന്ദ്രീകൃത പരിഹാരങ്ങളും ആവശ്യമാണ്. അഴിമതി രഹിത,മയക്കുമരുന്ന് രഹിത, ജനകേന്ദ്രീകൃത ഭരണത്തിലൂടെ അനന്തപുരിയെ നമുക്ക് കൈപിടിച്ചുയര്‍ത്താം” – രാജീവ് ചന്ദ്രശേഖര്‍ തന്റെ കാഴ്‌ച്ചപ്പാടുകള്‍ പങ്കുവച്ചു.
എ.ഐ അടക്കമുള്ള സങ്കേതങ്ങള്‍ ഉള്‍പ്പെടുത്തിഡിജിറ്റല്‍ ഭരണം മികച്ച അര്‍ത്ഥത്തില്‍ നടപ്പാക്കിയ’ഇന്‍ഡോര്‍ മാതൃക’ തിരുവനന്തപുരത്തും യാഥാര്‍ത്ഥ്യമാക്കാനുള്ള നിര്‍ദ്ദേശങ്ങളും പിന്തുണയും പുഷ്യമിത്ര ഭാര്‍ഗവ് വാഗ്ദാനം ചെയ്തു.
വികസിത കേരളം എന്ന ബിജെപിയുടെ ദര്‍ശനത്തിന്റെ ഭാഗമായി വികസന അനന്തപുരി ലക്ഷ്യം വച്ചുള്ള ആശയങ്ങള്‍ നടപ്പാക്കാന്‍ മൂര്‍ത്തവും സുസ്ഥിരവുമായ നഗര പദ്ധതികളാണ് രാജീവ്ചന്ദ്രശേഖര്‍ വിഭാവനം ചെയ്യുന്നത്.ഈ തിരഞ്ഞെടുപ്പില്‍ ജനങ്ങള്‍ അതിനുള്ള
അവസരം നല്‍കുമെന്ന രാജീവിന്റെ ശുഭപ്രതീക്ഷകള്‍ക്ക് ആശിര്‍വാദം നല്‍കാനും ഇന്‍ഡോര്‍ മേയര്‍ മറന്നില്ല.
പൊതുസേവനത്തിനും പരിസ്ഥിതി പ്രശ്നങ്ങള്‍ക്കുമുളള പുഷ്യമിത്രയുടെ സമര്‍പ്പണത്തെ രാജീവ് ചന്ദ്രശേഖറും അനുമോദിച്ചു.മാരാര്‍ജി ഭവനില്‍ നടന്ന കൂടിക്കാഴ്‌ച്ച ഏതാണ്ട് ഒരു മണിക്കൂറിലധികം നീണ്ടു.
