ദുബായ്: ഏഷ്യാകപ്പിൽ പാകിസ്താനെതിരായ വിജയം സൈനികർക്ക് സമർപ്പിക്കുകയായിരുന്നു ക്യാപ്റ്റൻ സൂര്യകുമാർ യാദവ് . ഇന്ത്യ -പാക് പോരാട്ടം ബഹിഷ്ക്കരികണമെന്ന ആഹ്വാനം ഉയർന്ന ഘട്ടത്തിലാണ് മത്സരം നടന്നത് . ടോസ് സമയത്ത് പാക് നായകൻ സൽമാൻ ആഘയ്‌ക്ക് കൈ കൊടുക്കാനും സൂര്യകുമാർ തയ്യാറായില്ല . മത്സരശേഷവും പാക് താരങ്ങളെ മൈൻഡ് ചെയ്യാതെ ഇന്ത്യൻ താരങ്ങൾ മടങ്ങുകയും ചെയ്തു.പാകിസ്ഥാൻ ടീം ഇന്ത്യൻ ഡ്രസ്സിംഗ് റൂമിലേക്ക് നടന്നപ്പോഴും വാതിലുകൾ അടച്ചിരുന്നു
.പിന്നീട് സമ്മാനദാന ചടങ്ങിലും പത്രസമ്മേളനത്തിലും സൂര്യകുമാറിനോട് ഹസ്തദാനം വേണ്ട എന്ന തീരുമാനത്തെക്കുറിച്ച് ചോദിച്ചു. പഹൽഗാം ഭീകരാക്രമണം മനസ്സിൽ വെച്ചുകൊണ്ട് പാകിസ്ഥാന് ഒരു സന്ദേശം അയയ്‌ക്കാനുള്ള ശ്രമമായിരുന്നു ഇതെന്ന് സൂര്യകുമാർ പറഞ്ഞു. എങ്കിലും ഈ ആശയം തന്റേതല്ലെന്നും അദ്ദേഹം വ്യക്തമാക്കി.ഹസ്തദാനം വേണ്ട എന്ന ആശയം മുന്നോട്ടുവച്ചത് ഹെഡ് കോച്ച് ഗൗതം ഗംഭീറാണ്. പാകിസ്ഥാൻ കളിക്കാരുമായി ഹസ്തദാനം നടത്തരുതെന്നും, ബഹിഷ്കരണവുമായി ബന്ധപ്പെട്ട ഒരു വാക്കുതർക്കവും നടത്തരുതെന്നും ഗംഭീർ ഇന്ത്യൻ കളിക്കാരോട് ഉപദേശിച്ചതായി റിപ്പോർട്ടുണ്ട്.
മത്സരത്തിന് മുമ്പ് ‘ബഹിഷ്കരണം’ എന്ന ചർച്ച ഇന്ത്യൻ ഡ്രസ്സിംഗ് റൂമിൽ പോലും എത്തിയിരുന്നു. ഇത് സൂര്യകുമാറിനെയും മറ്റ് സപ്പോർട്ട് സ്റ്റാഫിലെ അംഗങ്ങളെയും ആശങ്കയ്‌ക്കിടയാക്കിയെങ്കിലും സോഷ്യൽ മീഡിയ ഉപയോഗിക്കുന്നത് കുറയ്‌ക്കാനും ഗെയിം കളിക്കുന്നതിൽ മാത്രം ശ്രദ്ധ കേന്ദ്രീകരിക്കാനും ഗംഭീർ കളിക്കാരോട് പറഞ്ഞു.
“സോഷ്യൽ മീഡിയ ഉപയോഗിക്കുന്നത് കുറയ്‌ക്കുക, ബഹളം വായിക്കുന്നത് നിർത്തുക. ഇന്ത്യയ്ക്കുവേണ്ടി കളിക്കുക എന്നതാണ് നിങ്ങളുടെ ജോലി. പഹൽഗാമിൽ എന്താണ് സംഭവിച്ചതെന്ന് മറക്കരുത്. കൈ കുലുക്കരുത്, ഇടപെടരുത് – പുറത്തുപോകുക, നിങ്ങളുടെ പരമാവധി കാണിക്കുക, ഇന്ത്യയ്ക്കുവേണ്ടി വിജയിക്കുക,” ഇതായിരുന്നു ഗംഭീറിന്റെ വാക്കുകൾ.
‘ പഹൽഗാം ആക്രമണത്തിലെ ഇരകളോടും അവരുടെ കുടുംബങ്ങളോടും അവർ അനുഭവിച്ച കഷ്ടപ്പാടുകളോടും ഐക്യദാർഢ്യം പ്രകടിപ്പിക്കാൻ ഞങ്ങൾ ആഗ്രഹിച്ചതിനാൽ ഈ മത്സരം പ്രധാനമായിരുന്നു. അതിലുപരി, വിജയകരമായ ഓപ്പറേഷൻ സിന്ദൂരിന് ഇന്ത്യൻ സൈന്യത്തോട് നന്ദി പറയാൻ ഞങ്ങൾ ആഗ്രഹിക്കുന്നു. നമ്മുടെ രാജ്യത്തെ അഭിമാനിപ്പിക്കാനും സന്തോഷിപ്പിക്കാനും ഞങ്ങൾ ശ്രമിക്കും.”- സൂര്യകുമാർ പറഞ്ഞു.
