ന്യൂദല്‍ഹി: രാഷ്ട്രീയ പാര്‍ട്ടികളുടെ രജിസ്‌ട്രേഷനും നിയന്ത്രണത്തിനും നിയമങ്ങള്‍ രൂപീകരിക്കണമെന്ന് ആവശ്യപ്പെടുന്ന ഹര്‍ജിയില്‍ ജസ്റ്റിസുമാരായ സൂര്യകാന്ത്, ജോയ്‌മല്യ ബാഗ്ചി എന്നിവരടങ്ങിയ സുപ്രീംകോടതി ബെഞ്ച് കേന്ദ്ര സര്‍ക്കാരിനും തിരഞ്ഞെടുപ്പ് കമ്മീഷനും നിയമ കമ്മീഷനും നോട്ടീസ് അയച്ചു. നിരവധി വ്യാജ രാഷ്ട്രീയ പാര്‍ട്ടികള്‍ ജനാധിപത്യത്തിന് ഗുരുതരമായ ഭീഷണി ഉയര്‍ത്തുന്നുവെന്നും, പണം വാങ്ങി കൊടും കുറ്റവാളികള്‍, മയക്കുമരുന്ന് കടത്തുകാര്‍, കള്ളപ്പണം വെളുപ്പിക്കുന്നവര്‍ എന്നിവരെ ഭാരവാഹികളായി നിയമിക്കുന്നുവെന്നും അഭിഭാഷകനായ അശ്വിനി കുമാര്‍ ഉപാധ്യായ സമര്‍പ്പിച്ച ഹര്‍ജിയില്‍ ആരോപിച്ചു. വ്യക്തമായ ഒരു നിയന്ത്രണ
ചട്ടക്കൂടിന്റെ അഭാവത്തില്‍, വിഘടനവാദികള്‍ സംഭാവനകള്‍ ശേഖരിക്കുന്നതിനായി രാഷ്ട്രീയ സംഘടനകള്‍ രൂപീകരിച്ചുവെന്നും ചിലര്‍ക്ക് പോലീസ് സംരക്ഷണം പോലും ഉറപ്പാക്കാന്‍ കഴിഞ്ഞുവെന്നും ഹര്‍ജിയില്‍ ആരോപിക്കുന്നു.
നിലവില്‍ ഒരു രാഷ്ട്രീയ പാര്‍ട്ടിയെയും പ്രതി ചേര്‍ത്തിട്ടില്ലെന്ന് വ്യക്തമാക്കിയ കോടതി, എല്ലാ ദേശീയ പാര്‍ട്ടികളെയും കക്ഷി ചേര്‍ക്കാന്‍ ഹര്‍ജിക്കാരനോട് നിര്‍ദ്ദേശിച്ചു.
